2 PIERRE 3

1Kótarge le’m, magtub ke m’ndang nè nga, è njèkon’t joo. Kem̂ è ke kété’t se è ke ɗarinè, m’ndige le kolé kem̂ si kade tàgir le si aw maje dè nyange ke ndɔ ke m’ndó sei nga. 2M’ndige le kade kem̂ si olé dè tàge ke njéribe-dè-tàge ke tà Nube’t ke tooi se ninn de tami kété nga. M’ndige le kade kem̂ si olé dè ndukunn’t ke ndɔ ke njékawkulege le Kuwe-ɓee njèkaje jéi ndó sei kété ɓá nga a tɔ. 3Gar-gar, maje kade i geri nyange nè kété ɓita kade ndɔ’n ree ɓai. Njé sɔke looge à undei loo teei le ringei se tà sɔke loo titeke kem̂ de ɔje, 4à tami kedi nè: «Ndɔ ke Jésu unn ndu’n ede nè n’a n’tel ree. A ɓaa, ké tel ree le’n nga à è ndɔ ke ra’t wa? Tede bɔ jége weii ɓá, nè nyange malang tooi se loo tò de titeke mari desêin loo kunde gir nyange’t nga kuwe ɓai.» 5Nè njé sɔke looge nè nga ndigi kade kem̂ de wei nal sêl dè nyan ke ndɔ ke tee. Kem̂ de wei nal sêl titeke kété mari Nube unde danrán se go tà ke tee tànn’t. Nube ade nang unde loo tee dann mann’t a, Nube ube nang se mann a tɔ. 6Mann nè nga ndɔ ke in pujur dè dooge ke dè nang nè ndum’n de ndarak se go tà ke in tà Nube’t kuwe ɓai. 7Nè danran se nang ke ɗarinè nga, Nube unde de konn se go tà ke in tànn’t kuwe ɓai ngine’n ndɔ ke à gang’n tà dè njékaltàge le tuju’n de kɔke. Ndɔ’n nè nga, danran se nang nè géa por à ró de rák-rák a tɔ. 8Kotárge le’m, adi kem̂ si wei nal dè tà’t nè nga lé: Ndɔ ke karé bere nga tò asenan se ɓal aru dɔg a, ɓal aru dɔg nga è tite ndɔ ke karé bere tàkum Nube’t a tɔ. 9Kuwe-ɓee tile mbɔr dè ndukunn ke ɔje dè ndɔ tel ree le’n titeke njé ke nange giri nga lé. Nè è ile kem̂’n pon dè si’t tede è ndige le kade doo karé bè géa dann si’t tuju lé. E ndige le kade dooge malang ɔsi wan teli turi hal de. 10Ndɔ tel ree le Kuwe-ɓee nga à è tite ndɔ ree le njèɓog bè. Kem̂ ndɔn’t nè nga, danran à ndubu tong-tong le kɔte goto njêl karè. Nyange malang ke danrán à leein larr-larr. Nang nè se nyange malang ke tooi tutu nga, por à ró de rák-rák a tɔ. 11Titeke nyange malang à leein larr-larr le gotoi njêl karè nga, gar-gar ilei koje dè Nube’t a, adi pa njiye si se nyanra si tò se ninn’n gai a tɔ. 12Sei ndii i nginei le kade ndɔ le Nube ree kalang. Ndɔ nè nga, por à ró danrán rák-rák kade goto. Nyange malang ke kem̂ danran’t nga, por à leen de larr-larr a tɔ. 13Nè jè ndii jè nginei danran ke kige se nang ke kige se go ndukunn ke Nube unn ade jèi nga. Danran ke kige se nang ke kige nga, nyanra ke se dè naje’n à on ɓee tutu. 14Gir’n ke nè á, kotárge le’m, uwei ra si mong, i ndii i nginei ndɔ le Nube. I rai titeke bè le kade Nube ree inge sei se ra si ke unju nyang-nyang, nal kade tà karé uwe dè si nonn’t. Ke nè á ra si unju nyang-nyang a, tà karé géa uwe dè si nonn’t lé a tɔ ɓaa, a i ndii se’n se kem̂lom kuwe. 15An-in! kem̂kile le Kuwe-ɓee Nube nga á è gir kaje le si. E ke nè á è tà ke ndɔ ke ngokon jéi Paul ke è kotár le jéi ndang’n magtub ede’n sei tà nè ɓá. E ede sei tà nè se kumkunju ke Nube ade’n. 16Kem̂kile le Nube nga, Paul tam tà’n kem̂ kem̂ magtubge’t le’n malang ke è ndang loo ger gir tur ngain. Dooge ke nyanger le de ase lé a, ke nja de uwe nang ba lé a tɔ nga, ei turi tàge nè ilei gel titeke ei rai se gute Magtubge le Nube ke rang tɔ. Dooge nè nga rai titeke bè tuji ra de ei kuwe. 17Sei geri tà nè kété ɓá. Bè ɓaa, kotárge le’m, undei kumkunju dè ra si’t nè bainléa njékaltàge à ndonmi sei nang ndalang dè nda njáng’t le si se sútàge le de nga. 18Awi kum si ke kété-kété dè noje’t a, se dè ger Jésu-Krist Kuwe-ɓee le jéi ke njèkaje jèi nga a tɔ. Maje kade riɓar è le’n ɗarinè sár se non. Maje kade è titeke bè kuwe.

will be added

X\