1 PIERRE 4

1Krist nga nyankem̂kon ra ra’n. Sei géa, maje kade unni tàgir le Krist nè nga ke nyankate le rɔ’n se kaiya. Doo ke nyankem̂kon ra ra’n nga à ebe ra’n dè ra majelé’t. 2E ebe ra’n dè ra majelé tede le ra nyange ke kem̂ dooge ndige nga ndan lé, nè le ra nyan ke kem̂ Nube á ndige loo ke è ndii’n kumgajer dè nang nè ɓai. 3Kété mari sei ndigi rai nyange ke uwei kem̂ dooge ke geri Nube lé tá ngain. Nè adi ase bè ɗarinè ta. Tede kété mari sei rai nyange ke pás-pàs. Sei njé ra ɓer le ngur nyange gai-gai a tɔ. Kété nga, sei njé ra ɓer le yibege a, sei doo nyankusege a, sei gon kain yibege a, se njé kule ra de mbiriri dann polé mage ke tò yêr tàkum Nube’t. 4Kebe ke sei ebi ra si dè ra nyange ke pás-pàs nan’t se njé ke geri Nube lé nga, ɗarinè an-in ke nyankɔbe. Gir’n ke nè á ei unni gir taji sei mbɔk-mbɔk. 5Nè d’a d’ɔr gir nyanra de le kade Nube ke ndi dè njann’t tchên le gangtà dè njé ke ndii kumgajer se njé ke weii. 6Gir’n ke nè á njé ke weii ɓá géa, d’aw d’ile mber Tà ke Maje nga d’ade de. Dé gang tà dè de’t tite gute dooge ke rang loo ke ndii se dè de dɔ ɓai. Nè ɗarinè asi teli ndii kumgajer takul Ndil-Kem̂nda tite Nube ndii’n kumgajer nga tɔ. 7Ndɔ le ngei nyange malang è ngɔr ta. I njiyei se kumkunju’n a, i ndii kum dè kɔje tà se Nube’t a tɔ. 8I tári nan se kem̂nda káng. E ke nè á i rai kété gar-gar. Oiyo, tár nan nga utu dè kaiyage bule ngain. 9I rai nan mba se kem̂nda káng anje ɓar tà nyon-nyon. 10Nube ade sei nyan-nojege ke se ri de-ri de. Bè ɓaa, maje kade nanan géa kai tà nyan-noje ke Nube ade’n nga ade njé ke rang se’n tɔ. Kerɔte kuwe, sei sei njékan dè nyan-majege le Nube. 11Ke nè á doo karé aw se nyan-noje ke ɔje dè kɔrgir tà ɓaa, maje kade ile’n mber tà le Nube se go rebe’n. Ke nè á doo karé è ngonn njèkule le madennge ɓaa, maje kade ra kule nè nga se tɔgmong ke Nube ade’n. I rai titeke bè tede kade d’ile’n riɓar dè Nube’t ɔje dè nyange malang takul Jésu-Krist. Riɓar se tɔgmong ei le Nube sár se non. Maje kade è titeke bè kuwe. 12Kotárge le’m, nyan ke tee dè si’t asenan se por ke on bilm-bilm bè nga, an-in ke nyankɔbe ke tee dè si’t pan lé. E nyan ke tee le nan kundekem̂ le si. 13Nè maje kade i rai ranel tede korè ke sei oréi nan se Krist dè nyankem̂konge ke ra’n. Ndɔ ke Krist à tel ree dann ndubra le’n tàkum dooge’t malang ɓaa, sei géa a ali ra si tɔ. 14Ke nè á dé taje sei tede ri Krist ɓaa, i rai ranel tede Ndil Nube ke njè ndubra nain se si. 15Maje kade doo karé bè géa dann si’t inge nyankem̂kon ɔje dè tɔl doo éké ɓoge, éké ra majelé éké kin gang ke dann nyan ke ɔje dènn’t lé nga lé. 16Nè ke nè á nyankem̂kon ra doo tede k’ee ke è njètaakem̂-Krist ɓaa, maje kade ade ra’n sɔl’n lé, nè maje kade ra Nube’t oiyo tede ri Krist ke è unn. 17Ndɔ gangtà nain ngɔr. D’a d’unn gir dè kosdooge’t le Nube. Ke nè á d’unn gir gangtà dè jéi jèi’t kuwe kété ɓita ɓaa, ké le njé ke mbati kundei kem̂ de dè Tà ke Maje’t nga à tò bain ta wa? 18Magtub ke tò se ninn’n tam titeke bè ede nè: «Ke nè á doo ke njé ra nyan se dè naje’n loo kinge kaje le’n tur ɓaa ké njè kile koje dè Nube’t lé se njè ra majelé à rai se ra de bain ta wa?» 19Bè ɓaa, njé ke nyankem̂kon ra de tede kile ke ilei koje dè Nube’t nga, maje kade inyei ra de bere mbak ji Njèkunde de’t, rai nyange ke maje kum de kété. Nube ke njèkunde de nga inye go ndukunn le’n ndan lé.

will be added

X\