2 NJE KE CORINTHE 9

1Tà ke ɔje dè nyan-noje ke le ra’n se njétaakêm-Kristge nga, m’ebe ra’m ndang magtub kade sei ke dè nan’t, nan’t. 2Oiyo, m’ger rakɔlé le si kuwe. Gir’n ke nè á dè’m in’n tchakm non dooge ke kêm ɓeekon ke Macédoine ade m’ede’n de m’ede nè: «Njé ke kêm ɓeekon ke Achaie uwei dè nja nyan-nojege le de mari kál laa bere.» Njé ke nange bule dann de’t ndaji kum si dè rakɔlé’t le si nè nga tɔ. 3M’tam m’ede nè i ndi dè nja si’t tchên mari bere. Gir’n ke nè á m’ule’n ngakon jéige ra si’t tede kade pite ke jè pite sei tàkum de’t nga tel è nyan ke non-non karè lé. 4Ke nè á dooge ke kêm ɓeekon ke Macédoine awi se’m nan’t á an-in titeke uwei dè nja ra si titeke m’tam’n nga lé ɓaa, à è rasɔl tede le jé. Sei géa à è rasɔl ngain tede le si dum jè ɓai. 5M’an è soo’t kade ngakon jéige nè awi kété nonm’t ingei sei tede kade i gɔli dè nyan-nojege ke sei unni ndu si dè’t kété nga. Uwei dè nja nyan-nojege nè nga kété. Titeke bè á d’a d’an’n titeke sei rai nyan-nojege nè nga se kêmnda káng m se kêmkein lé. 6Doo ke dubu nyan ndêin bè ɓaa à uje ndêin bè tɔ. Doo ke dubu nyan ngain ɓaa à uje ngain tɔ. 7Maje kade nanan géa unn nyan ade titeke kêm’n ɔje anje kêmkon a, nal kade d’unde dènn’t tá ra’n a tɔ. Tede Nube tár doo ke unn nyan ade se ranel. 8Nube aw se tɔgmong le kade sei nyange malang kade taa ra si pel-pel se ndɔge-ndɔge. Titeke bè á sei a kunni tà nyange malang ke tò ra si’t ram-ram kuwei noje se njé ke rang. 9Dé ndang kêm magtub’t d’ede nè: «E kai nyan-majege le’n. E uwe noje se njé ndooge se kêmnda káng. Nyanra ke se dè naje’n le’n tò sár-sár se non a tɔ.» 10E Nube ke njè kade ko nyan njèdubu nyan a, ade’n nyankuse’n a tɔ nga, à ade sei ko nyan kade in dè made’t ke kété-kété a tɔ. E kuwe à ade nyanra si ke se dè naje’n à aw kum’n ke kété-kété. 11Nube à ade sei nyange kade tò ra si’t ndàj-ndàj tede kade uwei noje se kêmnda káng. Titeke bè á dooge bule à teli rai Nube oiyo tede nyan-noje le si ke j’à j’aw’n le kade de nga. 12Nyan-noje ke sei rai tede le njétaakêm-Kristge ke Jérusalem nga à ra se de ɔje dè nyange ke nal de á go karé lé. Nè nyan-noje nè nga à ade dooge bule dann de’t à teli rai Nube oiyo kum de ke kété-kété kuwe ɓai. 13Kule ke sei rai nè nga ade dooge geri sei ke njétaakêm-Kristge ke get. Sei tɔji de titeke ilei koje dè Tà ke Maje’t le Krist kuwe. Sei uwei noje se njétaakêm-Kristge ke Jérusalem a, se dooge ke rang malang a tɔ, se kêmnda káng. Gir’n ke nè á à rai Nube oiyo ngain tede tà le si ɔje dè nyange nè malang ke sei rai ɓá. 14Njétaakêm-Kristge ɔji tà se Nube tede le si. Kêm de tò dè si’t tchên tede noje ke bò ke Nube uwe se si. 15Ade jè rai Nube oiyo tede kêmnoje le’n nga dum kɔrgir!

will be added

X\