2 NJE KE THESSALONIQUE 1

1Man Paul se Silas se Timothée, jè ndang magtub nè j’ule’n j’ade njékebe nange le Nube Bɔ jéi se le Kuwe-ɓee le jéi Jésu-Krist ke ndii kem̂ ɓee-bò ke Thessalonique. 2Maje kade Bɔ jéi Nube se Kuwe-ɓee le jéi Jésu-Krist adi sei kem̂-maje se kem̂lom. 3Ngakon jége, gar-gar jè ra Nube oiyo se ndɔge malang tede si. Ra ke jè ra’n oiyo bè nga, è loon’t kuwe tede kundekem̂ dè Nube’t le si se tár ke sei malang i tári nan nga in dè made’t ke kété-kété. 4Dè jé in tchakm tede tà le si dann njékebe nange’t le Nube tede koré tà njak dè kundekem̂ le si dann nyankumndooge se nyantosowurge ke rai sei. 5Nyankumndooge se nyantosowurge nè nga ei nyan-tɔje titeke ndɔ gangtà’t ke se dè naje’n le Nube ɓaa, sei asikum kingei konɓee le’n ke kum si ndi à ra’n ndoo. 6Nube à ra nyan ke se dè naje’n: njé ra se si nyantosowurge nga, Nube à ra se de nyantosowurge gute made’t le si tɔ. 7Sei ke dé ra se si nyantosowurge nè nga, ndɔ ke kuwe jéi Jésu à in danrán le kunde loo tee pan se dooge le’n ke njé tɔgmong-ge ɓaa, Nube à ade a i taai kebe se jé nan’t tɔ. 8Kem̂ ndɔn’t nè nga, kuwe jéi Jésu à ade kure nyanra njé ke geri Nube lé se njé ke ilei koje dè Tà ke Maje’t le kuwe jéi Jésu-Krist lé à ɔde kum de. 9Dé nè nga, kure nyanra de ke à ɔde kum de nga, è tuju ke se non a, d’a ndi heb tàkum Kuwe-ɓee ke tɔgmong le’n dum dè loo. 10Kuwe-ɓee Jésu à tel ree le kade njé ke le’n ilei riɓar dènn’t a, le kade njétaakem̂nge malang à an-in nin njai-njai kem̂ ndɔn’t nè nga. Sei géa a k’ei dann de’t tede umi kem̂ si dè tà’t ke ndɔ ke j’ede sei. 11Gir’n ke nè á j’ɔje’n tà se Nube se ndɔge malang tede si. Jè deje Nube le jéi le kade ade nyanra si uwe made nan se ndikumgajer se non ke è ɓar sei tede nga. Maje kade ra se si se go tɔgmong le’n ade i rai nyange malang ke maje ke i ndigi rai. Maje kade Nube ade i ndii kum dè ra kule dè kundekem̂’t le si. 12Titeke bè á a ilei riɓar dè ri Kuwe-ɓee’t le jéi Jésu a, è géa à ile riɓar dè si’t a tɔ. Nyan nè malang è noje le Nube le jéi se noje le Kuwe-ɓee Jésu-Krist.

will be added

X\