NYANRA NJEKAWKULEGE 12

1Kêm ɓaln’t nè nga, ngar Hérode unn gir ra balkum njékebe nange le Nube ke nange ke Jérusalem majelé. 2E ade d’uwe Jacques ngokon Jean dé tɔl’n se kuye kaskar. 3Loo ke è an titeke nyan nè nel Juipge ngain ɓaa, è ade d’uwe Pierre taɓai. E kêm ndɔge ke d’ade ra’n nan ke ɔje dè mapa ke pululu goto tutu. 4Loo ke Hérode ade d’uwe Pierre d’ile’n dangai’t ɓaa, è ade njérɔge dɔg-gidé-mute-mute taai gute nan sɔ-sɔ nja sɔ ngonmi nin tchên. E ndige le tee se’n nata kum kosdooge’t loo ke gir ndɔ ra nan nyan Paque à gang. 5Njérɔge ngonmi Pierre dangai’t tchên. Nè né è bè géa, njékebe nange ɔji tà se Nube adi nunge tcham tede le Pierre. 6Barè lookar’n Hérode ayé tee se’n nata le gangtà dènn’t tàkum kosdooge’t malang. Kêm ndɔ’n nè nga, dé tɔ ji Pierre se sul ɓita too’n ɓi dann njérɔge joo. Tabai d’ade njérɔge ke rang ndai à ngonmi tà kei dangai. 7An! doo ke danrán le Kuwe-ɓee unde loo tee pan ade loo ke kêm kei dangai’t ndogó kotong. Doo ke danrán nè nga unde kàde Pierre ɗe^-ɗe^ ndel’n ede nè: – In dɔ kalang. Ke loon’t nè kuwe, sulge ke dé tɔɔ’n ji’n jɔré nang yɔgrɔm. 8Doo ke danran ede Pierre ede nè: – I tɔ ɓedi se ndar mong a, i tule gabang’t njai’t a tɔ. E ra tite doo ke danrán ede’n nga tɔ. Doo ke danrán nga tel ede’n ede nè: – Ule kubu lei ke bòi yul rai’t ɓaa ɔte goom’t laa. 9Pierre unde loo tee, unn rebe go doo ke danrán’t nga. Nè Pierre ger gir nyan ke doo ke danrán ra nè nga njai lé ɓai. E gir titeke nyan pinde’n karè. 10Loo ke doo ke danrán ei se Pierre deri ra njéngonm tà keige ke desêin se njé ke njèkon’t joo ɓá ɓaa, ei awi teei tu tà kei ke bòi ke ra se nar. Tà kei nè nga aw ke ɓee-bò’t. Tà kei nè nga, è kuwe teen ra’n se dè’n non de’t kété. Taɓai doo ke danrán se Pierre awi teei nata tà rebe karé’t bè. Ke loon’t nè kuwe, doo ke danrán ke Kuwe-ɓee ule’n nga inye Pierre, goto njêl. 11Loo ke kum Pierre gang dè rann’t ɓaa è tam ede: – Kerɔte kuwe, ɗarinè m’ger titeke Kuwe-ɓee kuwe ule doo le’n ke danrán ade ree ɔr’m wont ji Hérode’t. E ree ɔr’m dann nyan ke kos Juipge malang ndii nginei tchên nga a tɔ. 12Pierre ger nyan ke tee dènn’t nga njai. E ɔte aw kêm kei le Marie kon Jean d’ile ri tɔyi’n nè Marc. Njétaakêm-Kristge bule kebi nan kêm kei le Marie ndii à ɔji tà se Nube. 13Pierre geke tàbit kei. Ngonn njèndi ke dinye karé ri’n nè Rhodée ree le kur mbi’n koo. 14E ger njai titeke è ndu Pierre ɓaa, ra’n nel’n ngain ade inye kɔr tà kei ade tò ɓanm. E ɔse wan tel se ngɔde aw ede de ede nè: –Pierre nda tà kei’t nata non. 15Dé tam se Rhodée d’ede nè: – Ké bile rai wa? Nè è tel tam ede nè: – E danra Pierre kuwe. Njétaakêm-Kristge malang tami edi nè: – Bè ɓaa è doo ke danrán ke njèngonm’n. 16Nè Pierre geke tà kei ke kété-kété. Loo ke dé teen tà kei ɓaa, d’an’n. Tà ige de sêl. 17Pierre yei de ji’n le kade d’ebe’t tam tà. E ɔr ser kɔr ke Kuwe-ɓee ɔr’n dangai’t ade d’oo. Pierre tel ede de ede nè: – Ɔri ser nyan nè nga adi Jacques se njétaakêm-Kristge ke rang ooi. Go’t gugu, è unde loo tee aw loo ke rang’t. 18Loo ke loo ar yerer ɓaa, njérɔge awi dè nan’t ngater-ngater edi nè: – Ké Pierre tel ri wa? 19Ngar Hérode Agrippa ade dé sang Pierre patkann nè d’inge’n lé. E ɓar njérɔge ke ngonmi Pierre dangai’t deje de tà’n. Go’t gugu, è ade d’aw se de dé tɔl de ɓita in kêm ɓeekon ke Judée aw kêm ɓee-bò ke Césarée le ndi tutu mbɔr ɓai. 20Wong ra ngar Hérode ngain dè dooge ke ndii kêm ɓee-bò ke Tyr se Sidon. Dooge nè umi tà le de nan’t bɔk le ree kingei nin. Nè d’aw d’inge Blastus, paja le ngar Hérode d’ile’n go de’t pa ɓita d’aw ra Hérode’t dé deje’n kêmlom ɓai. Dé deje’n kêmlom titeke bè tede è se tà rebe ɓeekon le’n nè á nyankinge se nyankusege in-in tutu reei kêm ɓee-bòge ke Tyr se Sidon. 21Ndɔ ke d’ɔje le kinge’n nan nga ase deĵ. Ngar Hérode tule kubu ngar rann’t aw ndii’n dè kutu-ngar gangtà’t. E ede dooge tà se ndu’n ke bòi beng-beng. 22Doobulege umi nin tɔy edi nè: – E Nube á tam tà m è ndu doo ndul karè lé. 23Ke loon’t nè kuwe, doo ke danrán ke Kuwe-ɓee ule’n dar ngar Hérode dikew tede è unn tà ra’n è kuwe nal kule ndubra dè Nube’t. Kêm’n oso kurge ɗɔk-ɗɔk ade oso’n sɔrɔk wei’n. 24Loo ke ngar Hérode wei ɓá ɓaa, tà le Nube ra tɔge ke kété-kété a, taa loo pel-pel a tɔ. 25Loo ke Barnabas se Saul ɔri son kule le de kêm ɓee-bò ke Jérusalem ɓá ɓaa, ei teli reei kêm ɓee ke Antioche, ɓeekon ke Syrie gugu. Jean ke ri tɔyi’n nè Marc nga, Barnabas se Saul reei se’n ji de’t.

will be added

X\