1 JEAN 3

1An-in! tár ke bò ke Bɔ jéi Nube tár jèi á ɓar’n jèi ke ngannenge. Jèi jèi ngannenge kerɔte kuwe. Gir’n ke nè á dooge ke dè nang nè geri jèi ke ngann’n lé. Dé ger jèi ke ngann Nube lé tede Nube géa dé ger’n lé. 2Kotárge le’m, ɗarinè jèi ngann Nube. Nè táa ke jè táai nan se’n nga, ɗarinè tò nata ndái-ndái lé ɓai. Nè né è bè géa, nyan karé ke jè geri á tò nè: Ndɔ ke Krist à tel kunde loo tee pan ɓaa, j’à tooi táai nan se’n tcha-tcha tede j’à j’an-in nin se kum jéi ndan-ndan kem̂ ndɔn’t nè nga. 3Nanan ke unde kem̂’n tchên dè Krist’t ɓaa, maje kade ade ra’n unju nyang-nyang titeke Krist géa ade ra’n unju’n nyang-nyang bè tɔ. 4Nanan ke ra kaiya se ndɔ’n-ndɔ’n ɓaa altà tà gute-ndu’t, tede kaltà tà gute-ndu’t nga è kaiya. 5Sei geri mbak titeke Krist unde loo tee tede kɔr majelé kum kɔke. Nè è nga majelé karé bè géa goto rann’t. 6Nanan ke um nan’t bɔk se’n ɓaa, ebe ra’n ra majelé se ndɔ’n-ndɔ’n. Nanan ke ra majelé se ndɔ’n-ndɔ’n ɓaa, an Krist lé a, ger’n lé a tɔ. 7Ngannge, adi doo karé sú sei lé. Nanan ke ra nyan ke se dè naje’n se ndɔ’n-ndɔ’n ɓaa, è njè ra nyan se dè naje’n titeke Krist ee’n njè ra nyan se dè naje’n bè tɔ. 8Nanan ke ra kaiya se ndɔ’n-ndɔ’n ɓaa in ra njè kem̂ majelé’t, tede njè kem̂ majelé nga unn gir ra majelé se ndɔge malang kété mari ke desêin. Gir’n ‘ke nè á Krist, Ngonn Nube unde’n loo tee’n pan tede le tuju nyanrage le njè kem̂ majelé nga kɔke. 9Nanan ke Nube kuwe oje’n ɓaa à ebe ra majelé se ndɔge malang, tede ko nyan le Nube urkei kem̂n’t. E asekum ra majelé kum’n ke kété-kété lé tede è Nube kuwe á oje’n. 10E ke nè á d’a ger’n ngann Nube se ngann le njè kem̂ majelé nga njai-njai. Nanan ke ra nyan ke se dè naje’n lé se ndɔ’n-ndɔ’n ɓaa, è le Nube ndan lé. Nanan ke tár ngokon’n lé ɓaa, è le Nube ndan lé tɔ. 11I tári nan. E ke nè á è tà ke d’ede sei kété mari ke desêin d’ade ooi ɓá. 12Ade jèi tite Cain bè lé. Cain nga ndo ke è doo le njè kem̂ majelé. Gir’n ke nè á ndɔ ke uje’n kɔbe ngokon’n. Ké ri á è gir kade ndɔ ke uje’n kɔbe ngokon’n wa? E uje kɔbe ngokon’n tede nyanra’n ke majelé, nè nyanra ngokon’n á è se dè naje’n. 13Ngakonmge, ke nè á dooge ke dè nang nè ɔri sei njêt ɓaa, adi ndil si tee an-in soin-soin lé. 14Jèi ɓaa, jè geri mbak titeke jè tugei loo yo jè gangi j’uri loo ndikumgajer’t. Tede jèi ɓaa, jè geri gir tár ke jè tári ngakon jéige nga. Nanan ke tár ngokon’n lé ɓaa, yo on ɓee dènn’t ɓai. 15Taɓai nanan ke ɔr ngokon’n njêt ɓaa, è njè tɔl doo. Sei geri mbak titeke njè tɔl doo nga ndikumgajer urkei kem̂n’t ndan lé. 16Ɗarinè, jè geri ngarankum tár nan takul kinye ke Krist inye ra’n ade yo tede le jéi. Gir’n ‘ke nè á, jèi géa, gar-gar j’à kinyei ra jéi kadi yo tede le ngakon jéige tɔ. 17Ke nè á doo karé aw se nyankinge ngain dè nang nè, nè è unn kum’n mbeng dè ngokon’n ke nyan nal’n. A ɓaa, ké tár ke doo nè ede nè n’tár Nube nga tò ra wa? 18Ngannemge, ade jè tári nan se tà ke tà jéi’t karè lé. Nè ade jè tári nan se nyanra jéige. Nyanra jéi á à tɔji titeke tár ke jè tári nan nga è ngarankum tár kerɔte. 19E ke nè á è nyan ke ade j’à geri titeke jèi le ngarankum tà kuwe. Gir’n ke nè á j’adi ɓengre jéi oso’n nang pon non Nube’t. 20Ke nè á ɓengre jéi ile tà dè jéi’t ɓaa, maje kade jè geri titeke Nube bòi dum dè ɓengre jéi a, è ger nyange malang a tɔ. 21Kotárge le’m, ke nè á ɓengre jéi ile tà dè jéi’t lé ɓaa, jè ndai kem̂ jéi káng non Nube’t. 22Nyange malang ke jè kɔi Nube nga, j’à j’ingei tede kan ke j’an-in dè ndukunnge le’n sêw-sêw a, jè rai nyan ke taa kum’n a tɔ. 23Nube unn ndu’n ade jèi le kade j’undei kem̂ jéi dè ri Ngonn’n Jésu-Krist’t a, jè tári nan titeke ndɔ ke Krist unn’n ndu’n ade jèi. 24Doo an dè ndukunnge’t le Nube sêw-sêw ɓaa, è um nan’t bɔk se Nube a, Nube géa um se’n nan’t bɔk a tɔ. Jè ger titeke Nube um se jéi nan’t bɔk takul Ndil-Kem̂nda ke è ade jèi nga.

will be added

X\