2 NJE KE CORINTHE 6

1Jè jè njémade kulege le Nube. Gir’n ke nè á jè ndeje’n sei le kade nyan-noje le Nube ke ingei nga, i telii ke nyan ke raikarè lé. 2Kerɔte kuwe, Nube tam ede nè: «Ndɔ karé ke kanm m’tel m’ilei dè ndu non’t lei a, m’din-in dè ndɔ kaje’t lei a tɔ.» An! ɓila è ndɔ ke kanm, an! ɗarinè è ndɔ kaje. 3Jè ndige kade dooge an-in kule ra jé ke ngarankum nyan. Gir’n ke nè á jè ra’n nyan tede kile’n doo karé géa kage lé. 4Nè se loo malang jè tɔje ra jé j’ade dooge an-in jè ke ngann njékulege le Nube. Gir’n ke nè á j’oré’n tà jé nják-nják dè nyantosowurge se dè nyan ke nal jè a, se dè nyan ke ra jè ɓel a tɔ. 5Dé tunde jè a, d’ile jè dangai’t a tɔ. Dé sule dooge dè jé’t a, j’ule ra jé ndibe loo kule’t a tɔ. J’ɔge kum jé ɓi a, j’ɔge ra jé dè nyankuse’t se dè kain mann’t a tɔ. 6Jè tɔje ra jé j’ade dooge an-in jè ke njémade kulege le Nube se go kêmnda a, se go nyanger a, se go korè tà njak a, se kêm-maje a, se go Ndil-Kêmnda a, se go tár nan se kêmnda káng le jé a tɔ. 7Jè tɔje ra jé ke ngann njékulege le Nube se go ngarankum tà a, se tɔgmong le Nube a tɔ. Nyanra ke se dè naje’n á è nyan rɔ le jé ke jè taa’n dè jé. 8Doo ke nange ilei riɓar dè jé’t a, njé ke nange ilei rasɔl dè jé’t a tɔ. Doo ke nange têti tà undei tà jé’t a, njé ke tami tà le jé ke maje a tɔ. Doo ke nange an-in jè ke njé libe kum dooge nè jè tam ngarankum tà. 9Dooge geri jè maje, nè rai jè tite dooge ke geri de lé bè. D’an jè ke dooge ke à weii, nè an! jè ndi kumgajer ɓai. Dé ra jè ndoo ngain kuwe, nè dé tɔl jè lé ɓai. 10D’an jè ke dooge ke kum de ra ndoo, nè ra jé nel jè se ndɔge malang. D’an jè ke njéndooge, nè j’ade dooge ngain teli baw kundekêmge. Kerɔte kuwe, jè ke nyange taai ra jé pel-pel nga, d’an jè titeke dooge ke ndooi gɔg-gɔg. 11Sei ngakon jége ke kêm ɓee-bò ke Corinthe nga, j’ede sei tàge ke dè ɓengre jé’t ndàt m jè ɓɔyɔ sei kêm jé lé. 12Jè ɓaa, jè ɓɔyɔ sei kêm jé lé, nè è sei á i ɓɔyɔi jè kêm si. 13Jè ɓɔyɔ sei kêm jé lé: maje kade sei géa i ɓɔyɔi jè kêm si lé tɔ. M’an sei tite ngannemge bè á m’ede’n sei tàge nè. 14Uwei made nan se dooge ke ei njétaakêm-Krist lé nga lé. Dé nga, dé njémade-loo-kawge ke tuwe sei ɗêw lé. Njè ra nyan se dè naje’n se njè ra nyan ke se dè naje’n lé nga, ké à ɓei nan’t titeke bain wa? Eké lookar se tilkus à ɓei nan’t titeke bain wa? 15Ké Krist se sú à umi nan’t titeke bain wa? Ké njètaakêm-Krist se njètaakêm-Krist lé à ɓei nan’t titeke bain wa? 16Ké gile kei ke tò se ninn’n le Nube se kei mage polége à umi nan’t titeke bain wa? Jèi jèi gile kei ke tò se ninn’n le Nube ke Njèndi kumgajer. Nube kuwe tam ede nè: «M’a m’ndi dann de’t a, m’a m’ringe dann de’t a tɔ. M’a m’ee Nube le de, dé géa d’a dé kosdooge le’m a tɔ.» 17Gir’n ke nè á Kuwe-ɓee tam’n ede nè: «Undei loo i teei dann de’t kɔke i ndii gai, ɔdi ra nyan ke mine lé ɓaa, m’a m’uwe sei ke ram’t. 18M’a m’ee Bɔ si a, sei à k’eei ngann’m ke dingem se njé ke dinye, Kuwe-ɓee njètɔgmong kuwe á tam bè.»

will be added

X\