2 NJE KE CORINTHE 2

1Nyan ke man kuwe m’ɔje kêm’t á tò nè: Man m’ɔje kêm’t njáng le tel kaw ra si’t kade ingei kêmkon gugu lé ta. 2Tede ke nè á man kuwe m’tel m’ade sei kêmkon ɓaa, ké nan à ade’m ranel wa? Ké è ke m’ade’n kêmkon nga kuwe á à ade’m ranel nga lé wa? 3M’ndang magtub nè made sei kété tede kade ndɔ ke m’tee ɓéee le si ɓaa, m’inge kêmkon ra njé ke d’ayé kade m’inge ranel nga lé. M’unde kêm’m dè si’t malang ɔje dè ta nè. Ranel le’m è ranel le si sei malang a tɔ. 4M’ndi dann nyantosowur’t se dann ɓel’t. Magtub ke m’ndang nè nga m’ade sei se mann non kum’t tede kade’n sei kêmkon gugu lé ta. Nè m’ndang magtub nè m’ade sei kade i geri njai titeke m’tár sei ngain m’ade al dè loo’n. 5Ke nè á doo karé ade’m kêmkon ɓaa, è man á ade’m kêmkon se kar’m lé, nè è sei malang. Ke nè á è sei malang á ade sei kêmkon lé géa, è ade njé ke nange dann si’t kêmkon. 6Tà ke ndɔ ke in-in se kos si malang i gangi dè doo’t nè nga, adi ase bè ta. 7Ɗarinè ɓaa, adi kêm si tin mbit dènn’t a, i sɔli kêm’n a tɔ. I rai titeke bè tede kade kêmkon tel al dè doo nè nga lé. 8Gir’n ke nè á, man m’deje’n sei kade i teli uwei doo nè nga ra si’t i tárii. 9M’ndang magtub nè m’ade sei le nan’n sei kan ké a ilei koje dè nyange’t malang kuwe wa? 10Doo ke adi kêm si tin mbit dènn’t ɓaa, man géa m’ade kêm’m tin mbit dènn’t tɔ. Ke nè á m’tin kêm’m mbit dè nyan karé’t ɓaa, m’ra tede le si tàkum Krist’t. 11M’ra titeke bè tede kade njèban le jéi Sú inge’n loo libe’n kum jéi lé. Kerɔte kuwe, Sú nga jè geri tàgirge le’n mbak. 12Loo ke Kuwe-ɓee ɔr tà rebe ade m’ree kêm ɓee-bò ke Troas ɓaa, è gɔl loo ke kanm ade m’ile mber Tà ke Maje le Krist tutu. 13Nè né è bè géa kêm’m tò lom lé, tede m’inge ngokon’m Tite kêm ɓee-bò’t nè nga lé. Gir’n ke nè á m’sure’n njétaakêm-Kristge ke kêm ɓee ke Troas m’inye de, m’ɔte m’aw’n kêm ɓeekon ke Macédoine. 14Nube ke njè kade j’unn banga se ndɔge malang takul kum ke j’um nan’t bɔk se Krist nga, m’ra’n oiyo ngain. Nube ade j’aw j’ile mber Tà ke Maje se loo malang j’ade dooge geri gel Krist. Gel’n ke dé ger nga tò asenan se wubu ke ɓusu’n ete maje taa loo pel-pel. 15Kerɔte kuwe, jè tite wubu ke ɓusu’n ete nel ke Krist ade Nube. Jèi wubu ke ɓus’n ete maje tede le njé ke à aji a, tede le njé ke ndii à weii a tɔ. 16Jè ɓus nyan le yo tede le njé ke ndii awi ke loo tuju’t a, jè ɓus nyan le kaje tede le njé ke ndii awi ke loo kaje’t a tɔ. Ké nan asekum ra kule ke titeke bè nga wa? 17Jè jè njé tel Tà le Nube ke nyan gate tite njé ke nange bule rai nga lé. Jè nga, jè dooge ke j’um nan’t bɔk se Krist. Gir’n ke nè á, Nube ade j’ile’n mber j’ade sei se kêmnda káng nonn’t.

will be added

X\