1 NJE KE THESSALONIQUE 1

1Man Paul se Silas se Timothée jè ndang magtub nè j’ade njékebe nange le Bɔ jéi Nube a, se le Kuwe-ɓee le jéi Jésu-Krist ke ndii kem̂ ɓee-bò ke Thessalonique. Maje kade kem̂-maje se kem̂lom nain se si. 2Jè ra Nube oiyo se ndɔge malang tede le si. Jè ɓar ri si se ndɔ karé-karé loo kɔje tàge’t le jé se Nube. 3Non Bɔ jéi Nube’t nga, kem̂ jé olé dè kule ke sei rai dè kundekem̂’t le si. Kem̂ jé olé dè ra si ke ulei ndibe dè tár nan’t a tɔ. Non Bɔ jéi Nube’t nga, kem̂ jé olé dè korè tà njak le si dè kundekem̂ tchên dè Kuwe-ɓee le jéi Jésu-Krist nga a tɔ. 4Ngakon jége, jè ger titeke Nube tár sei a, tɔr sei le kade sei lennge a tɔ. 5Tà ke Maje ke ndɔ ke j’ile mber’n j’ade sei nga, è se tà ke tà jé’t karè lé, nè ndɔ ke jè ra nyankɔbege se tɔgmong ke Ndil-Kem̂nda ade jè. Jè nda kem̂ jé káng titeke Tà ke Maje nè nga è ngarankum tà. Sei geri nyan ke jè ra tede le si, loo ke ndɔ ke jè nain’n dann si’t ɓai. 6Sei i ndaji nyanra jé jè se nyanra Kuwe-ɓee. Sei taai Tà ke Maje se ranel le Ndil-Kem̂nda dann nyantosowurge gai-gai ke ndɔ ke ra sei. 7Titeke bè á sei teli sei nyan-ndaje kum le njétaakem̂-Kristge malang ke kem̂ ɓeekonge ke Macédoine se Achaie. 8Kerɔte kuwe, Tà ke Maje le Kuwe-ɓee in ra si’t aw tee kem̂ ɓeekonge ke Macédoine se Achaie. Tá è è ke nè á karé lé, nè kɔbe kundekem̂ dè Nube’t le si nga oso se loo mbit-mbit ade j’aw ndoo kɔr ser’n lé ta. 9Loo ke ndɔ ke j’aw ɓéee le si nga, sei uwei jè ke ra si’t. Sei turi gide si adi mage polége ɔsi wan i teli ke ra Nube’t tede le ra kule kade’n è Nube ke get ke njèndi kumgajer. Nyange nè malang ke ndɔ ke i rai nga, dooge à ɔdi nan kɔr ser’n ɓai. 10Ɗarinè sei nginei Ngonn le Nube ke à in danran. Ngonn nè nga, è Jésu ke ndɔ ke Nube ade unde loo tee dann njé ke koo’t. Jésu à in danrán tel ree le kɔr jèi tà wong ke ndi à ree.

will be added

X\