1 PIERRE 2

1Bè ɓaa, inyei go kem̂yêr se nyanra ke se go ngein, se kede gos, se kem̂kein a, se tam tede nan a tɔ. Inyei go nyange nè bere mbak kɔke. 2Adi ngur tà le Nube ra sei pênn-pênn titeke ngur kil kum kate mba ra’n ngann kidege bè tɔ. Takul mba á sei a rai tɔge ke kété-kété dè kaje’t. 3Kerɔte kuwe, sei nan-in maje le Kuwe-ɓee an-in ɓá ta. 4Agi ngɔr ke ra Kuwe-ɓee Jésu ke è kuberi her ke kumgajer. Kuberi her ke kumgajer nè nga, dooge mbati nin, nè gate’n è ngain tàkum Nube’t á è ɔr’n unde’n gai. 5Sei géa i tooi asinan se kuberi her ke tò kumgajer. Dé rɔte sei tà nan’t d’ade i teli sei kei le Ndil a, i teli njékuje nyan-mesege ke i tooi se ninn si tede kade unni nyankuje-mesege se goo Ndil Nube adi nin. Nube à taa nyankuje-mese nè nga takul Jésu-Krist. 6Gir’n ke nè á dé ndang’n kem̂ Magtub ke tò se ninn’n d’ede nè: «An! man m’ɔr kuberi her ke gate’n è ngain ke njè mong dè kum kei m’unde’n kem̂ ɓee-bò ke Sion. Nanan ke unde kem̂’n dènn’t ɓaa à ndi dann rasɔl’t ndan lé.» 7Kuberi her nè nga è riɓar tede le si sei njétaakem̂-Kristge. Nè njé ke ei njétaakem̂-Kristge lé ɓaa «Kuberi her ke gate’n è ngain ke njékunde keige mbati nin nga, tel è kuberi her ke njè mong dè kum kei.» 8Loo ke rang’t ɓai, Magtub le Nube ke tò se ninn’n tam ede nè: «Kuberi her nè nga tel è jig ke tuge de ade d’aw tebel-tebel. E her ke tuge de ade d’oso.» Dooge nè nga, kuberi her nè tuge de ile de tede kunn mbi dè tà’t le de. E ke nè á è nyan ke d’ɔje’n dè de. 9Nè sei ɓaa, sei girkà ke d’ɔr sei ke njékuje nyan-mesege ke gir si è ngar. Sei sei girkoje dooge ke i tooi se ninn si gai. Sei kosdooge le Nube ke kinge’n kuwe deri. E ɓar sei ade undei dann tilkus’t i teei, i reei dann lookar’t tede kade ilei mber nyanrage ke maje dum nga. 10Sei nga kété mari sei kosdooge le Nube lé, nè ɗarinè sei dooge le’n ta. Sei nga kété mari ingei kem̂ tin mbit dè majelége’t le si ndan lé, nè ɗarinè Nube ade kem̂’n tin mbit dè majelége’t le si. 11Kotárge le’m, sei tooi asinan se njé nanmge a, se mbage ke ndii dè nang nè. M’ndeje sei kade ɔgi ra si dè ngur nyange le danra ke ndi à rɔ se ngarankum ra si. 12Dooge ke geri Nube lé nga tami tede si a, an-in sei ke njè ra majelége a tɔ. Nè né è bè géa, i njiyei dann de’t se maje’n tede kade teri nyanra sige ke maje. Titeke bè á à ilei riɓar dè Nube’t ndɔ ke à ile’n kum’n dè de’t. 13Ulei dè si adi njékon sige malang ke dooge d’unde de dè si’t tite ngar-ɓeege éké njékonɓeege ke bò tede le Kuwe-ɓee. 14Ulei dè si adi ngarge tede ei ngann njékulege le Kuwe-ɓee tede kade kure nyanra majelé le njé ra majelége ɔde’n kum de a, le kade njé ra majege ingei pite a tɔ. 15Nube ndige kade i rai nyange ke maje tede kade uwei tà njé kem̂ tɔ kuju tà lége dè tàge ke tami se si dè mbe’t nga. 16I njiyei asinan se dooge ke ndii dè de pal. Edi gos dè ndi dè pal’t le ra’n nyange ke majelé lé. Nè sei i ndii dè si pal le ra ɓer le Nube. 17Ilei riɓar dè dooge’t malang. I tári ngakon sige ke njétaakem̂-Kristge malang. I ɓeli ndil Nube a, ilei riɓar dè ngar’t a tɔ. 18Sei ngann njéndige, ulei dè si adi kuwe sige a, ilei koje ke deri dè de’t a tɔ. Kuwe sige ke njé kem̂ majege ke awi lom-lom tá ulei dè si adi de se kar de lé, nè kuwe sige ke njé ndɔje lɔk-lɔkge géa ulei dè si adi de a tɔ. 19Ke nè á doo orè tà’n njak dè nyankumndoo ke ra’n nal naje’n tede koje ke ile dè Nube’t ɓaa, è nonkar ke d’ade’n. 20Doo ke orè tà’n njak dè kunde ke d’unde’n ɔje dè nyanra majelé le’n nga, ké d’a kile riɓar dènn’t titeke bain wa? Nè ke nè á doo orè tà’n njak dè nyankem̂kon ke ra’n ɔje dè ra maje le’n ɓaa, è nonkar ke Nube kuwe ade’n. 21E è ke nè á è nyan ke dé ɓar sei tede kade i rai. Krist nga ndɔ ke inge kem̂kon tede tà le si. Nyankem̂kon ke ndɔ ke ra’n nga è inye ke nyan-tɔje le si tede kade sei kuwe géa unni dè nja’n têr-têr tɔ. 22Loo naje’n goto. Krist nga ndɔ ke ra kaiya karé bè lé a, tà libe kum doo tee tànn’t ndɔ karé bè lé a tɔ. 23E nga ndɔ ke dé taje’n, nè è taje de gute made’t lé. Ndɔ ke dé ra se’n nyankem̂kon, nè è tam se de ede nè a an-in ɓai lé a tɔ. Nè è inye ra’n bere mbak ji Nube’t ke njègangtà se dè naje’n kuwe karé. 24Krist nga oto majelége le jéi dènn’t aw’n weii’n kade kage-ke-dese’t tede kade j’ebi ra jéi dè ra majelége’t le jéi le teli ndii kumgajer ɔje dè nyanra ke se dè naje’n. Takul dòge ke è inge rann’t á j’aji. 25Kété sei tooi asinan se batege ke ndemi awi yo-yo, nè-nè bè. Nè ɗarinè, dé tel se si ke ra è ke njèkul si se njèkan dè ngarankum ra si a tɔ.

will be added

X\