1 PIERRE 3

1Sei dinyege géa, ulei dè si adi ngaw sige. Ke nè á njé ke nange ke undei kem̂ de dè tà’t le Nube lé géa à teli kundei kem̂ de dè’t takul nyanra si m takul tà tam si lé. 2D’a d’unde kem̂ de dè Nube’t takul nyanra ke maje ɔr ndàt ke d’an a, takul kule dè le si a tɔ. 3I sangi rebe rai mande se nyange ke ra si’t nata karè lé. Nyange ke tite kuwe dè si a, tule ninge-kasege ke ra se nar-ɔr a, tule kubuge ke maji ngain ke mbirin-mbin a tɔ. 4Nè maje kade i sangi mande ke dè ɓengre si’t tá. Kaw lom-lom se ndi lom á ei nyange ke à udi lé taɓai ei nyange ke gate de è ngain tàkum Nube’t. 5E ke nè á ei kubu kule ra’t le dinyege ke kété mari ke tooi se ninn de a, ke undei kem̂ de tchên dè Nube’t a tɔ. Dinyege nè nga, ei kuwe in-in se kem̂ de ulei dè de adi ngaw dege. 6Titeke bè á ndɔ ke Sara ile’n koje dè Abraham’t ɓar’n ede nè: «Ngar le’m». Ke nè á sei rai nyan ke maje se ndɔ si-ndɔ si anje ɓel nyan karé ɓaa, a i teli k’ei ngann Sara ke dinyege. 7Sei ngaw dinyege géa i ndii se dinyege le si se kumkunju’n. Maje kade i geri titeke dé tò d’asenan se jó ke ɓann bè. I tɔsi kum si dè de’t a, ilei riɓar dè de’t a tɔ. Kaje ke Nube uwe’n se si noje nga, dé géa d’a d’inge se si nan’t. I rai titeke bè tede kade nyan karé bè géa ɔge sei loo kɔje tà se Nube lé. 8I ndigi tà go nan’t malang a, unni kum si dè nan’t lé a, i ndigi nan tite ngakon nange bè a, i rai kem̂kanm se nan a, ulei dè si adi nan a tɔ. 9I rai majelé se doo gute majelé ke ra se si’t lé a, i teli taji doo ndu ke taje sei nga lé a tɔ. Nè i tɔri ndu si dè dooge’t tede sei nga Nube ɓar sei kade ingei ndutɔr. 10Magtub ke tò se ninn’n tam ede nè: «Doo ke ndige le ndi lom a, ndige le kan ndɔge ke maje ɓaa, maje kade ebe ra’n dè tà ke majelé’t a, dè tà libe kum dooge’t a tɔ.» 11Maje kade ute ra’n mbeng dè nyanrage ke majelé’t, tel ra nyan ke maje se ndɔ’n-ndɔ’n. Maje kade sang kem̂lom a, ɔr dè nja’n têr-têr a tɔ. 12Oiyo, kum Kuwe-ɓee tò dè njé ra nyan se dè najennge. E ur mbi’n oo’n tàge ke ɔji se’n. Nè è unn kum’n mbeng dè njé ra nyan majelége.» 13Ke nè á ra si ɔlé pêl-pêl dè nyanra ke maje’t ɓaa, ké nan à in ra se si nyan ke majelé wa? 14Ke nè á ingei kem̂kon tede nyanra si ke se dè naje’n ɓaa, ali ra si. I ɓeli dooge lé a, adi kem̂ si olé bɔt-bɔt lé a tɔ. 15Krist kuwe karé bere á è Kuwe-ɓee le si. Undei nin se ninn’n dè ɓengre si’t. Uwei dè nja ra si le kade nanan ke deje sei tà ɔje dè kundekem̂ tchên’t le si ɓaa, ɔri gir adi nin. 16Nè ilei nanan géa dè’t se ndu noje a, se kile koje a tɔ. Adi tàgir ke kem̂ si’t è ke maje se ndɔge-ndɔge. Titeke bè á njé tête tà kunde tà sige’t se njé tam tàge ke majelé dè pa njiye si ke maje ɔje dè njétaakem̂-Kristge nga, à ndii dann rasɔl’t. 17E soo’t kade nyankem̂kon rai ɔje dè nyanrai ke maje. E ke nè á è nyan ke kem̂ Nube ndige dum kade nyankem̂kon rai ɔje dè nyanrai ke majelé. 18Krist nga kuwe géa, nyankem̂kon ra’n nja karé bere luk-luk ke ngang’n tede nyanra majelé le dooge. Krist è njè ra nyan se dè naje’n. Nyankem̂kon ra’n ɔje dè nyanra majelé le dooge tede le tel ree’n se si ra Nube’t. Danra’n á dé tɔl nè è tel ndi kumgajer takul Ndil-Kem̂nda. 19Takul Ndil-Kem̂nda nè á Krist aw’n sár ile’n mber ade ndilge ke tooi dangai’t. 20Ndilge ke tooi dangai’t nè nga, ei dooge ke njé dum nange ke kété mari kem̂ ndɔge’t le Noé. Nè ndɔ ke Nube ile kem̂’n sár ade Noé ra’n bato tɔl mbas. Bato nè nga dooge sɔsɔ bere á awi kem̂é aji yo ndɔ ke mann bêlm ndum’n gute dooge ndarak dè nang nè. 21Mann bêlm nè nga è nyan-tɔje ke ɔje dè kule doo manné njonm. Kule doo manné njonm nga è gir kaje ke sei ajii ɗarinè. Kule doo manné njonm nga ɔr nyan ke mine le danra ra si’t lé, nè è ndukunn ke sei unni se tàgir ke maje ke kem̂ si’t adi Nube. Kule doo manné njonm nga aje sei takul kunde ke Krist unde loo tee dann njé ke koo’t. 22Krist nga in aw ndi dè jikon Nube’t dɔ danrán. Dooge ke danrán se njékonɓeege a, se njé tɔgmong-ge malang a tɔ, ulei dè de adi nin.

will be added

X\