2 NJE KE THESSALONIQUE 3

1Ngakon jége, nyan ke nain ɓaa, ɔji tà se Nube tede jé le kade tà le Kuwe-ɓee an-in ngɔde kum’n ke kété-kété a, le kade unn banga ade d’ile’n riɓar dènn’t titeke ndɔ ke unn’n banga ɓéee le si nga bè tɔ. 2Ɔji tà se Nube le kade taa jè ji njé kem̂ tɔ kuju tà lége se kem̂ majelége tede ei nè nga malang undei kem̂ de dè Nube’t lé. 3Kuwe-ɓee è njègel goto: è à ade a i ndai dè nja si’t njáng a, à an dè si sêw-sêw le kade njè kem̂ majelé gang kɔte si’t lé. 4Kuwe-ɓee ade j’um kem̂ jé dè si’t bɔk-bɔk: nyan ke j’unn’n ndu jé j’ade sei tede nga, sei i rai ɓá a, a i rai kum si ke kété-kété ɓai a tɔ. 5Maje kade Kuwe-ɓee ade i tári Nube dè ɓengre si’t. Maje kade i ndai njáng dè kum nan’t bɔk se Krist. 6Ngakon jége, j’unn ndu jé j’ade sei se ri Kuwe le jéi Jésu-Krist: Utei ra si mbeng ra njètaakem̂-Kristge ke rai dabe a, ke mbati kumi kem̂ de dè nyan-ndó ke ndɔ jè ndó de’t nga lé. 7Gar-gar, sei ɓaa, i geri gos ndaje kum jé mbak ɓá ta: kété ke ndɔ ke jè nain dann si’t ɓai nga, jè njé ra dabege lé. 8Doo karé bè géa ndɔ ke ade jè mapa j’use karè lé. Nè j’ule ra jé ndibe, jè ra kule j’ɔr yàl-yàl ndɔ a, kada a tɔ. Jè ra titeke bè tede le kɔi’n dè doo karé dann si’t lé. 9Kerɔte kuwe, j’asekum kinge nyankul ra jé ji si’t gar-gar. Nè j’inye ra jé j’ade le kade è nyan ndaje kum le si. 10Taɓai, kété ke ndɔ ke jè nain se si nú nga, j’unn ndu jé j’ade sei j’ede nè: «Ke nè á doo karé ndige ra kule lé ɓaa, maje ebe ra’n kuse nyan tɔ.» 11Taɓai, jè j’oo titeke njé ke nange dann si’t ei njé ra dabege. Kule ra de ke rang goto, nè ei njé kunde ra de nyan’t le dooge ke rang. 12Dé dooge nè nga, jè ndeje de, taɓai j’unn ndu jé j’ade de se ri Kuwe-ɓee Jésu-Krist: maje kade ei kuwe rai kule se tà de ke mundu a, usei nyankinge de ei kuwe a tɔ. 13Sei ngakon jége ɓaa, adi ra si ate sei dè nyanra ke maje’t nga lé. 14Ke nè á doo karé ile koje dè tà’t le jé ke j’ede sei kem̂ magtub’t nè nga lé ɓaa, undei kum si goon’t tênn-tênn, utei ra si mbeng rann’t kɔke tede kade ra’n sɔl’n ade ndii’n gugum. 15An-in nin asenan se njèban le si lé, nè i ndángi nin tite ngokon si bè. 16Maje kade è Kuwe-ɓee ke njè kem̂lom kuwe ade sei kem̂lom se ndɔge malang se loo malang. Maje kade Kuwe-ɓee nain se si malang. 17Man Paul kuwe m’ra sei lapya se ji’m. E ke nè á è nyan-tɔje kem̂ magtub’t le’m karé-karé malang ke m’ndang nga. 18Maje kade kem̂-maje le Kuwe-ɓee le jéi Jésu-Krist nain se si malang.

will be added

X\