NYANRA NJEKAWKULEGE 13

1Njékebe nange le Nube ke ndii kêm ɓee-bò ke Antioche, ɓeekon ke Syrie nga, njéribe-dè-tàge ke tà Nube’t se njéndó dooge nyan ndii tutu. Dooge nè nga, ri de a tò nè: Barnabas a, Siméon ke dé ɓar’n «Niger» a, Lucius doo ke Cyrène a, Manaen ke ndɔ ke d’oto de nan’t se Hérode Antipas a, se Saul a tɔ. Ɓeekon ke Galilée nga, dé gaje danné loo sɔ. Hérode Antipas on ɓee dè gaje’n karé. 2Ndɔ karé bè, d’ɔge kêm de ɓo a, d’an-in mann lé a tɔ. Loo ke dé ndi d’a d’ɔje tà se Nube ɓaa, Ndil-Kêmnda ede de ede nè: – Ɔri Barnabas se Saul undei de se ninn de adi man ɔje dè kule ke m’ɓar de tede nga. 3D’ɔge kêm de ɓo a, d’an-in mann lé a tɔ d’ɔje’n tà se Nube kuwe ɓai. Go’t gugu, d’unde ji de dè’t ɓita d’inye de d’ade ɔti awi ɓai. 4Ndil-Kêmnda ule Barnabas se Saul ade awi kêm ɓee-bò ke Séleucie. Taɓai ei ndai ke loon’t nè ali kêm bato’t awi kum de ke Chypre. 5Loo ke awi teei kêm ɓee ke Salamine ɓaa, ei ilei mber tà le Nube kêm kei kebe nange’t le Juipge kuwe kété. Jean-Marc aw se de le ra se de dè kule ke nange. 6Loo ke dé d’unde dè goré loo bere mbak dé gang d’aw sár dé tee kêm ɓee ke Paphos. Loo ɓee’t nè, d’inge dingem karé bè ke njè mbeli. Dingem nè nga ri’n nè Bar-Jésu. Doo nè girkoje’n è Juip nè è ra ra’n ke njèribe-dè-tà ke tà Nube’t. 7E ndi gir Sergius Paulus njèkonɓee dè goré loo’t nè nga. Njèkonɓee nè nga è doo ke njèkumkunju. Ngur koo tà le Nube ra’n ngain. Gir’n ke nè á ule’n kule ɓar’n Barnabas se Saul. 8Bar-Jésu ke njè mbeli nga ri’n karé ke rang ke se tà Grec è Elimas. E ute Barnabas se Saul mbeng tede è sang rebe le kɔge njèkonɓee kunde kêm’n dè Jésu’t. 9Ndil-Kêmnda taa kêm Saul ke dé ɓar’n Paul pel-pel. E an njè mbeli nè nga kàkàk, taɓai è tam se’n ede nè: 10– An! i ke tà sú se nyanra ke majelé taa rai pel-pel. I ngonn le sú, i njèban le nyanra ke se dè naje’n malang. Rebege le Kuwe-ɓee ke ndai jap nga ke i uwe de i ɗuge de ngong-ngong, ké ndɔ ke ra á i a ebe rai dè’t wa? 11An! ɗarinè tɔgmong le Kuwe-ɓee dari, i a tel k’ee njèkum libe. A an kade lé sár kooi à tò mbɔr ɓita. Ke loon’t nè kuwe, loondul se tilkus sebi dè Elimas’t bigm ade manm loo yo ke nè, è sang doo kade uwe ji’n ndɔr’n. 12Loo ke Sergius njèkonɓee an nyan ke tee dè Elimas’t nè nga bè ɓaa, è unde kêm’n dè Jésu’t tede ɓel ra’n ngain dè tɔgmong’t le nyan-ndó ke ɔje dè Kuwe-ɓee. 13Paul se njémade-loo-kawge le’n in-in kêm ɓee ke Paphos ali kêm bato’t awi kêm ɓee ke Perge ɓeekon ke Pamphylie. Nè Jean-Marc inye de ɔse wan tel ree kêm ɓee-bò ke Jérusalem. 14Paul se Barnabas in-in Perge awi teei kêm ɓee-bò ke Antioche, ɓeekon ke Pisidie. Ndɔ taa kebe ɓaa, ei awi kêm kei kebe nan’t ndii nang le koo tà. 15Dooge tutei magtub gute-ndu Nube ke ndɔ ke Moise ndang a, tutei magtubge le njéribe-dè-tàge ke tà Nube’t a tɔ. Go’t ɓaa, njékan dè kei kebe nan ulei kule ra de’t edi de edi nè: – Ngakon jége, ke nè á awi se tà ndeje ke nange tede le kosdooge nè nga ɓaa, i tami edi de ɗarinè ta. 16Paul ɔse nang in dɔ, yei de ji’n le kade dé ndi jêke^. E ede de ede nè: – Sei dooge ke Israel, sei malang ke i ɓeli Nube, i neli mbi si maje ooi tà le’m. 17Nube le kosdooge ke Israel nga, kété ɔr kà jéige. E ade kà jéige oji nan nyanmi-nyanmi loo ke ndɔ ke nain-in ɓee mba’t Egypte. Go’t gugu, è ade undei loo teei kêm ɓeekon ke Egypte se go tɔgmong le’n è kuwe. 18Nube ile kêm’n dè nyanra de’t ase lo kɔr-sɔ kêm dile’t. 19E tuju gir koje dooge ke è Juipge lé ji sejimute kêm ɓeekon ke Canaan. E ade ɓeekon le girkoje dooge nè nga kà jéige ke nyan-ndube le de. Ndi kà jéige kêm ɓeekon ke Egypte unn gir’n dè’t sár tee’n loo ndi de’t kêm ɓeekon ke Canaan nga, unde nan’t malang ɓaa ase loo aru sɔ se kɔr-mi bè. 20Go’t gugu, è ade de njégangtàge sár tee’n dè Samuel njèribe-dè-tàge ke tà Nube’t. 21Tabai, go’t gugu dé deje ngar. Nube ɔr Saul ngonn le Kis ade on de ase ɓal kɔr-sɔ. Saul nga, è girkà le Benjamin. 22Loo ke Nube sure Saul inye’n ɓaa, è ɔr ngar dènn’t ade David. Ngar David nga, Nube ɔrgo tà le’n ede nè: «Man m’inge David ngonn le Jessé. E doo ke m’tár’n dè ɓengrem’t. A ra nyan malang se go kêm ndige le’m.» 23Ndɔ ke Nube unn ndu’n le kade Israelge njèkaje de. E ɔr Jésu njèkaje de nga girkà’t le ngar David. 24Kété ɓita kade Jésu ree unn gir kule le’n nga, Jean-Baptiste ile mber kule dooge manné njonm le kade turi hal de. E ile mber nè nga ade kos Israelge malang 25Loo ke nain ngɔr kade Jean ɔr son ngɔde kan-in’n ɓaa, è deje de ede nè: «Ké sei i giri kété edi nè man nga m’ee nan wa? Man m’ee njèkaje dooge ke sei ngineii nga lé ɓai. Nè an-in! doo karé à ree goom’t non. Doo nè nga, gabang’t ke njann’t géa, m’ase tute lé.» Paul tel tam ede nè: 26– Ngakonmge ke girkà’t le Abraham, sei ke sei Juipge lé ke i ɓeli Nube, ooi maje: Tà kaje nè nga Nube ule’n ade jèi malang. 27Tede dooge ke ndii kêm ɓee-bò ke Jérusalem se njékɔr non dege giri titeke Jésu è njèkaje dooge lé. Magtubge le njéribe-dè-tàge ke tà Nube’t ke dé tute se ndɔ taa kebege karé-karé malang nga géa, dé ger gir lé a tɔ. Dé gangtà dè Jésu’t d’ade tàge ke tooi kêm magtubge’t le njéribe-dè-tàge ke tà Nube’t aw loon’t deĵ. 28D’inge tà karé bè le gang’n tà yo dè Jésu’t lé. Nè né è bè géa, dé deje Pilate le kade ade dé tɔl’n. 29Loo ke dé ra se Jésu nyange malang ke dé ndang kêm Magtubge’t d’ɔje’n dè’n ɓá ɓaa, d’ɔr ninn’n kade kage-ke-dese’t d’aw’n dé dubu be-ɓade’t. 30Nè Nube ade unde loo tee dann njé ke koo’t. 31Go’t gugu ɓaa, Jésu unde’n loo tee pan ade njé ke ndɔ ke danni nin ɓeekon ke Galilée awi se’n kêm ɓee-bò ke Jérusalem an-in nin ndɔ bule. Dé nè nga kuwe á ɗarinè dé tel dé njékɔrgo tàge le’n kade kosdooge. 32Jè géa, j’ile mber Tà ke Maje nè nga j’ade sei: Ndukunn ke ndɔ ke Nube unn ade kà jéige nga, 33è ra nyan’n ade jèi ngannkà dege ɗarinè. E ade Jésu unde loo tee loo yo se go tà ke dé ndang kêm magtub Pa ke njèkon’t joo ede nè: «I i Ngonn’m, ɓila man m’oji.» 34Nube ade Jésu unde loo tee dann njé ke koo’t. Danra’n à tel jɔri pɔtɔk be-ɓade’t ndan lé. Ndɔ ke Nube tam kété ede nè: «Nyan ke ndɔ ke m’unn’n ndu’m le kade David nga, m’a made sei. E ngarankum nyan ke tò se ninn’n.» 35Gir’n ke nè á Nube tam’n tà loo ke rang’t ɓai ede nè: «Doo lei ke tò se ninn’n nga, i a kinye’n kade jɔri pɔtɔk kêm be-ɓade’t ndan lé.» 36Loo ke ndɔ ke David ndi se dè’n dɔ ɓai nga, è ngonn njèndi le Nube. E ra nyan se go kêmndige le Nube. Nè è wei ade dé dubu’n dè ɓade kànnge’t d’ade danra’n jɔri pɔtɔk. 37Nè è Jésu ke Nube ade unde loo tee loo yo nga danra’n jɔri pɔtɔk lé. 38Ngakonmge, maje kade i geri tà ke j’ede sei nè nga maje: gute-ndu le Moise asekum kɔr tà dè si’t ndan lé. Nè ɓila j’ile mber kêm tin mbit dè kaiya’t j’ade sei takul Jésu nga. 39Doo ke rara ke unde kêm’n dènn’t ɓaa, Nube à ɔr tà dènn’t kɔke. 40Bè ɓaa, undei kumkunju dè ra si’t! Njéribe-dè-tàge ke tà Nube’t tami kété edi nè: 41«An-in! sei njé nede Nubege! Adi ndil si tee an-in soin soin ɓita weii ɓai. Loo ke i ndii se dè si dɔ ɓai nè kuwe, m’a m’ra nyan karé ke dum kum. Ke nè á doo ɔr ser’n ade sei géa, sei a umi kêm si dè’t lé.» Adi nyan nè tee dè si’t lé gar-gar. 42Paul se Barnabas undei loo kêm kei kebe nan’t teei nata. Dé deje de le kade teli edi de tàge nè nga se ndɔ taa kebe ke à ree gugu. 43Loo ke gir kebe nan gang ɓá ɓaa, Juipge ngain se njé ke ei Juipge lé ke ɗɔyi Nube ndoléi go Paul se Barnabas. Paul se Barnabas oji se de tà a, ndeji de le kade dé liger dè noje’t ke Nube uwe se de ke kété. 44Ndɔ taa kebe ke njè kutu go made nè ɓaa, dooge malang ke kêm ɓee-bò ke Antioche, ɓeekon ke Pisidie, ɔsi nja nan reei le kooi tà le Kuwe-ɓee. 45Njé ke reei le kooi tà bulei ngain. Loo ke Juipge an-in kosdoo-bulege nè nga bè ɓaa, jang unn gir ra de. Gir’n ke nè á, d’ute’n tàge le Paul mbeng-mbeng a, dé taje’n a tɔ. 46Paul se Barnabas ndai kêm de káng edi de ndàt edi nè: – E sei Juipge á né j’ayé kede sei tà le Nube nga desêin. Nè sei utei tà nè nga mbeng a, an-in ra si ke dooge ke asi ndii kumgajer se non lé. Gir’n ke nè á, ɗarinè j’a tel tur kum jé ke ra njé ke ei Juipge lé tá ta. 47Tede Kuwe-ɓee unn ndu’n ade jè titeke bè ede nè: «M’undei m’ade i lookar le dooge ke ei Juipge lé, le kade i unn tà kaje nè aw’n se loo-loo sár ɔse’n ngei nang bere mbak.» 48Loo ke njé ke ei Juipge lé ooi tà le Paul bè ɓaa, ei rai ranel. Ei rai Kuwe-ɓee Nube oiyo tede tà le’n ke ooi. Dooge malang ke Nube uwe dè nja ndikumgajer se non ɔje’n dè de nga, teli ei njétaakêm-Kristge. 49Tà le Kuwe-ɓee oso se loo mbit-mbit kêm ɓee-bò ke Antioche, ɓeekon ke Pisidie nga. 50Dinyege ke njé ɗɔi Nubege ke ei njényan-kingege ndii kêm ɓee-bò’t nè tɔ. Juipge sulei de se dooge ke kum de unju ke kêm ɓee-bò’t nè nga adi unni gir rai kum Paul se Barnabas ndoo. Dé rɔ Paul se Barnabas kêm ɓeekon’t le de kɔke. 51Nè Paul se Barnabas gegi bubur ke nja de’t gág-gág umi dè’t ɓita ɔti awi kêm ɓee ke Icone ɓai. 52Nè né è bè géa, njékuwe-gir-Kristge ndii se ranel a, Ndil-Kêmnda taa kêm de pel-pel a tɔ.

will be added

X\