2 NJE KE CORINTHE 11

1M’ndinge kade ilei kêm si pon dèm’t. Tà ke m’a m’ede sei nga, ke nè á è tà mbe géa, ilei kêm si pon dèm’t. 2M’tár sei ngain. Tár ke m’tár sei nga, ngire’n in ra Nube’t kuwe. Gir’n ke nè á m’ra’n jang dè si’t. Sei i tooi asinan se ngomande ke nal ger dingem ɓai bè. Krist kuwe karé bere luk-luk á è ngaw ke m’uwe dè’n m’ɔje’n dè si. M’tɔje’n go si kade an sei ke neennge. 3Titeke ndɔ ke li ra’n gos sú’n kum Eve nga, m’ɓel kade tàgir le si tel tur gide’n ade noje kêmnda ke Krist uwe se si. 4Sei ilei kêm si pon dè doo ke ree ile mber ɔje dè Jésu karé ke rang se è ke ndɔ ke j’ile mber tà le’n j’ade sei lé nga. Sei taai ndil karé ke rang se è ke ndɔ ke ingei kété se ranel. Sei ilei kêm si pon dè doo ke ree ile mber Tà ke Maje ke tò gai se è ke ndɔ ke i taai ɓá nga. 5Njé ke rai ra de ke njékawkulege ke bòi ngain nè nga, m’an nyan karé bè ke dé dum’m lé karè. 6Kerɔte kuwe, man nga m’ee doo ke njè tà nel lé; nè né è bè géa, m’ee doo ke m’ger gel Nube maje. Se ndɔge malang éké se loo malang, jè tɔje sei titeke jè ger gel Nube éké Krist nga maje. 7Kɔge ke ndɔ ke man kuwe m’ɔge ra’m dè nyange ke nal’m m’ile’n mber Tà ke Maje le Nube made sei karè nga, ké è majelé ke m’ra wa? Ké ra ke m’ra ra’m ke ngonn m’ile’n mber Tà ke Maje le Nube m’ade i telii dooge ke bòi nga, ké è majelé á m’ra wa? 8Loo ke ndɔ ke m’ra kule dann si’t nga, è njékebe nange le Nube ke kêm ɓeege ke rang’t á kebi nyange le de ugei dè ji’m. 9Loo ke ndɔ ke m’ra kule dann si’t nga ndoo nyan ra’m kuwe, nè m’ɔi dè doo karé bè dann si’t lé. E ngakon jéige ke njétaakêm-Kristge ke Macédoine á ndɔ ke rai se’m dè nyan ke nal’m. M’unde kumkunju dè ram’t tede kade m’tel m’ee nyankoto ke wɔi dè si’t lé. M’a m’ra bè-bè kum’m ke kété ɓai. 10M’tel m’ede sei ndàt titeke doo karé bè ke kêm ɓeekon ke Achaie ase kɔge’m dè pite ram’t nga ndan lé. Krist ger mbak titeke m’tam ngarankum tà m m’lanm lé. 11Ké ri á ade m’tam’n tà nè bè wa? Ké è tede tár ke m’tár sei lé wa? Ḿ-m̀, Nube ger mbak titeke m’tár sei kuwe. 12Nyan ke m’ra nè nga, m’a m’ra bè-bè kum ke kété-kété tede le kɔge’n loo njé ke ndigi kundei kàde de tite jé jè. Dé dooge nè nga, j’à j’al gir nan ɓai. 13Dooge nè nga ei njékawkulege ke lanm; ei rai ra de ke njékawkulege, nè kule ra de è kule libe kum dooge. Ei kuwe in-in se dè de teli ra de ke njékawkulege le Krist. 14E nè nga è nyan ke à ade ndil doo à tee kan-in soin-soin lé, tede Sú kuwe géa tel ra’n ke ngonn le lookar tɔ. 15Tel ke dooge nè teli ra de ke ngann njékulege le nyanra ke se dè naje’n nga, è nyan ke à ra doo ɓel lé. Ndɔ ke ngeinn’t ɓaa, kure nyanra de à ɔde kum de se go kule ra de ɓai. 16M’tel tam nja karé ɓai, maje kade doo karé bè géa gir titeke m’ee doo ke dann’m nain lé. Ke nè á an-in man ke mbe doo géa, uwei man ke ra si’t tede kade man géa m’unde’n kàde’m ndêin tɔ. 17Tà ke m’tam nè nga, Kuwe-ɓee á ule tam’t. Nè m’nda kêm’m káng m’tam’n tà nè tite njèbile m’unde’n kàde’m. 18Dooge ngain undei kàde de se go nyange le danra, man géa m’a m’unde kàde’m tɔ. 19Sei oréi tà si njak dè mbe dooge’t tede sei njékumkunjuge. 20Dooge rai sei ɓer éké tuji nyange le si. Dooge rai sei ade oso ra si’t ɗàk éké nedi sei a, éké tundei mbɔr si njanm-njanm a tɔ. Nè né è bè géa, sei oréi tà si njak dè nyange ke dooge rai se si nga. 21Tò’m rasɔl kade m’tam tà nè nga tede nyange ke kété j’ayé ra se si nga, j’ile dunn j’ade sɔl. Nè ke nè á doo karé bè unde kàde’n dè nyan karé’t ɓaa, man géa m’a m’unde kàde’m tɔ. M’tam tà nè asenan se mbe doo éké njèbile. 22Dooge nè nga, ke nè á ei Hébreuge ɓaa, man géa m’ee Hébreu tite de bè tɔ. Ke nè á dooge nè ei Israel ɓaa, man géa m’ee Israel tɔ. Ke nè á ei ngannkà Abraham ɓaa, man géa m’ee ngonnkà Abraham tite de bè tɔ. 23Ke nè á dooge nè nga ei ngann njékulege le Krist ɓaa, man géa m’ee ngonn njèkule le’n m’dum de ɓai. M’tam tà nè asenan se mbe doo bè. M’ule ra’m ndibe loo kule’t m’dum de malang. M’ra dangai ngain m’dum de malang. D’unde’m dé gang ra’m dàp-dàp dum de a, dɔ-dɔ m’ndi tà yo’t nja bule m’dum de a tɔ. 24Juipge undei man tà ndêin kɔr-mute-gidé-jisɔ-jimi nja mi. 25Dooge ke Rome tundei man se kage mbàs-mbàs nja mute, dé tile’m se kuberi her le tɔl’m nja karé. Bato ndui se’m ase nja mute a, d’ile’m kêm bolè’t d’ade’m m’tò tutu ngɔr se ndɔ joo. 26Dɔ-dɔ m’aw mba se nja’m, ba ayé kuwe’m a, njéɓog-ge umi man rebe le tɔli man, girkojege le’m sangi tɔli man, Juipge se njé ke ei Juipge lé sangi le tɔli man a tɔ. Dooge ke ndii kêm ɓee-bòge’t se njé ke ndii kêm dile’t géa sangi tɔli man a, ba-bò kate ayé kuwe’m a tɔ. Dooge ke rai ra de ke ngakonmge ke njétaakêm-Kristge sangi tɔli man a tɔ. 27M’ule ra’m ndibe loo kule’t, m’ɔr yàl-yàl a, dɔ-dɔ ɓi ɔde kum’m lé a tɔ. Nja bule ɓo se kunde mann tɔli man a, m’ɔge ra’m dè nyankuse’t se dè kain mann’t a tɔ. Nja bule m’ndi dann kul’t a, kubu kule ram’t goto a tɔ. 28Gute nyange ke ra’m nain bule ɓai: M’tɔse kum’m se ndɔ karé-karé malang dè njékebe nange’t le Nube a, kêm’m tò kekek dè de’t a tɔ. 29Ke nè á doo karé yai dè kundekêm’t ɓaa, man géa kundekêm le’m yai tɔ. Ke nè á doo karé ra majelé ɓaa tur’m tite por bè. 30Oiyo, ke nè á è kum kunde kàde ɓaa, gar-gar m’a m’unde kàde’m dè yai’t le’m. 31Nube, Bɔ Kuwe-ɓee le jéi Jésu-Krist ger mbak titeke m’lanm lé. Maje kade dè’n mong káng-káng sár se non. 32Ndɔ ke Arétas, ngar ke bò unde dingem karé ke ngar-ɓee. Loo ke ndɔ ke m’nain kêm ɓee-bò ke Damas ɓai nga, dingem nè ade dooge umi loo le kuwei man tà rebe geng’t le ɓee-bò nè nga. 33Nè mademge unni man ilei man kêm janga’t ulei man se kum bolè ndogo bɔr ke d’ile gide ɓee-bò’t. Titeke bè á m’rise’n gide geng’t nata, m’an-in m’taa’n ra’m ji ngar-ɓee’t nè nga.

will be added

X\