1 TIMOTHEE 5

1In se bɔ dingem i ndáng’n ɓej-ɓej lé, nè i ndeje’n tite bɔi bè. I ndeje basa titeke i ndeje’n ngakoinge bè. 2I ndeje kon dinyege asenan se koinge bè a, i ndeje dinyege ke nain-in mande ɓai titeke i ndeje’n kon nannige bè se tàgir ke unju nyang-nyang. 3Ngarankum njékei-kingege nga, ile koje dè de’t. 4Ke nè á njèkei-kinge karé aw se ngannenge éké ngannkànnge ndii tutu ɓai ɓaa, è tà le de ei kuwe kété le ndó kile koje dè njékem̂keige le de. D’a ra titeke bè tede kɔr’n kure koto ke ndɔ ke njékoje dege éké kà dege otoi de nga. E ke nè á è nyan ke maje tàkum Nube’t. 5Ngarankum njèkei-kinge ke ndi se kar’n nga, unde kem̂’n tchên dè Nube’t. E liger lagr-lagr dè kɔje se’n tà’t a, dè ndête’n ɓɔk-ɓɔk kada a, ndɔɔ a tɔ. 6Nè njèkei-kinge ke ndi tede ranel le danra nga, né ndi kumgajer ɓai géa, è nain ke doo ke wei ɓá ta. 7Ede de tà dè nyange’t nè nga ndàt-ndàt tede kade doo karé bè ile’n tà dè de’t lé. 8Ke nè á doo karé tɔse kum’n dè njénojege’t le’n éké dè njékem̂-keige le’n kuwe mbain sêw-sêw lé ɓaa, è doo ke naje se ra’n dè kundekem̂’t le’n. E tel majelé ngain dum doo ke unde kem̂’n dè Nube’t lé ɓai. 9Njèkei-kinge ke ɓal’n ase kɔr-mute-mute lé ɓai nga, è tà le ndang ri’n kem̂ magtub ke ɔje dè njékei-kingege nga lé; ke nè á ɓal’n ase kɔr-mute-mute géa, gar-gar maje kade ndɔ ke è njè taa ngaw gir karé bere m è njè taa ngaw kage ke kété-kété lé. 10Gar-gar, njèkei-kinge à è doo ke d’ɔrgo nyanra’n ke maje a, à è njè koto ngannenge maje a, à è njè ra mba a, à è njè togo nja dooge le Nube a, à è njè ra se njé ke ndii dann nyantosowurge’t a, à è njè ra kulege ke maje malang se ndɔ’n-ndɔ’n a tɔ. 11Nè njékei-kingege ke nain-in mande ɓai nga, i ndang ri de go njékei-kingege’t lé. Kerɔte kuwe, loo ke ngur nyange ule por kem̂ de’t ɓaa, ke loon’t nè kuwe dé ndige tur gide de kade Krist le tel taa ngaw. 12Loo ke ei rai titeke bè nga, Nube gangtà dè de’t tede kinye ke ei inyei go ndukunn le de ke desêin ke unni adi Krist nga. 13Dé njékei-kingege ke titeke bè nga kule ra de ke get goto, nè d’ase loo nák-nák se tà kei, tà kei. E ke nè á se kar lé ɓai, nè dé njé kɔje tà neng-neng-ge a, se njé kal bal kur dann nyange ke ndête de’t lé a tɔ. Tà ke kum tam lé géa, dé tam a tɔ. 14Gir’n ke nè á m’ndige kade njékei-kingege ke nain-in mande ɓai teli taai ngaw oji ngannge a, an-in go loo ke kem̂ kei le de sêw-sêw a tɔ. Titeke bè á njèban à inge’n loo kile’n rasɔl dè jéi’t lé. 15Kerɔte, njékei-kingege ke nange tɔi pum go Njè sú dooge’t ɓá ta. 16Ke nè á njètaakem̂-Krist karé ke dinye éké ke dingem aw se njékei-kingege dann njénojege’t le’n éké kem̂ kei le’n ɓaa, maje kade ra se de. Titeke bè á dè njékebe nange le Nube à ɔlé’n pêl tede kade rai se ngarankum njékei-kingege. 17Ngatɔgege ke ɔri non njékebe nange le Nube maje nga, è soo’t kade d’ile riɓar dè de’t nja joo. Nè njé ke ulei ra de ndibe dè kule kɔrgir tà’t éké dè kule ndó dooge nyan’t kuwe mbain á ei dooge ke maje kile riɓar dè de’t nja joo. 18Kerɔte kuwe, Magtub ke tò se ninn’n tam ede nè: «Dig mang ke ade njiye dè ko’t tal njar’n nga, i a kule ɗêng tànn’t kɔge’n kuse lé.» Magtub le Nube tam ɓai ede nè: «Njèkule asekum kinge nyan dè ji’n kuwe.» 19Maje kade njékɔrgo tàge joo éké mute tá ilei tà dè ngatɔge’t. Ke nè á è bè lé ɓaa, i taa tà nè nga lé ɓai. 20Njé ke rai majelé kum de ke kété-kété nga, in se de dè’t tàkum njékebe nange’t le Nube malang tede kade njétaakem̂-Kristge ke rang ɓeli rai kaiya. 21Man m’ndeji tàkum Nube’t a, tàkum Jésu-Krist a, se tàkum dooge ke danrán le Nube a tɔ: an dè nyange nè nga sêw-sêw anje ndête éké kɔr kum doo a tɔ. 22In kalang ile ji dè doo’t tede kum’n kule kɔr non njékebe nange le Nube jinn’t lé. Um nan’t se doo ke rang dè majelége’t le’n lé. I kuwe an go rai sêw-sêw. 23I nga ratur rai dɔ-dɔ. Ebe rai kain mann ke karè kuwe njing-njing. An-in mann nduu ndêin bè tede kem̂i ke rai se ndɔ karé-karé nga. 24Kaiya ra dooge ke nange tò nata ndái-ndái kété pa ɓita dé gangtà dè de’t ɓai. Nè njé ke nange ɓaa, majelége le de tooi sár ɓita kilei ra de ke nata ɓai. 25Kule rage ke maje nga géa tooi nata ndái-ndái tɔ. Kule rage ke majelé nga asikum ɓɔyɔi ra de sár-sár ndan lé a tɔ.

will be added

X\