NYANRA NJEKAWKULEGE 10

1Dingem karé bè ndi kêm ɓee-bò ke Césarée, ri’n nè Corneille. E njèkan dè njérɔge ke aru karé. Njérɔge nè nga ei njérɔge le ɓeekon ke Italie. 2Corneille se njékêmkeige le’n malang ilei koje dè Nube’t a, ɓeli Ndil’n a tɔ. E uwe noje se kosdooge malang se ndɔ’n-ndɔ’n. E ɔje tà se Nube se ndɔ karé-karé. 3Ndɔ karé bè, ase kàde mute ke loo sɔlé, nyan pinde’n. Doo ke danran ke Nube ule’n aw goon’t kei ade an’n njai-njai. Doo ke danran le Nube nga ɓar Corneille ede nè: – Corneille! 4Corneille an doo ke danrán kàt-kàt, ɓel unde’n ndàt gang’n ade deje’n ede nè: – Kuwe-ɓee, è ri wa? Doo ke danran ile Corneille dè’t ede nè: – Kɔje tàge se noje-kuwege lei nga awi teei ra Nube’t. Gir’n ke nè á kêm’n olé’n dèi’t ɓila. 5Ɓaa ɗarinè, ule dingemge ade awi Joppé reei se Simon karé bè ke d’ile ri tɔyi’n nè Pierre. 6Simon Pierre nga tò ɓee le Simon karé ke njèkɔr gide ndarge. Simon ke njèkɔr gide ndar nga, kei le’n tò tà ba-kate’t ngɔr. 7Loo ke doo ke danrán ke nda ɔje’n se’n tà ɔte aw ɓá ɓaa, ke loon’t nè kuwe, Corneille ɓar ngann njéndige le’n joo se njèrɔ karé ke ilei koje dè Nube’t. Dooge ke mute ke Corneille ɓar de le kule nga ei dann dooge ke rai kule girn’t mari sár tee ɓila. 8E ɔrgir nyan ke tee dènn’t nè nga kêrêr-kêrêr ade ooi ɓita ule de kêm ɓee ke Joppé ɓai. 9Barè lookar’n, ngann njéndige le Corneille se njèrɔ le’n njiyei sár undei dè ɓee ke Joppé ngɔr. Pierre al dɔ dè kei dur-dur’t le kɔje tà se Nube. Kàde ra le nda dann ɓee ta. 10Ɓo unn gir ra’n ade ndige kuse nyan. Nè loo ke d’ade ra nyan kuse nga bè-bè ɓai ɓaa, nyan tee dènn’t pan ade ndil’n tee an-in soin-soin. 11Pierre an kum danran teen. E an nyan karé in danran jurr ree rise nang. Nyan nè nga tò tite tà kubu ke bòi ke dé tɔ kule dè kumennge ke sɔ. 12Dange ke se ri de-ri de ke nja de sɔ-sɔ, se nyange ke agi nang se helge a tɔ tooi kêm tà kubu ke la’t nè nga. 13Ndu doo karé ɓar Pierre ede’n ede nè: – Pierre, in dɔ, i tɔl nyange nè use! 14Nè Pierre ede nè: – Ḿ-m̀! Kuwe-ɓee, nyange ke pás-pàs éké nyange ke mine ke majelé titeke bè nga m’use nja karé ndan lé ɓai. 15Ndu doo nè nga tel ede Pierre tà njèkon’t joo ede nè: – Nyan ke Nube tel’n ke nyan ke unju nyang-nyang nga, maje kade i ɓar’n nyan ke mine lé. 16Nyan nè nga ree titeke bè nja mute ɓita dé tel’n keng ke loon’t nè d’aw’n danrán gugu. 17Pierre tel ndi giw à girtà dè nyanpinde ke kété an. Ke loon’t nè kuwe, njékulege le Corneille reei teei pan. Ei deji kei le Simon ke njèkɔr gide ndar edi nè: – Ké kei le Simon è ra wa? Ei reei ndai tàbit kei’t nata. 18Njékulege nè nga ɓari ɓar deji tà edi nè: – Ké kei ke nè nga kuwe á è kei mba le Simon Pierre nè wa? 19Pierre ndi à girtà dè nyanpinde’t nè nga ɓai. Ndil-Kêmnda ede’n ede nè: – An! dingemge mute à sangi nin. 20In dɔ kalang, i rise nang aw se de nal tile mbɔr tede è man kuwe á m’ule de. 21Pierre rise nang aw ra dingemge’t nè nga ede de ede nè: – An-in! doo ke a i sangi nin nga, è man á m’nda nè. Ké ri á è gir ree le si wa? 22Ngann njékulege le Corneille edi Pierre edi nè: – E Corneille, kuwe njérɔge ke aru karé á ule jè. E nga è doo ke njè ra nyan se dè naje’n a, è njè ɓel Ndil Nube a tɔ. Kos Juipge bere mbak tami tà le’n maje. Doo ke danran le Nube ede Corneille ede nè: «I ɓar Simon ɓéee lei, oo tàge ke à edi.» 23Pierre aw se njékulege le Corneille kêm kei, ra de mba. Barè lookar’n kuwe, è in aw se de. Njétaakêm-Krist ke nange ke kêm ɓee ke Joppé danni nin awi se’n. 24Ndɔ ke rang ke njè kutu go made ɓaa, dé tee kêm ɓee-bò ke Césarée. Corneille ɓar njénojege le’n se madennge ke è tár de ngain ndii nginei de tchên. 25Loo ke Pierre à ree ke kei ɓaa, Corneille in tile kum’n. E ɔse keje’n nang nonn’t ɗɔi’n. 26Nè Pierre ute’n dɔ ede nè: – In dɔ, tede man géa m’ee doo titi tɔ. 27Pierre ɔje tà se Corneille dɔ-dɔ aw’n se’n kêm kei. E inge dooge ngain ke kebi nan kêm kei le Corneille ndi nginei nin. 28Pierre ede de ede nè: – Sei geri mbak, doo ke è Juip nga d’ɔge’n loo kuwe made nan éké loo kum nan’t bɔk se doo ke è Juip lé. Nè man ɓaa, Nube ndoo’m le kade m’an doo karé bè ke nyan ke raikarè éké ke nyan ke mine lé gar-gar. 29Gir’n ke nè á loo ke sei ɓari man ɓaa, m’in kalang m’ree m m’gak lé. Ɗarinè m’deje sei kade edi man gir nyan ke ulei kule i ɓari man nga. 30Corneille ede Pierre ede nè: – Ase ndɔ sɔ ɗarinè, se kade ke mute ke loo sɔlé tite made bè kuwe, m’ndi kêm kei le’m m’a m’ɔje tà se Nube. An! dingem karé bè ule kubu ke nda káng-káng unde loo tee pan nda nonm’t ede’m ede nè: 31«Corneille, Nube ur mbi’n oo’n tà lei ke ɔje se’n nga. Noje ke i uwe se njéndooge nga géa, kêm’n wei nal dè’t lé a tɔ. 32Ule kêm ɓee ke Joppé, i ɓar Simon karé ke ri tɔyi’n nè Pierre ade ree. E tò kei le Simon ke njèkɔr gide ndar. Simon ke njèkɔr gide ndar nga, kei le’n tò tà ba-bò kate’t ngɔr.» 33Ke loon’t nè kuwe, m’ule m’ɓari ɓaa, i ra maje in i ree tɔ. Ɗarinè jè malang jè ndi non Nube’t le koo tàge malang ke Kuwe-ɓee ule tài’t le kade ede jè nga ta. 34Pierre tel unn tà tam ede nè: – Kerɔte kuwe, ɗarinè m’ger titeke Nube è njè ndête kum doo karé lé. 35Nè se kêm ɓeekonge karé-karé malang nga, nanan ke ɓel’n Ndil Nube, ra nyan se dè naje’n ɓaa, doo nè taa kum’n kuwe. 36Jésu-Krist nga, è Kuwe-ɓee le Juipge se dooge ke rang malang. E è kuwe á ndɔ ke Nube ule’n ra kosdooge ke Israel ade ile mber Tà ke Maje le kêmlom ade de. 37Nyan ke Nube ra kêm ɓeekon ke Judée bere mbak nga, sei geri ɓá. Jésu-Krist unn gir kile mber tà le’n kêm ɓeekon ke Galilée utu’n go mber kule dooge manné njonm ke ndɔ ke Jean ile. 38Jésu ke Nazareth ke Nube ule’n nga, Nube ade’n tɔgmong le Ndil-Kêmnda. Jésu aw se loo-loo ra maje se dooge malang a, aje njé ke sú uwe de a tɔ, tede Nube è der gir’n. 39Nyan malang ke ndɔ ke Jésu ra kêm ɓeekon le Juipge se kêm ɓee-bò ke Jérusalem nga, jè jè njékɔrgo tànnge. E Juipge ke Jérusalem á ndɔ ke ɓeri nin kade kage-ke-dese’t tɔli nin. 40Nè ndɔ ke njèkon’t mute ɓaa, Nube ade unde loo tee dann njé ke koo’t tel ndi kumgajer. Loo ke è unde loo tee dann njé ke koo’t nga, kosdooge malang an-in nin lé. 41Nè è jè njékɔrgo tàge le’n ke Nube tɔr jè kuwe se kar jè bere á j’an’n. Loo ke Jésu-Krist unde loo tee dann njé ke koo’t nga, jè njékɔrgo tàge le’n j’use se’n a, j’an-in se’n a tɔ. 42E Jésu nè nga kuwe á unn ndu’n ade jè le kade j’ile mber j’ade kosdooge. Taɓai è unn ndu’n le kade j’ede kosdooge ndàt titeke è nè nga kuwe á Nube ɔr’n unde’n ke njègangtà le dooge ke ndii kumgajer se njé ke wei ɓá a tɔ. 43E è kuwe á njéribe-dè-tàge ke tà Nube’t malang tami tà ɔji dè’n edi nè: «Nanan ke unde kêm’n dè Jésu’t ɓaa à inge kêm tin mbit dè kaiyage’t le’n takul ri Krist.» 44Loo ke Pierre ndi tam tà tànn’t bè-bè bai ɓaa, Ndil-Kêmnda ree taa kêm dooge ke ndai à ooi tà nè nga pel-pel. 45Juipge ke njétaakêm-Kristge malang ke danni Pierre reei se’n nga, tà ige de sêl. Kerɔte kuwe, Nube ade Ndil-Kêmnda taa kêm dooge ke ei Juipge lé géa pel-pel ɗarinè tɔ ta. 46Juipge ke njétaakêm-Kristge ooi tà tam dooge ke rang ɔji nan tà se njétaakêm-Kristge ke Juipge lé nga pɔt-pɔt ilei riɓar dè Nube’t. 47Pierre tam tà ede nè: – Dooge ke ingei Ndil-Kêmnda titeke jèi j’ingei bè tɔ nga, ké nan ase kɔge kade d’ule de manné njonm wa? 48Pierre unn ndu’n ade d’ule de manné njonm se ri Jésu-Krist. Njé ke d’ule de manné njonm nè nga deji Pierre edi nè: – I ndi se jé ndêin ɓita.

will be added

X\