2 NJE KE CORINTHE 12

1Kunde kàde’m éké kunde kàde’m lé géa, nyan karé ke è soom’t goto. Nè né è bè géa, m’a m’unde kàde’m ndêin kuwe pa ɓita. M’a m’unde kàde’m ɔje dè nyange ke tooi loo ɓɔyɔn’t ke Kuwe-ɓee tee’n ade m’an a, m’ger gir a tɔ. 2M’ger dingem karé ke njètaakêm-Krist. Dingem nè nga Nube uwe’n wont ɔr’n aw se’n kêm danran ke ngeinn’t, ɗarinè ase ɓal dɔg-gidé-sɔ ta. Dingem nè nga Nube uwe’n wont ɔr’n se danra’n éké anje danra’n géa man m’ger lé ta, nè Nube ɓaa ger mbak. 3Dingem nè nga d’uwe’n wont d’ɔr’n se danra’n éké se danra’n lé géa man m’ger lé, nè Nube ɓaa ger mbak. 4Dingem nè nga, Nube uwe’n ɔr’n wont aw se’n Paradis, loo ke maje’t. E loo’n nè á doo nè oo’n tàge ke dé tam nga. Nè è tàge d’inye loo d’ade doo-ndul le kade ɔrgir ndan lé. 5Oiyo, m’a m’unde kàde’m ɔje dè doo nè nga kuwe, nè ke ɔje dè ra’m man ɓaa, m’a m’unde kàde’m ɔje dè yai le’m tá. 6Ke nè á ndɔ ke m’ndige kunde kàde’m ɓaa, m’ayé k’ee mbe doo lé ɓai, tede m’ayé tam ngarankum tà. Nè m’ɔge ra’m dè pite ram’t tede kade doo karé gir’n kêmn’t ede nè man doo ke bò ɔje dè nyanra’m éké tà tam’m nga lé. 7Nyange ke Nube ribe dè ade’m nga, ei nyange ke dum kum. Gir’n ke nè á ngonn njèkule le Sú ɓer’n konn ram’t tede kɔge’m loo kunde’m kàde’m dè nyange ke tooi loo ɓɔyɔn’t gai ke Nube tɔje’m ade m’an nè nga. 8M’ra ndoo ra Kuwe-ɓee’t ase nja mute le kade ɔr konn nè nga ram’t kɔke. 9Nè è tel ile’m dè’t ede nè: «Kêm-maje le’m asi nák tede tɔgmong le’m kile ra’n ke nata gir yai’t lei.» M’unde kàde’m ngain dè yai’t le’m tede kade tɔgmong le Krist taa’n ra’m pel-pel. 10Gir’n ke nè á m’ra’n ranel dè yai’t le’m, dè tajege ke dooge taji man éké dè nyange ke nal’m. Man m’ra ranel dè ra ke dé ra kum’m ndoo, dè ra ke dé ra’m d’ade kàde’m gete get-get tede tà le Krist. Tede loo ke m’an ra’m ke njè tɔg goto ɓaa, lotbè á tɔg’m in dè made’t ɓai. 11M’ra ra’m mbe’t. E sei á i ndɔji man adi m’tel’n mbe. E sei á né a i tami tà ke maje kunni tà’m. Sei an-in man ke nyan lé, nè njé ke an-in de ke njékawkulege ke bòii ngain nè nga dumi man se nyan karé bè lé. 12Sei an-in korè tà njak le’m ke deri, sei an-in nyan-tɔjege se nyange ke dum kum a, se nyankɔbege gai-gai ke ndɔ ke m’ra dann si’t. Nyange nè malang nga tɔji sei titeke man m’ee njèkawkule le Jésu ke get. 13Ké ri á njékebe nange le Nube ke rang ingei jim’t dumi sei wa? Kwɔi ke ndɔ ke m’wɔi dè si’t lé nga, ke nè á an-in titeke è majelé á m’ra se si géa adi kêm si tin mbit dèm’t ɗarinè. 14An-in! m’uwe dè nja ra’m tede kaw ɓee le si. Ke nè ɓaa, è njèkon’t ke mute ta. Nè m’a m’aw tede ndi kwɔi dè si lé kuwe ɓai-ɓai. M’sang le kinge nyan karé géa ji si’t lé. Nè danra si sei kuwe á m’aw ndoo’n. Gar-gar è tà le ngannge le kebe nyange tede tà le njékoje dege lé. Nè gar-gar è tà le njékoje ngannge le kebe nyange tede tà le ngann dege. 15Man ɓaa, m’a m’tuju nyankingemge se goomge se nonmge se ranel tede tà le si. Danra’m ke bere mbak géa man m’ile kɔke tede tà le si ɓai. Man m’tár sei ngain nè sei á i tári man ndêin bè karè lé wa? 16Kerɔte kuwe, man m’wɔi dè si lé; nè njé ke nange tami edi nè m’ra gos á m’taa’n sei. 17An-in! dooge malang ke ndɔ ke m’ule de ra si’t nga, ké è ke ra dann de’t á taa nyan le si ade m’ube’n maje wa? 18Ndɔ ke m’ule Tite ɓéee le si. Ngokon jéi karé ke ndɔ ke m’ede sei tà le’n nga géa, m’ule’n made aw se’n nan’t tɔ. Ké ndɔ ke Tite ube maje dè si’t wa? Ké tàgir le jé se nyanra jé ei karé se le Tite lé wa? 19Sei giri kêm si’t mari edi nè tàge ke j’ɔr nga, j’ɔr le taa’n dè jé tàkum si’t karè. Ḿ-m̀, jè j’ede sei tàge nè nga non Nube’t se go kêmndige le Krist. E tede kade kundekêm le si ɓeŠber’n kuwe karé á jè tam’n tàge nè malang. 20M’ɓel kêm’t tede bainléa loo ke m’a m’aw ra si’t nga, m’a m’inge sei dè nyanra ke kêm’m ndige lé’t. Sei géa, bainléa a ingei man dè nyange ke kêm si ndige’t lé nga a tɔ. Man ɓel kêm’t m’ede nè bainléa m’a kaw kinge sei dè kɔl nan’t, dè ra jang’t, dè ra wong’t, dè kaw se nan se tà, dè tam tede nan, dè ti ra’t, dè tà kede yer éké dè sule nan dè tà’t a tɔ. 21M’ɓel kêm’t tede bainléa ndɔ ke m’a m’tel kaw ɓee le si nga, Nube à ade m’a m’ndi dann rasɔl’t ɔje dè si. M’ndɔ ngain m’ede nè bainléa tel’m dann si’t ke gugu rang ɓaa, m’ayé ndi dann kumndoo’t tede tà le njé ke kété ke ndii se ra de ke mine titeke kété kuwe ɓai. M’ndɔ ngain m’ede nè bainléa ndɔn’t m’ayé ndi dann kumndoo’t tede tà le njé ke nange ke ndii à tooi se nan ke kaiya’t a, à ɔdi nan rai nyange ke pás-pàs se ndɔge malang a tɔ.

will be added

X\