2 PIERRE 1

1Man Simon Pierre ɓer le Jésu-Krist a, se njèkawkule le’n a tɔ. M’ndang magtub m’ade njé ke undei kem̂ dè Jésu’t titeke j’unde’n kem̂ jéi dènn’t nga a tɔ. Kundekem̂ ke gate’n è ngain ke tɔje ndá Nube ke njè ra nyan se dè naje’n a, tɔje ndá Jésu-Krist ke njèkaje jèi a tɔ. 2Sei geri Nube a, sei geri Kuwe-ɓee le jéi Jésu nga maje a tɔ. Maje kade adi kem̂noje se kem̂lom le si in-in dè made’t ke kété. 3Kuwe-ɓee Jésu nga ade jèi nyange malang ke j’awi ndoo’n se go tɔgmong le’n le kade jè ndii kumgajer a, j’ilei koje dè Nube’t a tɔ. Kuwe-ɓee Jésu-Krist ade jè geri nin è ke njè ɓar jèi kade j’oréi nan se’n dè ndubra’t le’n a, dè tɔgmong’t le’n a tɔ. 4Takul ndubra se tɔgmong nè á j’ingei nyan-majege ke bòi ke gate de è ngain ke ndɔ ke Nube unn’n ndu’n le kade jèi nga. E ade sei nyan-majege nè nga titeke bè tede kade ngur nyange ke majelé le nang nè tuju’n sei lé, nè le kade i teli seii girkoje le Nube. 5Gir’n ke nè á utei ra si kalang le rɔti nyanra ke maje tà kundekem̂’t le si. Taɓai utei ra si kalang le rɔti gos nyanger tà nyanra ke maje’t a tɔ. 6Utei ra si kalang le rɔti kunde kumkunju dè ra’t tà gos nyanger’t. Utei ra si kalang le rɔti korè tà njak tà kunde kumkunju’t dè ra’t a, utei ra si kalang le rɔti kile koje dè Nube’t tà koré tà njak’t a tɔ. 7Utei ra si kalang le rɔti kan nan ke ngakon nange tà kile koje dè Nube’t a, i rɔti tár nan tà kan nan ke ngakon nange a tɔ. 8Ke nè á awi se nyange nè nga adi tooi ra si’t ndàj-ndàj ɓaa, dabe ger gel Kuwe-ɓee le jéi Jésu-Krist à ra sei lé, nè à adi a i geri gel Kuwe-ɓee le tel taai nan se’n tcha-tcha. 9Doo ke aw se nyange nè nga lé ɓaa, è njè kum libe ke tò asenan se njèkumtɔ ke manm loo mem̂-mem̂ bè. Doo nè nga kem̂’n wei nal sêl dè majelége ke mari ke d’ɔr’n tutu nga. 10Gir’n ke nè á ngakonmge, utei ra si kalang ke kété le nda njáng dè ɓar ke Nube ɓar sei’t a, dè kɔr ke è ɔr sei unde sei se ninn si nga a tɔ. Ke nè á i rai nyange nè nga malang ɓaa, nyan karé géa à tuge sei kile sei ndan lé. 11Titeke bè á Nube à ɔr’n tà rebe kaw kem̂ konɓee ke à tò sár se non le Jésu-Krist Kuwe-ɓee le jéi ke njèkaje jèi kinye wei bendeng kade jèi. 12Gir’n ke nè á m’ndi m’olé’n kem̂ si dɔ-dɔ dè nyange’t nè nga. Sei geri nyange nè nga ɓá, sei i bai nja si nang dè ngarankum tà’t nga a tɔ, ade m’ger mbak kuwe. Nè né è bè géa, m’a m’olé kem̂ si dè’t kuwe. 13M’an titeke è nyan ke kum ra kuwe. Loo ke m’ndi se ndi kumgajer dè nang nè ɓai nga, m’a m’olé kem̂ si dè nyange’t nè nga kuwe. 14Jésu-Krist Kuwe-ɓee le jéi ade m’ger ɓá titeke nain ngɔr ɓaa, danra’m à inye nang nè ta. 15Nè né è bè géa, m’a m’ute ra’m kalang le kolé kem̂ si se ndɔ karé-karé dè nyange’t nè nga tede kade né m’wei géa, kem̂ si weii’n nal dè nyange’t nè nga ndan lé. 16Ger ke ndɔ ke j’adi i geri tɔgmong a, se ndɔ tel le Jésu-Krist Kuwe-ɓee le jéi nga, jè ndolé’n go kumkunju le sútàge lé. Nè j’ɔrgo nyange nè nga j’ade sei tede ndubra le’n ke ndɔ ke jè kuwe j’an se kum jé. 17Jésu-Krist oo ndu Nube njè ndubra ke bò loo ke ndɔ ke inge’n inge’n riɓar se ndubra ra Bɔ’n Nube’t. Ndɔ ke Nube tam nè: «E nè nga è Ngonn kem̂’m ke m’tár’n ngain a, ra’m nel’m dènn’t ngain a tɔ.» 18Jè géa, j’oo ndu Nube ke tam tà danrán nú nga se mbi jé loo ke ndɔ ke jè nda’n se Jésu-Krist dè mbal ke tò se ninn’n nga. 19Tà ke njéribe-dè-tàge ke tà Nube’t tami kété mari ɔji dè Krist nga, è tà kerɔte kuwe. Sei géa, maje kade i tɔsi kum si dè tà’t nè nga tɔ. Tà nè nga tò asenan se por lampe ke ndogó loo ke ndul’t bè. Por lampe nè nga ndogó sár ade mbonron unde’n loo tee’n a, ade loo ar’n dè ɓengre si’t a tɔ. 20I geri tà nè nga maje kété ɓita: Tà ke tò kem̂ Magtub ke tò se ninn’n ke njéribe-dè-tàge ke tà Nube’t ɔri gir nga, è tà ke ei kuwe in-in se dè de ɔri gir lé. 21Oiyo, tà ke in tà Nube’t nga è se go kem̂ndige le doo karé ndan lé. Nè Ndil-Kem̂nda á ɔse dooge balang-balang ade ilei mber tà ke in tà Nube’t.

will be added

X\