1 NJE KE THESSALONIQUE 4

1Ngakon jége, pa njiye ke le taa’n kum Nube nga sei i ndói ra jé’t ɓá. Kerɔte kuwe, sei rai titeke jè ndó’n sei nga ɓá. Nè né è bè géa, jè deje sei a, jè ndeje sei se ri Kuwe-ɓee Jésu a tɔ, le kade awi kum si ke kété-kété ɓai. 2Ndukunnge ke in ra Kuwe-ɓee Jésu’t nga, jè ndó sei j’ade i geri ɓá. 3Nyan ke taa kum Nube nga è le kade ra si unju nyang-nyang a, le kade ɔgi ra si dè tò se nan ke kaiya’t a tɔ. 4Maje kade nanan géa dann si’t ger rebe taa neen’n ke kinge’n le ndii’n se ra’n ke unju nyang-nyang se riɓar’n a tɔ. 5Inyei ra si adi ngur nyange ke majelé titeke njé ke geri Nube lé rai nga lé. 6Maje kade njètaakem̂-Krist sang ngomande éké dinye ke rang ra’n majelé se ngokon’n éké kon nann’n lé. Ndɔ ke j’ede sei tà nè ndàt kété ɓá, nè jè tel j’ede sei ɓai tite Kuwe-ɓee Nube à dalban nyange nè nga malang. 7Nube ɓar jéi le kade jè ndii se ra jéi ke mine tanm-tanm lé, nè le kade jè ndii se ra jéi ke unju nyang-nyang. 8Gir’n ke nè á doo ke ute tàge nè nga mbeng ɓaa, è dooge á ute de mbeng lé. Nè è Nube ke njè kade sei Ndil-Kem̂nda le’n kuwe á ute’n mbeng. 9Tà ke ɔje dè tár nan le si sei ngakon nange éké kon nann nange ke njétaakem̂-Kristge nga, sei ɓaa awi ndoo kade doo ndang magtub’n ade sei lé ta. Nube ndó sei kuwe tà ke ɔje dè tár nan ade i geri kété ɓá. 10E nyan ke sei rai se ngakon sige ke ndii kem̂ ɓeekon ke Macédoine bere mbak ɓá. Nè né è bè géa jè j’ule dingem kem̂ si sei ngakon jége’t le kade awi kum si ke kété-kété kuwe ɓai. 11Uwei ra si mong le ndii lom, i tɔsi kum si dè nyange ke ɔje dè si, i rai kule se ji si titeke ndɔ ke j’unn’n ndu jé j’ade sei nga. 12I rai titeke bè le kade njé ke natage ilei koje dè si’t a, le kade sei awi ndoo nyan ji doo karé ke rang’t lé a tɔ. 13Ngakon jége, tà ke ɔje dè dooge ke weii, jè ndige le kade i geri maje. Titeke bè á a i rai ra si ndoo tite dooge ke rang ke nyan kundekem̂ tchên dè’t le de goto nga lé. 14Jésu wei a, è unde loo tee dann njé ke koo’t a tɔ. Njé ke undei kem̂ de dènn’t á weii nga, jè j’unde kem̂ jé tchên titeke Nube à ade undei loo teei dann njé ke koo’t le teli ndii kumgajer takul’n. 15An-in! jè j’ede sei tà nè nga se go tà karé le Kuwe-ɓee ke ndɔ ke tam: jèi ke j’à ndii kumgajer sár ndɔ tel ree le Kuwe-ɓee Jésu nga, j’à j’awi kété non njétaakem̂-Kristge ke weii nga lé. 16Ndukunn à in ra Kuwe-ɓee’t kuwe. Loo ke ndu doo ke bò ke danrán à ɓar beng a, burunju le Nube à ɓar a tɔ. E Kuwe-ɓee kuwe à in danrán se ra’n le tel ree. Ke loon’t nè kuwe, njé ke undei kem̂ de dè Krist’t ke weii nga à undei loo teei pa ɓita. 17Jéi ke j’à ndii kumgajer dè nang nè sár ndɔ tel ree le Krist nga, d’ade koto jèi kalu-kalu se de nan’t kaw se jéi dann bum’t dɔ danrán nú le kade j’ɔji non Kuwe-ɓee. Titeke bè á j’à nain se Kuwe-ɓee njing. 18I ndeji nan se tàge nè nga adi kem̂ si oso’n nang pon.

will be added

X\