2 NJE KE CORINTHE 8

1Ngakon jége, jè ndige le kade an-in noje ke Nube uwe se njékebe nange le Nube ke ɓeekon ke Macédoine. 2Njékebe nange le Nube ke Macédoine nga, nyantosowurge gai-gai ra de a, ndoo al dè tɔge de a tɔ. Nè né è bè géa oréi dè nang gan uwei noje se go dege se non dege se kêmnda káng. 3Ei kuwe in-in se go kêmndige le de adi nyan-noje se go tɔg de adi al dè tɔg de gée ɓai. M’an nyan nè se kum’m. 4Dé deje jè kaber-kaber le kade j’inye loo j’ade dé ra nyan-noje tede njétaakêm-Kristge ke Jérusalem. 5Dé ra nyan-noje nè nga d’ade al dè è ke j’ɔje kêm jé’t kété. D’unn ra de dé kuwe d’ade Nube kété pa ɓita d’ade jè ɓai se go kêmndige le Nube. 6Jè ndeje Tite le kade ra se si ade i tɔli tà kule tann nyan-noje ke ndɔ ke è unn gir ra dann si’t kété nga mbas. 7Sei ingei nyan malang adi ase sei nák-nák: Sei baw-kundekêmge a, sei baw gos nyanger a tɔ. Ra si olé pêl-pêl dè nyange’t malang a, dè tár ke sei tári jè a tɔ. Jè ndige kade awi kum si ke kété-kété dè noje kuwe’t nè nga. 8E ndukunn á m’unn m’ade sei lé. Nè è ser rakɔlé le dooge ke rang á m’unn ke nyan-tɔje le kade i teri tár nan le si an-in ké è ngarankum tár nan ke get kuwe wa? 9Sei geri kêmnoje le Kuwe-ɓee le jéi Jésu-Krist nga mbak. Jésu-Krist nga è baw, nè è tel ra’n ke njèndoo tede tà le si. E ra titeke bè tede kade ndoo le’n tel è nyanbaw le si. 10E tàgir le’m á m’unde non si’t ɔje dè tà nè kade è soo si’t. Sei kuwe sei dooge ke desêin ke kál laa undei gir tann nyan-noje nè nga se go kêmndige le si. Kule nè ke unni gir ra’n kál laa nga, maje kade i rai ɔri son’n njêt. 11Ɗarinè, maje kade i rai nyan nè nga i tɔli mbas se go nyan ke tò ji si’t. I rai se rakɔlé se go kêmndige le si titeke kál laa i rai nga bè tɔ. 12Loo ke doo unn nyan ke tò jinn’t ade se go kêmndige le’n ɓaa, Nube taa nyan nè jinn’t se ranel m ɔr se’n nja nyan ke tò jinn’t lé. 13M’tam bè le kade i kebi nyankinge si mbak adi njé ke rang i sɔli kêm de ɓaa, sei tá i teli i ndii dann kumndoo’t lé. Nè m’ndige kade i kayai nyankinge le si adi njé ke rang adi asenan deĵ-deĵ. 14Ɓila ingei nyange ram-ram. Maje kade unni tà nyankinge le si ke al dè ji si adi njé ke rang ke nyan nal de. Ndɔn’t ei géa à unni tà nyankinge le de ke al dè ji de le rai se si dè nyange ke awi ndoo de. Titeke bè á a i teli kasinan deĵ-deĵ, 15se go tà ke kêm Magtub’t le Nube ke tam ede nè: «Doo ke ndɔ ke ɔi nyankuse ngain nga, nyan al dè ji’n lé a, doo ke ɔi nyankuse ndêin bè nga géa, nyankuse nal’n lé a tɔ.» 16Ra Tite olé pêl-pêl dè ra se si’t titeke m’ra’n se si bè tɔ. Nube ke njè kade ra’n ɔlé pêl-pêl nga, m’ra’n oiyo ngain. 17Jè deje Tite le kade aw ɓéee le si an sei. Ke loon’t kuwe, è in se ra’n se go kêmndige le’n aw se rakɔlé. 18J’ule ngokon jé karé j’ade aw se Tite nan’t. Ngakon jé nè nga, njékebe nange le Nube malang piti nin ɔje dè mber Tà ke Maje ke ile ade de. 19Taɓai, njékebe nange le Nube ɔri ngokon jé nè nga ke njèmade kaw mba le jé. Mba ke j’à j’aw nga ɔje dè kaya nyan-noje ke dé tann tede le njétaakêm-Kristge ke ndii nú. Jè ra kule nè nga tede tà le si titeke bè tede kade dooge ilei riɓar dè Kuwe-ɓee’t a tɔ. 20Dé tann nar ngain d’um ji jé’t. J’unde kumkunju dè ra jé’t le kade doo karé bè géa ule tà gir jé’t ɔje dè nar nè nga lé. 21Jè gir kêm jé’t le ra nyan ke maje tàkum Nube’t á se kar’n lé, nè jè gir kêm jé’t le ra nyan ke maje tàkum dooge’t tɔ. 22J’ɔr ngokon jé karé ke rang ɓai j’ade aw se de nan’t tɔ. Ngokon jè nè nga ra’n ɔlé pêl-pêl ade j’an se kum jé nja bule. Nè ɗarinè, ra’n ɔlé dum ke kété ɓai tede nda ke è nda kêm’n káng dè si’t. 23Tite ɓaa, è made-loo-kaw le’m. E made-kule le’m ke ra se’m kule nan’t-nan’t tede le si. Ngakon jéige ke dannii nga, è njékebe nange le Nube á ulei de. Dé ndi d’ade ra kule tede riɓar le Kuwe-ɓee. 24I tɔji de adi d’an titeke i tári de kerɔte kuwe tàkum njékebe nange’t le Nube malang. Titeke bè á dè jé à in’n tchakm. Taɓai, ngakon jéige nè à geri titeke jè pite sei tàkum de’t se ndáng karè lé

will be added

X\