1 JEAN 2

1Ngannemge, m’ndang tà nyange nè m’ade sei tede kade i rai majelé kum si ke kété lé. Ke nè á doo karé ra majelé ɓaa, njè ra rebe tà le jéi ndi ra Bɔ jéi’t non ɓá ta. Njè ra rebe tà le jéi è Jésu-Krist ke Njè ra nyan se dè naje’n. 2E nga inye ra’n ade yo ke nyan kɔr kure kaiya tede kade kem̂ Nube tin’n mbit dè majelége’t le jéi. Nube à ade kem̂’n à tin mbit dè majelége’t le jéi se kar jéi lé, nè à ade kem̂’n à tin mbit dè majelége’t le dooge malang ke dè nang nè. 3Ke nè á j’an-in dè ndukunnge le Nube sêw-sêw ɓaa, jè geri titeke jè geri Nube. 4Doo ke tam ede nè n’ger Nube, nè an dè ndukunn le’n sêw-sêw lé ɓaa, è njè lanm. Ngarankum tà nga géa urkei kem̂n’t lé a tɔ. 5Nè doo ke an dè tà le Nube sêw-sêw ɓaa, è tár Nube kerɔte kuwe. Titeke bè á j’à geri titeke j’umi nan’t bɔk se’n. 6Nanan ke tam ndàt ede nè n’um nan’t bɔk se Nube ɓaa, gar-gar à njiye titeke ndɔ è Jésu njiye’n. 7Kotárge le’m, ndukunn ke m’ndang m’ade sei nè nga, è ke kige lé, nè è ke mari ke sei ingei kété mari ke desêin nga kuwe. Ndukunn ke mari nè nga, è tà ke sei ooi kété ɓá ta. 8Nè né è bè géa, è ndukunn ke kige á m’ndang m’ade sei. E ndukunn ke kige ke ngarankum nyan’n ribe ra’n ke nata takul Krist a, takul si sei a tɔ. Tilkus ndi sanrin kɔke ade lookar ke get unn gir ndogó ɓá ta. 9Doo ke ede nè n’ndi dann lookar’t nè ɔr ngokon’n njêt ɓaa, doo nè nga nain dann tilkus’t sár ɗarinè ɓai. 10Doo ke tár ngokon’n ɓaa ndi dann lookar’t. Nyan karé ke rann’t ke à tuge nja doo ke rang kade oso dann majelé’t goto. 11Nè doo ke ɔr ngokon’n njêt ɓaa, ndi dann tilkus’t. E njiye dann tilkus’t anje ger loo ke ndi à aw ke tutu, tede tilkus tel’n ke njè kum libe. 12Ngannemge, m’ndang magtub nè m’ade sei tede kem̂ Nube tin mbit dè majelége’t le si ɓá ta takul ri Jésu-Krist ke undei kem̂ si dènn’t nga. 13Sei bɔ ngannge, m’ndang magtub nè m’ade sei tede sei geri è ke ndi tutu kété mari ke desêin nga ɓá ta. Sei basa dooge, m’ndang magtub nè m’ade sei tede sei têti rɔ njè kem̂ majelé nga ɓá. 14Sei ngannge, m’ndang magtub nè m’ade sei tede sei geri Bɔ jéi nga ɓá. Sei bɔ ngannge, m’ndang magtub nè m’ade sei tede sei geri è ke ndi tutu kété mari ke desêin nga ɓá. Sei basa dooge, m’ndang magtub nè m’ade sei tede sei nga sei dooge ke tɔg si tò mar ɓai a, tà le Nube urkei kem̂ si’t ade i têti rɔ njè kem̂ majelé a tɔ. 15Nang nè se nyange ke tooi tutu nga, undei de dann kum si’t lé. Ke nè á doo unde nang nè dann kumn’t ɓaa, è tár Bɔ jéi Nube nga lé. 16Nyange malang ke ei le nang nè nga á tooi nè: Kem̂kein le danra a, ngur kinge nyange malang ke kum jéi an a, ti ra ke ɔje dè nyankingege ke dè nang nè a tɔ nga, in-in ra Bɔ jéi Nube’t lé, nè ei in-in dè nang nè. 17Nang se ngur nyange le’n malang ke ra dooge’t nga ndii à ndɔti kawi. Nè doo ke ra nyan ke kem̂ Nube ndige ɔr son’n njêt ɓaa à ndi kumgajer sár se non kuwe. 18Ngannemge, è dè kàde ke ngeinn’t ta. Sei ooi kété titeke Njè kɔse tà se Krist karé à unde loo tee. Nè ɗarinè nga njé kɔse tà se Kristge ngain ndii undei loo teei ta. Gir’n ke nè á jè geri titeke è kàde ke ngeinn’t nga kuwe ta. 19Njé kɔse tà se Krist nga in-in dann jéi’t nè kuwe, nè kété géa ei le jéige lé. Gir’n ke nè á undei loo teei dann jéi’t kɔke. Ke nè á né ndɔ ke ei le jéi ɓaa, né à nain-in se jéi. Nè kunde ke undei loo i teei dann jéi’t kɔke nga, ade jè geri njai titeke ei le jéige ndan lé. 20Nè sei ɓaa, sei dooge ke è Krist kuwe ndum wubu dè si’t unde sei gai. Gir’n ke nè á sei malang i geri Nube ke get. 21M’ndang magtub nè m’ade sei tede ger ke i geri ngarankum tà lé lé. Nè m’ndang magtub nè m’ade sei tede ger ke i geri ngarankum tà a, i geri titeke tà lanm karé bè géa in ra ngarankum tà’t lé a tɔ. 22Doo ke naje se ra’n ede nè Jésu è Krist lé nga, ké è njè tà lanm lé ɓai wa? Doo ke titeke bè nga, è njè kɔse tà se Krist tede è naje se ra’n dè Bɔ jéi Nube’t a, dè Ngonnenn’t a tɔ. 23Nanan ke naje se ra’n ede nè Jésu-Krist è Ngonn le Nube lé ɓaa, è naje se ra’n dè Bɔ jéi Nube’t a tɔ. Nanan ke tam ndàt ede nè Jésu è Ngonn Nube kerɔte ɓaa, è um nan’t bɔk se Bɔ jéi Nube nga ɓá ta. 24Nè sei ɓaa, tà ke ndɔ ke ooi kété mari ke desêin nga, adi urkei kem̂ si’t. Ke nè á tà nè urkei kem̂ si’t ɓaa, sei umi nan’t bɔk se Krist a, se Bɔ’n Nube a tɔ. 25Ndikumgajer sár se non nga, è nyan ke Krist unn’n ndu’n ade jèi kété ɓá. 26M’ndang tà nyange nè m’ade sei ɔje dè dooge ke sangi le súi sei kade i ndemi rebe ke maje’t. 27Nè sei ɓaa, wubu ke Krist ndum dè si’t nga nain ra si’t ɓai. Gir’n ke nè á sei awi ndoo kade doo karé ndó sei nyange lé ta. Nè Ndil-Kem̂nda le’n ke ade sei nga ndó sei nyange malang. Nyange ke Ndil-Kem̂nda ndó sei nga, ei nyange ke kerɔte m ei tàge ke lanm lé. Bè ɓaa, umi nan’t bɔk se Krist titeke Ndil-Kem̂nda ndó’n sei nga. 28Oiyo, ngannemge, umi nan’t bɔk se Krist tede kade ndɔ ke à unde loo tee pan ɓaa, jè ndii heb tàkumn’t lé se kem̂nda káng anje rasɔl. 29Sei geri mbak titeke Krist è Njè ra nyan se dè naje’n. Nanan ke ra nyan ke se dè naje’n se ndɔ karé-karé ɓaa, è ngonn Nube ke Nube kuwe oje’n.

will be added

X\