2 PIERRE 2

1Njé tête tà kunde tà Nube’t nga, ndɔ ke kété undei loo teei dann kosdooge’t ɓá. Ɓila géa njéndó dooge nyan ke lanmge à undei loo teei pan dann si’t titeke bè tɔ. Dé nè nga, d’a d’unn nyan-ndóge ke gai pat kule dann si’t le tuju’n sei. D’ade mbate Ngar Jésu ke njèkuge dè de. Gir’n ke nè á d’a dé ɓar’n tuju kalang d’ile’n dè de’t. 2Dooge bule à ndolèi go nyanra pás-pàs le de. Dooge ngain à nedi nyanra si se tà tam si tede nyanrage ke pás-pàs. 3D’a gol dè tàge gai-gai le libe’n kum si. D’a ra titeke bè tede kite’n dè si’t se go ngur nar ke ra de. Nè tà ke dé gang dè de’t mari bere nga, kure’n à ɔde kum de m tuju inye go de lé sár. 4Dooge ke danrán ke ndɔ ke rai majelé nga, Nube ngonm de rann’t lé. Nè è inye de ade dé tɔ de se sul d’um de kem̂ bolè ke ndul ndin-ndin ngine’n ndɔ gangtà. 5Dooge ke njé ra majelége ke kété mari ndii dè nang nè nga, Nube inye de lé. Nè è ade mann bêlm in pujur dè nang nè ndum de ndarak. Nè ndɔ ke Nube aje dooge sɔsɔ bere. Noé njè kile mber nyanra ke se dè naje’n è dann dooge ke sɔsɔ nè nga tɔ. 6Ndɔ ke Nube gangtà dè ɓee-bòge ke Sodome se Gomorrhe ade por ró dooge ke ndɔ ke ndii kem̂ ɓee-bòge nè nga rák-rák ade teli ei bu. E ade ɓee-bòge nè nga teli ei nyan-tɔje tede le dooge ke njékaltàge ke ndɔ ke rang. 7Lot è doo ke njè ra nyan se dè naje’n. Wur’n ndir’n njàk-njàk tede nyanrage ke bann-bann le dooge. Nube ɔr Lot dann de’t aje’n. 8Lot è doo ke njè ra nyan se dè naje’n, nè è ndi dann dooge ke njé ra majelége nè nga se ndɔge malang tede nyanrage ke pás-pàs ke è an se kum’n a, oo tà’n se mbi’n a tɔ. 9Kuwe-ɓee Nube ger loo kɔr njé ke ilei koje dènn’t dann nyan ke à nan de. Nè è ger loo kunde njé kem̂ majelége konn le ngine’n ndɔ gangtà. Ndɔ nè nga, kure nyanra de à ɔde kum de labi-labi. 10Dooge ke ulei ra de mbiriri dann ngur nyange ke majelé le danra nga minei tanm-tanm tàkum Nube’t. E dé nè kuwe mbain á Nube à gangtà dè de’t. Dé dooge ke njé nede tɔgmong le Nube. Dé njé tà turge ke d’an ra de ke dooge ke asi. Dooge ke danrán ke ndubra le Nube gan dè de wak nga géa, dé d’ile koje dè de’t lé a, dé taje de a tɔ. 11Dooge ke danrán ke tɔg de se tɔgmong le de ngain dum dè doo made dege géa gangi tà dè de’t non Kuwe-ɓee’t lé a, taji de lé a tɔ. 12Dé dooge nè nga, dé ra nyan nal gir tite dange ke dé ndon ɓaa, d’uwe de se gum a, dé tɔl a tɔ bè. Nyan ke dé gir njai lé géa, d’in dé tam tà ke majelé dè’t. Yo de à tò tite le dange ke walé bè tɔ. 13Nyanra ke se dè naje’n lé le de nga, kure’n à ɔde kum de ɓai. Nyanrage ke pás-pàs ke d’ule ra de tutu mbiriri dann kada ndái-ndái nga, d’an ke nyan ranel le de. Dé dooge ke ra de ɔr ɓál a, mine a tɔ, loo ke dé ndii’n se si tà nyankuse tár nan’t. Libe ke dé libe kum si loo nyankuse’t nga, d’an ke nyan ranel. 14Kum de tò dè kaiya-dinyege’t kakak a, d’aw kum de ke kété-kété dè ra majelé’t a tɔ. Dooge ke nange ke nja de uwe nang ba lé nga, dé leŝe de leŝ-leŝ. Dé dooge ke njé nede nyange. Ndutɔr le Nube goto dè de’t. 15Dé njé njé tête tà kunde tà Nube’t nè nga, dé ndem tede d’inye go rebe le de ke danné sêw, dé ndolè’n go Balaam, ngonn le Béor. Balaam nga ndɔ ke d’ade’n nar tede ra’n nyan ke majelé. 16Nè d’in se’n dè kaltà’t le’n. Kon koro unn gir tam tà se Balaam njèribe-dè-tà ke tà Nube’t ɔge’n dè nyanra mbe’t le’n. 17Dé dooge nè nga dé tite bolè mann ke mann ii tutu san-san bè a, dé tò asenan se bum ke ɗise tunn-tunn ke nel bò ɔr’n aw se’n bè a tɔ. Nube uwe dè nja loo ke ndul ndin-ndin unde konn ngine’n de. 18Njé tête tà kunde tà Nube’t nè nga leŝi dooge ke nange ilei de dann ngur nyange ke pás-pàs se tàge ke raikarè ke oji nan tà de’t pɔt-pɔt. Njé ke dé leŝe de d’ile de dann ngur nyange ke pás-pàs nè nga, ei dooge ke ɔri ra de dann njé ndemge’t ngɔr nè ɓai. 19Dé dooge nè nga, d’unn ndu de d’ade njé ke ɔri ra de dann njé ndemge’t ngɔr nè ɓai nga, d’ede de titeke n’a n’adi à ndii dè de pal. Nè dé kuwe géa, dé ɓerge le nyange ke à tuji de. Kerɔte kuwe, nanan géa è ɓer le nyan ke dum dè’n. 20Dooge ke kété ɔri ra de dann nyange ke mine ke dè nang nè takul ger ke geri Jésu-Krist Kuwe-ɓee njè kaje jèi njai nga. Dooge nè nga, ke nè á teli ulei ra de dann nyange ke mine’t adi on-in ɓee dè de’t ɓai ɓaa, ndɔn’t à majelé dè de’t ngain dum ke kété. 21Kade dé ger rebe ke danné sêw nga lé è soo’t dum kade dé ger ndukunn ke tò se ninn’n le Nube ke ndɔ ke dé ndó de nga d’inye d’ɔse wan dé tel. 22Gostà ke get ke dé tam d’ɔje’n dè de d’ede nè: «Bise tel on tɔmon le’n» a, «kɔsnyon ndogo mann, nè mbɔr ɓaa tel aw ɓeɓel ra’n dann bɔr’t ɓaɓel-ɓaɓel» a tɔ nga, aw loon’t deĵ.

will be added

X\