1 NJE KE THESSALONIQUE 2

1Ngakon jége, sei kuwe i geri mbak titeke kaw ke ndɔ ke j’aw ra si’t nga, tel è nyan ke raikarè lé. 2Sei geri titeke ndɔ ke nyankem̂kon se taje ndu ase jè nák-nák kem̂ ɓee-bò ke Philippes. Nè né è bè géa, Nube ade j’oré tà jè njak j’ile’n mber Tà ke Maje le’n j’ade sei dann nyange gai-gai ke rɔi se jé. 3Tà ke j’ede dooge jè ndeje’n de nga tò gai. Tà nè nga j’unde gir’n dè tà ke à ur se doo walé lé a, j’unde gir’n dè tàgir ke majelé’t lé a, jè sang le libe kum doo karé taa’n nyan le’n ndan lé a tɔ. 4Nè Nube ter jè njúng ɓita um kule kile mber Tà ke Maje le’n nga ji jé’t ɓai. Jè j’ile mber Tà ke Maje tede taa’n kum dooge lé, nè le taa’n kum Nube ke njè ter ɓengre jé. 5Sei geri titeke ndɔ karé bè géa, jè tam tà jè libe’n kum doo le taa’n nyan le’n ndan lé a, j’ede gos le taa’n nar le doo le kite’n dènn’t lé a tɔ. Nube an mbak. 6Jè sang riɓar ke in ra dooge’t lé a, ke in ra si sei’t éké ra njé ke rang’t nga ndan lé a tɔ. 7Kerɔte kuwe, j’asekum kunde nyankoto ke wɔi dè si’t le kul’n ra jé tede k’ee ke njékawkulege le Krist bè lé. Nè ndɔ ke jè ndi lom dann si’t asenan se kon ngannge ke tɔse kum’n dè ngannenge’t maje oto’n de bè. 8Jè géa, ndɔ ke jè tɔse kum jé dè si’t titeke bè tɔ. Gir’n ke nè á ndɔ ke j’an è soo’t le kade sei Tà ke Maje le Nube á se kar’n lé. Nè jè ndi dè nja jé’t le kinye ra jé kuwe kade yo tede le si tede k’ee ke sei kotárge le jé. 9Ngakon jége, loo ke ndɔ ke j’ile mber Tà ke Maje le Nube j’ade sei nga, j’ule ra jé ndibe jè ra kule j’ɔr yàl-yàl ndɔ a, kada a tɔ. Jè ra titeke bè tede le tel kɔii’n dè doo karé bè dann si’t lé. Ké kem̂ si olé dè’t ɓila lé sár wa? 10Nyanra jé se pa njiye jé ke ndɔ ke jè njiye’n dann si’t nga tooi se ninn de a, tooi se dè naje’n a tɔ. Doo asekum kile tà dè jé’t lé. Sei njétaakem̂-Kristge an-in a, i geri a tɔ. Nube géa an a, ger a tɔ. 11Taɓai sei geri mbak titeke jè tɔse kum jé dè si’t karé-karé malang titeke bɔ ngonn ra’n se ngannenge bè. 12Jè ndeje sei a, j’ule dingem kem̂ si’t a, le kade pa njiye si ile riɓar dè Nube ke njè ɓar sei kade on-in ɓee se’n a, ingeii ndubra le’n nga a tɔ. 13Loo ke ndɔ ke j’ede sei tà le Nube j’ade ooi nga, sei taai dè ɓengre si’t. Sei taai tà nè nga ke tà ke in tà Nube’t kerɔte kuwe m in tà doo’t karè lé. Gir’n ke nè á tà nè nga ra’n kule kem̂ si sei njétaakem̂-Kristge. E ke nè á è gir nyan karé ke rang ke ade jè ra’n oiyo se ndɔ jé-ndɔ jé nal kebe’t. 14Ngakon jége, ndɔ ke nyankem̂kon ra njékebe nange le Nube ke ndii kem̂ ɓeekon ke Judée ke umi nan’t bɔk se Jésu-Krist. Nyankem̂kon ke dooge ke ɓee le si rai se si nè nga, è gar è ke ndɔ ke Juipge rai se se de dé njékebe nange le Nube ke ndii kem̂ ɓeekon ke Judée nga tɔ. 15E dé Juipge nè nga kuwe á ndɔ ke dé tɔl Kuwe-ɓee Jésu se njéribe-dè-tàge ke tà Nube’t. Jè géa, ndɔ ke d’ɔr jè kororoi tɔ. Dé dooge ke dé taa kum Nube lé a, dé njé kɔse tà se dooge malang a tɔ. 16D’ɔge jè loo kile mber le kade dooge ke ei Juipge lé ingei kaje. Dé ra titeke bè d’ile’n kaiyage le de dè made’t se ndɔge malang. Nè loo tɔl tà’n ɓaa, wong le Nube oso dè de’t ɓai. 17Ngakon jége, j’an-in kum nan lé kò’n tò mbɔr ndêin ta. Nè ngarankem̂ jéi ɓaa inye nan lé. Ngur tel kaw kan kum si ra jè pênn-pênn. 18Gir’n ke nè á ndɔ ke jè ndige le tel kaw ra si’t. Kerɔte kuwe, man Paul m’sang rebe’n nja karé éké nja jooge bè. Nè Sú ɔge jè loo’n bang. 19Loo ke ndɔn’t Kuwe-ɓee le jéi Jésu à tel ree ɓaa, nyan kundekem̂ tchên se nyan ranel le jé nga ké è sei lé ɓai wa? Dè jé à in tchakm nonn’t tede kem̂ ndɔn’t nè nga sei a i tooi kasinan se jɔkɔ kunn banga le jé bè. 20Oiyo, sei sei nyan ndubra le jé se nyan ranel le jé kerɔte kuwe.

will be added

X\