2 NJE KE CORINTHE 10

1Man Paul kuwe, m’ndeje sei se go ndu noje a, se go kêm-maje le Krist a tɔ. Man nga, dooge ke nange tami se’m edi nè: loo ke m’nda tàkum si’t ɓaa, m’ee doo ke sɔl lom-lom; nè loo ke m’goto dann si’t ɓaa, m’ee njè tà tur. 2Nyan ke m’ndige le ra nga, m’aw ndoo kade i sulei man tá m’ra’n lé. Dooge ke nange ke giri edi nè: è jè kuwe j’in se dè jé jè ra kule le Krist nga, ndɔ ke m’a m’tee ra si’t nú ɓaa, m’a m’ra se de ngang ngain ɓai. 3Kerɔte, jè nain se danra jé ɓai kuwe, nè rɔ ke jè ndi j’à rɔ nga, è se go danra lé. 4Nyankatege ke jè ra’n rɔ nga ei le danra lé. Nè ei nyankatege ke gangi ke in-in ra Nube’t. Jè j’ɔrè ndogo bɔrge nang bɔrɔr-bɔrɔr se nyankatege nè nga. 5Tàgir le njé ti rage malang ke ɔge dooge ger gel Nube nga, jè ɓêngel de nang kɔke. Jè ndige le tel tàgir le dooge malang le kade ilei koje dè Krist’t. 6Loo ke sei a kilei koje dè nyange’t malang ɓá ɓaa, jè ndi dè nja jé’t tchên le kade kure nyanra njékaltàge ɔde kum de. 7Ɔri kum si dɔ, i teri nyange maje an-in. Ke nè á doo karé gir kêmn’t ede nè n’ee kuwe se kar’n á n’ee le Krist ɓaa, maje kade ger kêmn’t maje titeke jè géa jè le Krist jè dum’n è ɓai. 8Sei giri edi nè m’pite ra’m ngain dè tɔgmong ke Kuwe-ɓee ade jè nga. Tɔgmong ke Kuwe-ɓee ade jè nga è tede kade i tɔgi dè kundekêm’t le si. Kuwe-ɓee ade jè tɔgmong nè nga le kade jè ra’n sei ɓer j’ade i tujii lé. 9Magtub ke m’ndang m’ade sei nga, è tede le kule’n ɓel kêm si’t kade i ndebi nginn- nginn lé. 10Dooge tami tchoo edi nè: «N’tam tàge ke tur-tur se tàge ke ngang ngain kêm magtub leyé ke n’ndang. Nè loo n’nda dann jéi’t se rayé ɓaa, n’ee njè tɔg goto a, doo asekum kan tà tamé ke nyan lé a tɔ.» 11Dooge ke njé tam tà titeke bè nga, maje kade geri maje: tàge ke jè tam kêm magtubge’t loo ke jè ndii’n heb se si nga, loo ke ndɔn’t j’à tee ra si’t ɓaa, è tàge nè kuwe j’à tam m à ei tàge ke gai lé. 12Kerɔte kuwe, dooge ke nange an-in ra de ke dooge ke bò. Jè j’aw ndoo le tò tite de lé a, j’aw ndoo kuwe ra jé kɔje’n le de lé a tɔ. Dooge nè nga ei njé kêm tɔ kuju tà lége tede an-in ra de ei kuwe ke nyan kɔje-nyan a, rai ra de tite le nan a tɔ. 13Nè jè ɓaa, jè ndige pite ra jé kade al dè loo’n lé. Nè j’à ra kule le jé se go dè ninn loo ke Nube ɔje ade jè. Gir’n ke nè á j’aw’n sár jè tee’n ra si’t nú. 14Jè j’al dè ninn loo le jé nga lé. Jè kuwe jè dooge ke desêin ke j’aw se Tà ke Maje le Krist ɓéee le si. Ke nè á ndɔ ke jè ra bè lé ɓaa, jè njé kal dè ninn loo ke Nube ɔje ade jè nga. 15J’al dè ninn loo ke Nube ɔje ade jè tede pite’n ra jé dè kule ke njé ke rang ulei ra de ndibe tutu nga lé. Nyan karé ke j’unde kêm jé tchên dè’t á tò nè: Ke nè á kundekêm le si ɓisir ke kété-kété ɓaa, kule ke jè ra dann si’t à ile bujam kerɔte kuwe. Nè à ile bujam se go dè ninn loo ke Nube ɔje ade jè nga. 16J’ɔje kêm jé’t le kaw kile mber Tà ke Maje kal’n gide ɓee le si nga ɓai. Nè jè ndige le kur kêm dè ninn loo’t le njé ke rang’t lé a, jè ndige kunde kàde jé dè kule ra de’t lé a tɔ. 17Ke nè á doo karé ndige kunde kàde’n ɓaa, maje kade unde kàde’n takul kum ke um nan’t bɔk se Kuwe-ɓee. 18Doo ke an ra’n è kuwe ke nyan nga, è ngarankum doo lé ɓai. Doo ke Kuwe-ɓee kuwe pite’n tá è ngarankum doo ɓai.

will be added

X\