2 NJE KE CORINTHE 1

1Man Paul, njèkawkule le Jésu-Krist se go kêmndige le Nube. Jè se ngokon si Timothée, jè ndang magtub nè j’ade njékebe nange le Nube ke ndii kêm ɓee-bò ke Corinthe. Magtub nè nga jè ndang j’ade njé ke tooi se ninn de malang ke ndii kêm ɓeekon ke Achaie bere mbak a tɔ. 2Maje kade kêm-maje se kêmlom ke in ra Bɔ jéi Nube’t se ra Kuwe-ɓee Jésu Krist nain se si. 3Nube, Bɔ Kuwe-ɓee le jéi Jésu-Krist nga, maje kade dè’n mong maj-maj. Bɔ jéi Nube nga, è Nube ke njè kêmkanm se njè sɔl kêm dooge a tɔ. 4E sɔl kêm jé dè nyantosowurge le jé malang tede kade sɔlkêm ke j’inge rann’t nga, jè kuwe géa j’asekum sɔl’n kêm njé ke rang malang ke ndii dann nyantosowurge’t nga tɔ. 5Nyankêmkonge le Krist oji nan ra jé’t nyanmi-nyanmi. Krist ade sɔlkêm ke dum oje nan ra jé’t nyanmi-nyanmi titeke bè tɔ. 6Ke nè á jè ndi dann nyantosowurge’t ɓaa, è tede kade ingei kêmsɔl lom se kaje a tɔ. Ke nè á d’ade j’inge kêmsɔl ɓaa, è tede kade ingei sɔlkêm ke asekum ra se si kade oréi tà si njak dè nyankêmkonge ke rai sei titeke kété ra’n jè nga tɔ. 7Kêm jé ke j’unde tchên ke dè si’t nga tò njáng. Jè ger mbak, nyankêmkonge ke sei ulei ra si tutu se jé nga, sei ɓei nan se jé dè sɔlkêm’t titeke bè tɔ. 8Ngakon jége, jè ndige le kade i ndii dè mbe’t ɔje dè nyantosowur ke ndɔ ke ra jè nga lé. Nyantosowur ke ndɔ ke tee dè jé’t kêm ɓeekon ke Asie nga ade wur jé ndir njàk-njàk al dè tɔg jé. Nyantosowur ke ndɔ ke ra jè ade wur jé ndir jè njàk-njàk nè nga al dè tɔg jé ade tep̂léa danra bere mbak kuwe ayé kudu. 9Jè ɓaa, ndɔ ke jè ger kêm jé’t mbak titeke jè nyange le yo kuwe deri. Nyan ke ndɔ ke tee dè jé’t nga, tee titeke bè le kade j’unde’n kêm jé dè ra jé jè’t kuwe lé, nè dè Nube kuwe karé bere ke njè kade dooge undei loo teei dann njé ke koo’t. 10E Nube ke ndɔ ke uwe jè wont ɔr jè tà yo ke tò ɓel’t nè nga, à uwe jè wont kɔr jè tà’t ɓai. Kerɔte kuwe, jè j’unde kêm jé tchên dènn’t le kade ndɔ ke rang uwe jè wont ɔr jè tà yo’t titeke bè ɓai. 11Sei geti jè loo kɔje tà’t le si se Nube. Titeke bè á nyan-noje ke j’inge takul dooge bule nè nga à tel k’ee nyan ra Nube oiyo ndɔ ke rang tede le jé ɓai. 12Nyan ke ade dè jé in’n tchakm nga, è tàgir ke kêm jé’t. Jè ger kêm jé’t titeke nyanra jé taa kum dooge ke dè nang nè. Sei kuwe mbain géa, i geri titeke nyanra jé è nyanra ke se dè naje’n. E kêmnoje le Nube á ɔr non jé ade jè ra’n nyan se dè naje’n m è kumkunju le doo lé. 13Magtubge le jé ke jè ndang j’ade i tutei a, i geri ɓá a nga, j’ile tà ke rang dè’t lé ta. Nyan karé ke i geri njai lé tò tutu, nè m’unde kêm’m tchên titeke a i geri njai ndɔ ke rang ɓai. 14Sei asikum kade dè si in tchakm tede le jé, titeke ndɔ ke jè géa j’ase’n kum kade dè jé in’n tchakm tede tà le si ndɔ ke Kuwe-ɓee Jésu-Krist à tel ree’n. 15Se go kêm’m ke m’um dè si’t ɓɔk-ɓɔk á ndɔ ke m’ndige le kaw’n ra si’t sei’t kuwe kété le kade ingeii nyan-noje ke njèkon’t joo dè made’t ɓai. 16M’a tee se rebe ke ra si’t kaw kêm ɓeekon ke Macédoine. Taɓai m’a m’in Macédoine le tel ree ra si’t tá a i danni man kawi se’m ɓeekon ke Judée’t ɓai. 17Kɔje ke m’ɔje ra titeke bè nga, ké m’ra anje gir tà dè’t wa? Eké nyange ke m’ɔje le ra de nga, è se go danra karè ade tà tam’m ndu kɔbe’m joo m’ede nè «oiyo» a, «ḿ-m̀» a tɔ wa? 18Nube ger mbak titeke man m’ee njè kum tà minye’t joo lé. 19Tede Jésu-Krist Ngonn Nube, ke man a, Silas a, Timothée a tɔ, j’ile mber tà le’n dann si’t nga, è njè kum tà minye’t joo lé. Ke nè á tam ede nè: «ḿ-m̀» ɓaa, è «ḿ m̀». Ke nè á tam ede nè : «oiyo» ɓaa, è «oiyo». Jésu-Krist è njè tam ngarankum tà se ndɔge malang. 20Krist è «oiyo» ke ribe dè ndukunnge le Nube malang ke ɔje kêm’n le ra. E se takul’n á j’ede’n nè «Maje kade è titeke bè» tede kule’n ndubra dè Nube’t. 21Njè kade jè nda njáng se si nan’t tede le Jésu-Krist nga, è Nube. E è Nube kuwe á tɔr jè ade jè dooge le’n. 22Jè nga Nube unde nyankorji le’n ra jé’t a, ade Ndil-Kêmnda ndi dè ɓengre’t jé’t a tɔ. Ndil-Kêmnda nga, è tàpitem nyange ke ndɔn’t j’à j’ingei. 23Ke nè á m’tam è tà lanm karè ɓaa, maje kade Nube ade m’wei kɔke. M’ebe ra’m kaw kêm ɓee-bò ke Corinthe tede kute’n tà nyange ke nange dè si’t kɔke ndêin. 24Jè ndige kon sei njanm-njanm dè kundekêm’t le si nga lé. Nè jè ɓaa, jè njé ra se si kule dè ranel’t le si tede sei ndai njáng dè kundekêm’t le si nga ɓá.

will be added

X\