2 NJE KE CORINTHE 5

1Kerɔte kuwe, danra jéi ke jè ndii dè nang nè nga, tò asenan se kei kam ke ndɔ ke rang à jɔri. Nè jè geri mbak titeke kei le jéi ke tò se non tò danran nú non. E kei le Nube kuwe á ra m è ji doo-ndulge á ra lé. 2Kei ndi jéi ke dè nang nè nga, jè ton-in kêmé ɓir-ɓir ade ngur kin kur lêbêt kaw kêm kei ke danrán ra jèi pênn-pênn. 3Ke nè á jè ndi kêm kei ke danrán’t nè nga ɓaa, Nube à inge jèi ra jéi karè lé. 4Loo ke jè ndii kêm kei kam’t nè ɓai nga, nyan wɔi jèi ade jè ton-in ɓir-ɓir. Ḿ-m̀, jè ndige kinye kei kam nè nga kɔke lé, nè jè ndige kin kur lêbêt kaw kêm kei ke tò se non’t nga. Titeke bè á danra ke à jɔri à ule è ke à ndikumgajer rann’t yul. 5E Nube kuwe á uwe dè nja nyange nè unde konn tede le jéi. E ade jè Ndil-Kêmnda ke tàpitem nyange ke ndɔ’n ke j’à j’ingei jinn’t. 6Jè nda kêm jé káng j’orè tà jé njak se ndɔge malang. Kerɔte kuwe, jè ger mbak titeke loo ke jè nain se danra jéi dè nang nè ɓai nga, jè ndi heb se Kuwe-ɓee. 7Jè njiye se go kundekêm m se go kum kan loo lé. 8Jè nda kêm jé káng ade j’an titeke kinye danra kaw ndi ra Kuwe-ɓee’t nga è soo’t ngain. 9Gir’n ke nè á, loo ke jè ndii dè nang nè ɓai éké loo ke j’à ndɔti ɓee dè nang nè nga, nyan karé ke è ranel le jéi è taa kum Kuwe-ɓee. 10Kerɔte kuwe, ndɔn’t jèi karé-karé malang j’à ndai loo gangtà’t le Krist tede kade nanan géa à inge kann nyan ra maje éké majelé ke è ra loo ke kété ndi’n se dè’n dɔ ɓai nga. 11Jè ɓel Ndil Kuwe-ɓee Nube. Gir’n ke nè á jè sang’n le kade dooge undei kêm de dènn’t. Jè nga Nube ger jè ndát-ndát mbak. Sei géa, m’gir titeke i geri jè kêm si’t maje titeke Nube ger’n jè bè tɔ. 12Jè ndige le tel kunde ra jé jè kuwe kum si’t lé ta, nè j’inye loo j’ade sei kade sei kuwe unni tà jé. Titeke bè á sei a kingei tà ke kum tel kede njé ke ndii unni tà ra de ɔje dè nyange ke tooi nata tàkum de’t tá anje ti ra de dè nyange ke in-in nganrankêm de’t. 13Doo ke nange tami edi nè: «Jè mbege.» Nè jè mbege tede le Nube. Ke nè á kêm jé tel tɔ kuju tà ɓaa, tɔ kuju tà tede tà le si sei. 14Tár ke Krist tár jè nga ɔse jè balang-balang. Ke nè á doo karé inye ra’n ade yo tede dooge malang ɓaa, dooge malang kuwe weii se’n tɔ. 15Krist wei tede le de malang, tede kade njé ke ndii kumgajer ndii tede le de ei kuwe lé ta. Nè à ndii kumgajer tede le Krist ke wei a, unde loo tee dann njé ke koo’t tede tà le de a tɔ. 16Unn gir ɗarinè nga, jè ger doo se go danra lé ta. Ke nè á kété jè ger Krist se go danra ɓaa, ɗarinè jè ger’n se go danra titeke bè lé ta. 17Ke nè á doo karé um nan’t bɔk se Krist ɓaa, è tel è doo-kunde ke kige. Ɓuge nyange ke mari tugei gangi ɓá, an! nyange malang teli ei ke kige. 18Nyan malang in ra Nube ke j’umi nan’t bɔk se’n tàkul Krist. E kuwe á ade jè kule kum dooge nan’t bɔk se’n a tɔ. 19Oiyo, è Nube kuwe á um se dooge ke dè nang nè nan’t bɔk tàkul Krist. E mbate tute go majelége le de. Kule kum dooge ke dè nang nè nan’t bɔk se’n á è Nube um ji jé’t. 20Jè jè ngann njékulege tede le Krist. Nube ɓar dooge ke rann’t takul jé jè. Bè ɓaa, jè ndête sei se ri Krist kade umi nan’t bɔk se Nube. 21Krist nga ra majelé karé bè lé, nè Nube tel’n ke danra majelé ke deri tede le jéi. Nube ɔr tà dè jéi’t takul Krist. Takul kum ke j’um nan’t bɔk se Krist á Nube ɔr’n tà dè jéi’t.

will be added

X\