2 TIMOTHEE 2

1Ngonn’m, i ɓaa, uwe rai mong dè kem̂noje ke in ra Jésu-Krist’t nga. 2Nyange ke ndɔ ke i ndó ram’t tàkum njékɔrgo tàge’t bule nga, inye tà’n ji dingemge’t ke ei ke maje kojege ke asi ndói dooge ke rang. 3Oré se’m nan dè nyankem̂konge’t asenan se njèrɔ ke maje le Jésu-Krist bè. 4Njèrɔ ke rara ke aw ke loo rɔ’t nga à ndɔje ra’n tede nyange ke rang ke è inye goon’t gugu nga lé ta. Titeke bè á à taa’n kum kuwe’n ke njèkan dè njérɔge. 5Njè kan-in ngɔde géa è titeke bè tɔ. Ke nè á an-in ngɔde ndá-loo kan-in ngɔde’t se go gute-ndu sêw lé ɓaa, è asekum kinge jɔkɔ kunn banga nga ndan lé. 6Gar-gar njè ndɔr ule ra’n ndibe kété pa ɓita à inge ko ɓai. 7I girtà dè tàge ke mute nè nga maje an. Kuwe-ɓee à adi gos ger nyan le kade i ger’n gir gute nyange malang ke nain. 8Ade kem̂i olé dè Jésu-Krist ngonnkà David. Jésu-Krist nga unde loo tee dann njé ke koo’t titeke Tà ke Maje ke m’ile mber’n tam’n ndàt. 9E tede Tà ke Maje nè nga m’inge’n nyankem̂konge sár ade dé tɔɔ’m se sul tite njè ra majelé bè. Nè né è bè géa, tà le Nube ɓaa dé tɔ’n lé. 10Gir’n ke nè á m’oré’n tà’m njak dè nyange malang ke tee dèm’t tede le njé ke Nube tɔr de. M’ra titeke bè tede kade dé géa d’inge’n kaje le Jésu-Krist a, se ndubra ke se non a tɔ. 11Tà nè nga è tà kerɔte kuwe: «Ke nè á j’weii se Jésu-Krist nan’t ɓaa, j’à teli ndii kumgajer se’n nan’t tɔ. 12Ke nè á jè ndai dè nja jéi’t njáng se’n ɓaa, j’à j’on-in ɓee se’n nan’t tɔ. Ke nè á jè naji se ra jéi dènn’t ɓaa, è géa à naje se ra’n dè jéi’t tɔ. 13Ke nè á j’ubei go kunn-ndu le jéi j’inyei ɓaa, è è njè kinye go kunn-ndu le’n lé. E asekum naje se ra’n dè kunn-ndu’t le’n lé sár.» 14Olé kem̂ de dè nyange’t nè nga a, i ndeje de non Nube’t le kade d’inye go naje tà ke raikarè. Tede tà najege ke raikarè nè nga à tuju njé ke ooi tà’n se mbi de. 15Ute rai kalang le kade Nube an-in ke njèkule ke dé nan’n d’an’n ɓá ke ra rasɔl lé, nè kai dooge ngarankum tà se go rebe’n. 16Tà najege ke raikarè ke uwei made nan se kundekem̂ lé nga, ute de mbeng kɔke. Tede njé naje tàge ke raikarè nè nga utei Nube mbeng kum de ke kété-kété. 17Tà le de dé dooge nè nga tò asenan se dò ngakɔi ke use ke kété-kété bè. Hyménée se Philète ei dann njé naje tàge’t nè nga tɔ. 18Dé nè nga d’ute ngarankum tà mbeng dé tam d’ede nè: «Kunde loo tee dann njé ke koo’t le jéi der ɓá ta.» Titeke bè á dé ndonm’n kundekem̂ dè Nube’t le njé ke nange nang ndalang-ndalang. 19Nè né è bè géa, gir nyange ke Nube kuwe unde nga ngiring nang ngiring-ngiring. Gir nyange ke Nube unde nga, è kuwe ndang tàge nè dè’t se ji’n ede nè: «Kuwe-ɓee ger njé ke ei le’n mbak. Nanan ke ede nè n’ee le Kuwe-ɓee ɓaa, gar-gar à ute ra’n mbeng kɔke dè nyanra ke se dè naje’n lé.» 20Kem̂ kei ke bòi nga, jó ke dé ra se nar-ɔr se nar-nda à tooi kem̂é se kar de lé. Nè jó kage se jó hanje géa tooi kem̂é tɔ. Jó nar-ɔr se jó nar-nda nga tooi tede ngar kule, jó kage se jó hanje tooi tede kule ke karè ke se ndɔ karé-karé. 21Ke nè á doo karé an go ra’n sêw-sêw ɔje dè nyange ke m’tam tà’n nè nga ɓaa, à tò kasenan se jó ra ngar kule ke tò se ninn’n gai ke rara ke kuwe’n uwe dè nja unde konn le ra’n kule ke maje. 22Ute rai mbeng kɔke dè ngur nyange ke ra basa madige ke rang. I tel ɔr dè nja nyanra ke se dè naje’n, se dè nja kundekem̂, se dè nja tár nan. Ɔr dè nja kem̂lom se njé ke ɓari ri Kuwe-ɓee se ngarankem̂ de ke unju nyang-nyang. 23Tà naje neng-neng ke raikarè nga, ute de mbeng kɔke. I ger mbak titeke tà najege nè nga à oji rɔ nan. 24Gar-gar, ɓer kule le Kuwe-ɓee à è njè ɓeekos lé; nè gar-gar à è njè kaw lom-lom ra dooge’t malang. Gar-gar à è njè ger gos ndó dooge nyan a, njè koré tà’n njak dè kem̂ majelé’t le njé ke rang a tɔ. 25Gar-gar, ɓer kule le Kuwe-ɓee à è njèndó nyan njé naje se’n tàge se ndu noje tede bainléa Nube à ade d’ade tur hal de le ger’n ngarankum tà. 26Titeke bè á, bainléa tàgir ke maje à tel ree dè de’t le kade dé pusuru’n ra de d’ɔr’n tu gum’t le sú ke njè kuwe de ɓer kade dé ra’n nyan ke kem̂’n ndige.

will be added

X\