2 NJE KE CORINTHE 4

1Nube ade jè ra kule nè nga se go kêmkanm le’n. Gir’n ke nè á j’ade kêm jé tête’n mann lé. 2Jè mbate nyan rasɔlge ke ra se go ngein. Jè ra nyan karé le libe’n kum doo lé a, j’ur mann dann tà’t le Nube lé a tɔ. Nè jè tee se ngarankum tà j’ade tò nata ndái-ndái a, j’ɔrgir ra jé njai j’ade dooge malang geri se kêm de non Nube’t a tɔ. 3Ke nè á Tà ke Maje le jé tò putru ɓila ɓai, tò putru tede le njé ke d’ayé kaw ke loo tuju’t. 4Ke nè á Tà ke Maje le jé tò putru ɓila ɓai ɓaa, tò putru tede le njé kunn mbi dè tàge’t. Dé nè nga, Sú ke njèkonɓee dè nang nè tɔ kum de ɔge de kunde kêm de dè Krist’t. Gir’n ke nè á d’ase kan’n lookar le Tà ke Maje nga lé. E lookar le ndubra le Krist ke è kum gute tà Nube nga. 5Mber ke j’ile nga, j’ile j’ɔje’n dè ra jé jè kuwe lé. Nè j’ile mber j’ɔje’n dè Kuwe-ɓee Jésu-Krist. Jè ɓaa, jè ɓer kulege le si tede tà le Jésu. 6Kété mari, Nube tam ede nè : «Maje kade lookar ndogó dann tilkusge’t!» E Nube nè nga kuwe á ade lookar ndogó dè ɓengre jé’t tede kade jè ribe’n dè ger-gel ndubra le Nube tàkum Kuwe-ɓee Jésu-Krist’t. 7Tà ke Maje nga, è nyanbaw ke gate’n è ngain. Nyanbaw nè nga j’oto kêm jó ke ɓann’t tede kade dooge geri tite tɔgmong ke dum dè loo nè nga in ra Nube’t m in ra jé jè’t lé. 8Nyantosowurge gai-gai rai jè se loo malang kuwe, nè leri jè nang làr lé ɓai. Nyange gai-gai an-in dè jé king-king, nè kêm jé tête mann lé ɓai. 9Dooge ɔri jè kororoi kuwe, nè Nube inye jè lé ɓai. Dé tunde jè dé tile jè barak-barak, nè jè tuju lé ɓai. 10J’oto nyankêmkonge le Jésu dè jé’t se ndɔge malang tede kade d’an’n ndikumgajer le’n ke tò nata ndái-ndái ra jé’t tɔ. 11Jè ndi kumgajer kuwe, nè se ndɔge malang jè ndi tà yo’t ɔje dè tà le Krist. Jè ndi tà yo’t se ndɔ jé-ndɔ jé tede kade ndikumgajer le’n too’n nata ndái-ndái ra jé ke à jɔri’t nga. 12Titeke bè á yo ndi ra kule ra jé’t, nè sei ɓaa, ndikumgajer ndi ra kule ra si’t. 13Dé ndang kêm magtub ke tò se ninn’n d’ede nè: «M’unde kêm’m dè Nube’t, gir’n ke nè á m’ede sei tàge le’n.» Jè kuwe géa, se go kêm jé ke j’unde dènn’t á jè tam’n tà nè nga bè tɔ. 14Oiyo, jè ger titeke Nube ade Kuwe-ɓee Jésu unde loo tee dann njé ke koo’t. Jè géa, ndɔ ke rang à ade j’à j’unde loo le tee dann njé ke koo’t se Jésu nan’t. E kuwe à ade jè se si j’à j’ali garang ndai nonn’t. 15Nyange malang ke ra jè nga, è tede le si. Titeke bè á nyan-noje le Nube à in’n dè made’t ke kété-kété tede kade dooge bule teli rai Nube oiyo a, ulei ndubra dènn’t a tɔ. 16Gir’n ke nè á j’ade kêm jé tête’n mann lé. Ke nè á danra jé ke nata ayé jɔri géa, ngarankum ra jé tel in mande se ndɔge malang. 17Nyantosowur ke pêlêng ke ra jè ɗarinè nga à ɔje ndubra ke dum dè loo ndɔ ke rang ɓai. 18Nyan ke doo an se kum’n á j’an-in ngɔde j’ɔje’n dè lé. Nè j’orè kum jé dè nyange ke doo asekum kan se kum’n lé. Tede nyange ke doo an se kum’n nga, ei nyange ke kò de à tò mbɔr lé. Nè nyange ke doo asekum kan se kum’n lé nga, ei nyange ke à tooi sár se non.

will be added

X\