2 NJE KE CORINTHE 13

1Kaw ke m’a m’aw ɓéee le si nè nga, è njèkon’t mute ta. Titeke Magtub le Nube tam’n ede nè: «Doo ke tà oso dènn’t ɓaa, tà ke à tee tà njékɔrgo tàge joo éké mute kuwe ase gɔl tà nè malang kade oso nan’t.» 2Kaw ke ndɔ ke m’aw ɓéee le si njèkon’t joo nga, ndɔ ke m’in se njé ra majelége dè majelé’t le de ɓá. Nè ɓila ke m’goto dann si’t nga géa, m’tel m’ede de ei se njé ke rang malang kété: Loo ke ndɔn’t m’a m’tel kaw ɓee le si ɓaa, m’a m’ra se de ngang ngain. 3Tede tà ke Krist ule tam’t ade m’tam nga, sei sangi nyan ke à tɔje sei loo’n kade i geri njai. Ɗarinè a an-in nyan’n kuwe: Krist nga ribe dè tɔgmong le’n ke nata dann si’t m è doo ke njèyai lé. 4Kerɔte kuwe, Krist nga dé ɓer’n kàde kage-ke-dese’t tede tɔg goto le’n. Nè né è bè géa, è tel ndikumgajer takul tɔgmong le Nube. Jè géa, jè njéyaige tite’n tede kum ke j’um se’n nan’t bɔk. J’à tel ndikumgajer se Krist takul tɔgmong le Nube titeke sei kuwe an-in ɗarinè. 5I nain ra si sei an-in ké i ndii dann kundekêm’t ɓai wa? I teri kêm si sei kuwe an-in ké i geri njai titeke Jésu Krist ra ɓee kêm si’t kuwe wa? Ke nè á sei kuwe i nan-in kundekêm le si an-in lé ɓaa, ndɔn’t a i ndi dann rasɔl’t. 6Man m’an titeke sei geri mbak titeke jè nga, jè dooge ke j’ase tàkum Nube’t. 7Nè jè deje Nube kade inye sei ade i rai majelé karé bè géa lé. Jè ra titeke bè tede tɔje’n sei titeke jè dooge ke j’ase tàkum Nube’t lé. Né jè dooge ke j’ase lé géa, nyan karé ke jè ndinge ɓaa, è le kade nyanra si è ke maje tàkum Nube’t. 8Kerɔte kuwe, jè nga j’aw se tɔgmong ke rang le kute’n ngarankum tà mbeng ndan lé. Nè tɔgmong ke j’aw’n nga, tò tede gete’n ngarankum tà. 9Ke nè á jè njéyaige ɓaa, jè ra ranel tede si sei njétɔgege. Nyan ke jè deje Nube tede tà le si ɓai ɓaa, è le kade awi kum si ke kété-kété dè nyanra ke maje’t. 10M’ndi heb se si, nè né è bè géa m’ndang magtub m’ade sei ɔje dè nyange nè nga. M’ra titeke bè tede kade ndɔ ke m’a m’tee ra si’t pan ɓaa, m’inge loo ra se si ngang ngain lé. Tɔgmong ke Kuwe-ɓee ade’m nga, è tede kade m’ade kundekêm le si ɓeɓer’n m è tede kade m’tuju’n sei lé. 11Ngakonmge, gute tàge ke nain kade m’ede sei á tò nè: I rai ranel se ndɔge-ndɔge, awi kum si ke kété-kété dè maje kɔr njêt’t, i sɔli kêm nan, adi tàgir le si è karé, i ndii se kêmlom. Titeke bè á Nube ke njè tár sei ke kêmlom in rann’t à nain’n se si. 12Uwei nan kàde si’t sêm, i rai nan lapya se kêmnda káng. Njétaakêm-Kristge malang rai sei lapya tɔ. 13Maje kade kêmnoje le Kuwe-ɓee Jésu-Krist se tár le Nube a, se le Ndil-Kêmnda ke njè kum jèi nan’t bɔk nain se si malang.

will be added

X\