1 TIMOTHEE 6

1Dooge malang ke ndii se kule ɓer kɔbe de’t ɓai nga, maje kade ilei koje ke deri dè kuwe dege’t se kem̂nda káng. Titeke bè á doo karé bè géa à nede’n ri Nube éké nyan ke jè ndó dooge nga lé a tɔ. 2Ɓerge ke kuwe dege ei njétaakem̂-Kristge nga, ei à kilei koje dè kuwe dege’t nè m ei à kidi de tede k’ei ke ei njétaakem̂-Kristge bè lé. Nè gar-gar ei à rai kule maje dum ke kété kadi de, tede kuwe dege ke dé ra kule maje d’ade de nè nga ei kotárge le Nube. I ndó de tà nyange nè a, i ndeje de a tɔ. 3Ke nè á doo karé unn tà ke rang ke uwe made nan se ngarankum tàge le Kuwe-ɓee le jéi Jésu-Krist éké se nyan-ndó ke uwe made nan se kundekem̂ le jéi lé ndó dooge ɓaa, 4è doo ke ti ra libe kum’n m è ger nyan karé lé. E doo ke ngur naje tà se kɔl nan ra’n pênn-pênn. Naje tàge ke titeke bè nga oje kɔl nan se kem̂kein se taje ndu se girtà ke majelé dè nan’t 5se naje tàge ke nal kunde ngang’n dann dooge ke tàgir le de ndum. Dooge ke tàgir le de majelé nga geri ngarankum tà lé ta. Dé nè nga dé gir titeke kundekem̂ dè Nube’t è rebe kinge nyan. 6Oiyo, loo ke kem̂ doo ra ranel dè nyan ke tò jinn’t ade kem̂’n oso nang pon ɓaa, kundekem̂ dè Nube’t è nyanbaw ke bò tede le’n kerɔte kuwe. 7Oiyo, loo ke ndɔ ke jè reei dè nang nè nga, jè reei se nyan karé bè ji jéi’t lé, j’à j’in-in se nyan karé bè ji jéi’t dè nang nè le kaw’n lé tɔ. 8Ke nè á j’ingei nyankuse a, kubu kule ra jéi’t a tɔ ɓaa, è ke nè kuwe ase jéi. 9An! dooge ke ndigi teli k’ei bawge nga osoi dann nyan sú’t se dann gum’t le ngur nyange ke raikarè ke majelé. Ngur nyange nè nga ile dooge tà yo’t a, dubu de dann tuju’t bɔndum a tɔ. 10Mwei-yo-nar è ngire nyange ke majelé malang. Njé ke nange ke an-in ngɔde go nar’t nga ndemi osoi kɔke heb dè kundekem̂’t le de, uwei nyantosowurge gai-gai ɓuki dè de ei’t kuwe adi wur de ndir’n njàk-njàk. 11Nè i doo le Nube nga, ute rai mbeng kɔke dè nyange’t nè. I tel ɔr nja nyanra ke se dè naje’n a, ɔr nja kile koje dè Nube’t a, ɔr nja kundekem̂ a, ɔr nja tár nan a, ɔr nja koré tà njak a, ɔr nja kaw lom-lom a tɔ têr-têr. 12I ra rɔ maje dè kundekem̂’t lei, i keke jii dè ndikumgajer ke se non ke Nube ɓari tede nga kek-kek. Ndikumgajer ke se non nga, kété i ɔrgo tà’n maje ngain tàkum njékɔrgo tàge’t bule. 13M’unn ndu’m m’adi non Nube’t ke è ngire ndikumgajer le nyange malang a, se non Jésu-Krist’t ke ndɔ ke ɔrgo tà maje ngain tàkum ngar Ponce Pilate’t: 14an dè ndukunnge nè nga sêw-sêw ade nyan karé géa gang kɔté éké ade tà karé bè géa uwe dè de lé a tɔ. I ra titeke bè sár kade Kuwe-ɓee le jéi Jésu-Krist unde’n loo tee’n pan. 15Nube á è njè kɔje ndɔ kade Krist unde’n loo tee’n pan. Nube è ngire ranel. E kuwe karé bere luk-luk á è njè tɔgmong. Nube kuwe karé bere luk-luk á è Ngar dè ngarge a, è Kuwe-ɓee le kuwe-ɓeege a tɔ. 16Nube kuwe se kar’n bere luk-luk á è njè kwei ndan lé. E ndi dann lookar’t ke doo karé bè géa ase gang kɔté lé. Doo ndul karé bè ke ndɔ ke an Nube goto. Doo ndul karé bè ke ɓila asekum kan Nube géa goto a tɔ. Maje kade riɓar ke à tò sár se non è le’n è kuwe. Maje kade è titeke bè kuwe. 17I ndeje bawge ke ndii dè nang nè ɗarinè le kade tii ra de lé a, le kade undei kem̂ de tchên dè nyanbaw ke à tò mbɔr lé nga lé a tɔ. I ndeje de le kade undei kem̂ de tchên ke dè Nube’t. Nube á è njè kade jèi nyange malang kade tooi ra jéi’t ndàj-ndàj tede kade jè ndii dann ranel’t. 18I ndeje de le kade dé njé ra majege, éké kade dé baw nyanrage ke maje a, le kade d’uwe noje se go dege, non dege. I ndeje de le kade d’in kalang dé kai nyange le de d’ade dooge ke rang se de se kem̂nda káng. 19I ndeje de titeke bè le kade dé kebe nyanbawge d’unde konn loo ke maje’t ke ngiring ngiring-ngiring tede kade ndɔ ke rang d’inge’n ndikumgajer ke get a tɔ. 20Hai! Timothée, an go nyan ke Nube um jii’t nga sêw-sêw. Tà najege ke raikarè ke uwe made nan se kundekem̂ lé nga, ute de mbeng. Tà najege le njégos nyangerge ke lanm nga géa, ute de mbeng a tɔ. 21Njé ke nange ke ndigi le teli njé nyangerge ke lanm nè nga ɔsi kundekem̂ le de pat nali. Maje kade kem̂noje le Nube nain se si.

will be added

X\