2 NJE KE CORINTHE 7

1Ngakonmge, Nube kuwe unn ndu’n ade jèi titeke bè. Bè ɓaa, ade j’utei ra jéi mbeng dè nyange malang ke mine le danra a, le tàgir a tɔ. Adi jè tooi se ninn jéi tede jèi dooge ke jè ɓeli Nube. 2Adi jè kêm si. Jè nga jè ra majelé se doo karé bè lé a, jè tuju nyan le doo karé bè éké j’ube maje dè doo karé’t lé a tɔ. 3M’tam tà nè nga bè tede kile’n tà dè si’t lé. M’ede sei kété ɓá m’ede nè: Ɓengre’m à ɔr dè si’t lé sár kade m’weii’n. 4M’nda kêm’m káng dè si’t a, dè’m in tchakm tede tà le si a tɔ. M’ndi se kêmsɔl lom a, ra’m nel’m ngain dann nyantosowurge’t malang ke ra jè. 5Loo ke ndɔ ke jè tee kêm ɓeekon ke Macédoine nga, j’inge loo taa kebe ke ndêin bè ndɔ karé ndan lé. Nè nyantosowur an-in dè jé king-king se loo malang. Dooge an-in dè jé king-king ade ɓel rusu kêm jé njin-njin. 6Nè Nube ke njè sɔl kêm dooge ke ulei dè de sɔl kêm jé takul ree le Tite. 7Ree le Tite kuwe go karé bere á kêm jé sɔl’n lom lé. Nè nyan ke ule dingem kêm jé’t ngain ɓaa, è kêm sɔl lom ke è inge ra si’t. E ree ede jè titeke ngur tel kan kum’m ra sei pênn-pênn ade i non-in tede’m ngain. E ede jè titeke ra si ɔlé pêl-pêl tede’m a tɔ. Gir’n ke nè á m’ra’n ranel ngain dum ke kété. 8Ke nè á magtub ke ndɔ ke m’ndang m’ade sei kété nga, ade ingei kumndoo ɓá géa, m’asekum tel ndinge ra’m dè’t lé ta. Ndɔ ke m’ndinge ra’m kuwe tede m’an titeke magtub nè nga kété ade sei kumndoo mbɔr bè kuwe. 9Ɗarinè, m’ra ranel ɔje dè kumndoo ke ndɔ ke ingei nga lé. Nè m’ra ranel tede kumndoo ke ndɔ ke ingei nga ade i teli turi hal si. Kumndoo ke ndɔ ke ingei nga, è se goo kêmndige le Nube. Bè ɓaa, jè ra se si majelé karé bè géa lé. 10Kumndoo ke se go kêmndige le Nube nga à ade doo à tur’n hal’n kinge’n kaje m à tel ndinge ra’n gugu lé. Nè kumndoo ke in ra dooge ke dè nang nè nga oje yo. 11Kumndoo ke se go kêmndige le Nube nga oje nyange nè malang dann si’t ade an-in ɓá. Kumndoo nè nga á ade in-in kalang ɔri tà i taai dè’m. E ade kum si gang dè majelé’t ade i turi hal si a, i ɓeli Ndil Nube a tɔ. Kumndoo nè nga ade ngur kan’m ra sei pênn-pênn. Kumndoo nè nga ade ilei kêm si dè njé ra majelége’t. E tel sei ke njé ra nyan ke se dè najennge. Nyanra si malang tɔje jè titeke tà karé géa uwe dè si lé. 12Ke nè á m’ndang magtub nè made sei ɓaa, è tede tà le doo ke ra majelé se made’n éké tede doo ke made’n ra se’n majelé nga lé a tɔ. Nè m’ndang magtub nè m’ade sei tede kin ke sei in-in kalang i rai nyan tede tà le jé. Nyan ke sei i rai tede tà le jé nga tò nata ndai-ndai tàkum Nube’t. 13Gir’n ke nè á kêm jé sɔl’n lom. J’inge ranel ngain dè kêm sɔl lom’t se ranel ke sei adi Tite inge. Sei malang adi tàgir le’n tò lom dann si’t. 14Sei adi dè’m in tchakm ade m’pite sei tàkum Tite’t ndêin m ra’m sɔl’m dè si’t lé. Tà malang ke jè tam j’ɔje’n dè si nga è kum kuwe. Kerɔte kuwe, dè jé ke sei adi in tchakm non Tite nga, è géa an se kum’n. 15Kêm Tite olé dè koje ke sei malang ilei dènn’t a, se kuwe ke sei uwei nin ke ra si’t se kêmnda káng i ɓeli ndil’n i ndebi nginn-nginn. Gir’n ke nè á kêm’n too’n dè si’t ngain dum ke kété. 16M’ra ranel ngain tede m’unde kêm’m dè si’t ɔje dè nyange malang.

will be added

X\