1 NJE KE THESSALONIQUE 5

1Ngakon jége, tà ke ɔje ndɔ se kàde tel ree le Kuwe-ɓee nga, sei awi ndoo kade doo ndang magtub’n ade sei lé ta. 2Sei kuwe i geri maje, titeke ndɔ tel ree le Kuwe-ɓee nga è tite njèɓog ke ree jêke^ dann ndɔɔ bè. 3Loo ke dooge à ndii tami kedi nè: «Loo tò lom ɓai, loo tò maje ɓai» ɓaa, ke loon’t nè kuwe tuju à ube de nang bus. Tuju à ube de nang bus kade loo kan-in à goto tite ndo ke ɔse dinye ke ndann ngonn nang kekel bè. 4Nè sei ngakon jége ɓaa, i ndii dann tilkus’t á ndɔ nè à ube’n sei nang tite njèɓog lé. 5Tede sei malang nga sei ngann lookarge se ngann dann kàdege. Jèi nga jèi le dann ndɔ lé a, le tilkus lé a tɔ. 6Bè ɓaa, adi jè tooi ɓi tite njé ke rang bè lé; nè adi jè ndii dè nja jéi’t, adi jè ndii kum jéi karè. 7Njé ke tooi ɓi nga, è dann ndɔɔ á tooi ɓi, njé ke yibe ule mbe dè de’t nga, è dann kada ndái-ndái á yibe ule’n mbe dè de’t a tɔ. 8Nè jéi ke jéi ngann dann kàdege nga adi jè ndii kum jéi karè. Adi j’unni kundekem̂ se tár nan ke nyan rɔ le jéi. Adi j’unni kundekem̂ tchên dè kaje’t tite jɔkɔ le jéi a tɔ. 9Ndɔ ke Nube ɓar jèi le kade wong le’n nain dè jéi’t lé, nè le kade j’ingei kaje takul Jésu-Krist. 10Jésu-Krist wei tede jéi, tede kade ke nè á jè ndii kumgajer éké j’weii géa j’umi se’n nan’t bɔk. 11Gir’n ke nè á maje kade i ndeji nan a, ulei dingem kem̂ nan’t a tɔ, titeke i rai kété ɓá nga. 12Ngakon jége, jè deje sei kuwe ɓai le kade ilei koje dè njé ke rai kule dann si’t. Tede ei nè nga ulei ra de ndibe ɔri non si, ei ndeji sei le kade umi nan’t bɔk se Kuwe-ɓee a tɔ. 13I ɗɔyi de ngain a, i tári de a tɔ, tede kule ke ei rai dann si’t. I ndii se nan se kem̂lom. 14Ngakon jége, jè ndeje sei le kade in-in se njé ke ndii à rai nyange ke pás-pàs. Ulei dingem kem̂ njé kem̂ tête mannge. I geti njé tɔg gotoge a, ilei kem̂ si pon dè dooge’t malang a tɔ. 15Kem̂ si dè ra si’t le kade doo karé bè géa tel ra majelé se doo ke rang gute made’t lé. Nè ɔri nja nyan ke maje tênn-tênn i rai se nan a, i rai se dooge ke rang malang a tɔ. 16I rai ranel se ndɔ si-ndɔ si. 17Ebi’t kɔje tà se Nube lé. 18I rai Nube oiyo dè nyange’t malang. E á è nyan ke Nube ndige le kade sei ke umi nan’t bɔk se Jésu-Krist i rai. 19Ɔgi Ndil-Kem̂nda loo ra kule le’n lé. 20I nedi tà ndejege le njékɔrgir tàge le Nube lé. 21I teri nyange malang an-in, i taai è ke maje. 22Majelé ke rara géa ɔgi ra si dè’t kɔke. 23Maje kade Nube ke kem̂lom in ra’n è’t kuwe tel sei ke dooge le’n ke i tooi se ninn si gai. Maje kade Nube ngonm ra si bere mbak, ngonm ndil si se nganrankum ra si a, ngonm danra ra si a tɔ, le kade tà karé géa uwe dè si ndɔ tel ree’t le Kuwe-ɓee le jéi Jésu-Krist nga lé. 24E ke njè ɓar sei nga umi kem̂ si dènn’t. E kuwe à ra nyange malang kɔr son’n kade sei. 25Ngakon jége, ɔji tà se Nube tede le jé tɔ. 26Uwei ngakon jége malang kàde si’t sem̂ i rai de lapya adi jè. 27M’ra ndoo ra si’t se ri Kuwe-ɓee: Maje kade i tutei magtub nè nga adi njétaakem̂-Kristge malang ooi. 28Maje kade kem̂-maje le Kuwe-ɓee le jéi Jésu-Krist nain se si.

will be added

X\