1 NJE KE CORINTHE 9

1Ké m’di dè’m pal le ra nyan ke kêm’m ndige lé wa? Ké man nga m’ee njèkawkule lé wa? Jésu Kuwe-ɓee le jéi nga, ké ndɔ ke m’an’n se kum’m lé wa? Ké sei sei kann kule ke m’ra m’ade Krist nga lé ɓai wa? 2Ke nè á né njé ke rang-ge an-in man ke njèkawkule lé géa, sei ɓaa, man njèkawkule tede le si kerɔte kuwe. Sei ɓaa, sei korji kule ke m’ra m’ade Kuwe-ɓee. 3E ke nè á è tà ke m’tam dè ram’t non njé kile tà dèm’tge. 4Ké m’aw se tɔgmong le kinge nyankuse éké nyankain tede kulege ke m’ra nga lé wa? 5Ké m’aw se tɔgmong le kaw se kon nann’m karé ke neen’m loo kile mber’t titeke njékawkulege ke rang éké ngakon Kuwe-ɓeege éké Céphas rai nga tɔ lé wa? 6Ké jè se Barnabas kuwe se kar jé á è tà le jé kade jè ra kule ɓita j’inge’n nyankuse jé wa? 7Ké njèrɔ ke ra á uge dè ji’n se nar le’n ke kinge’n è kuwe wa? Ké nan man kage nduu nal kuse kann’n wa? Ké nan á ul dange ɓaa, nal kan-in mba de wa? 8Sei tami edi nè: Man m’tam tàge nè nga se go nyanra dooge ke dè nang nè karè. Nè ké gute-ndu Nube ke Moise ndang nga tam tà nè titeke bè tɔ lé wa? 9Magtub gute-ndu Nube ke Moise ndang tam ede nè: «Dig mang ke nda à njiye dè ko’t le tal njar’n nga, i a kule ɗêng tànn’t kɔge’n kuse ko lé.» Tam ke Nube tam tà nè bè nga, ké tur’n tede mangege tá se kar de wa? 10Ké Nube tam tà nè nga ɔje’n dè jéi jèi kuwe mbain lé wa? Loo naje’n goto, dé ndang tà nè nga d’ɔje’n dè jéi d’ede nè: Njèndɔr nga, unde kêm’n tchên le kinge ko kuwe gar-gar. Njè suwe ko nga, unde kêm’n tchên le kinge ko ke le’n a tɔ. 11Jè dubu ko nyan le Ndil dann si’t. A ɓaa, ke nè á jè taa nyange ke ɔje dè danra ji si’t ɓaa, ké è nyan ke jè ra j’ade al nan ngain wa? 12Ke nè á njé ke rang awi se tɔgmong le rai se si bè ɓaa, è á né j’ayé ra se si kade dum dè le dege nè ɓai lé wa? Nè né è bè géa, j’ɔge ra jé dè tɔgmong’t nè nga. Nè j’orè tà jé njak dè nyan malang tede kile’n kage Tà ke Maje le Krist nga lé. 13Njé ke rai kule ɔje dè nyange ke tooi se ninn de kêm kei’t le Nube nga, ei ingei nyankuse de kêm kei’t le Nube kuwe. Njé ke rai kule dè ɗinger loo nyankuje-mese’t nga, ei ingei nyankuse de tutu tɔ. Ké sei geri bè lé wa? 14Njé ke ilei mber Tà ke Maje nga, Kuwe-ɓee unn ndu’n ade de le kade d’inge nyankuse de tu Tà ke Maje’t kuwe tɔ. 15Nè man ɓaa, m’ube go nyange nè malang m’inye. M’ndang magtub nè tede le deje’n nyange nè nga ji si’t lé. Tà ke m’tam m’unde’n kàde’m nga, m’nda dè’t njáng. Kweii’m è soo’t, dum kade ndɔ ke rang doo ree deje tà’m dè ranel kule’t nè nga. 16Tà ke Maje ke m’ile mber’n nga, è nyan ti ra lé. E nyan ke d’unde dèm’t kade m’ra gar-gar. Ke nè á m’ile mber Tà ke Maje nga lé ɓaa, m’a m’an ɓai. 17Ke nè á ndɔ ke è man kuwe m’in se kêmndige le’m m’ra kule nè nga ɓaa, m’ayé kinge nar kuge dè ji’m. Nè ke nè á m’ile mber Tà ke Maje nga se go kêmndige le’m lé ɓaa, è nyan ke d’unde dèm’t kade m’ra á m’ra karè. 18A ɓaa, ké ri á è nar kuge dè jii’m wa? Kile mber Tà ke Maje anje taa nyan á è nar kuge dè jii’m. Man m’ee njèkile mber Tà ke Maje kerɔte kuwe. Nè né è bè géa, m’ɔge ra’m dè taa nyange ji dooge’t ɔje dè Tà ke Maje ke m’ile mber’n m’ade de nga. 19Man nga m’ndi dè’m pal m m’ee ɓer le doo karé bè lé. Nè né è bè géa, m’tel ra’m ke ɓer le dooge malang tede kinge’n kosdooge bule ngain ase dè tɔgem’t kade Krist. 20Loo ke man m’ee se Juipge ɓaa, m’ra ra’m ke Juip bè tɔ tede le kinge’n Juipge kade Krist. M’ndi gir gute-ndu’t lé. Nè loo ke m’ndi dann njé ke ilei koje dè gute-ndu Moise’t ɓaa, m’ra ra’m m’ase nan se doo ke ndi gir gute-ndu’t le Nube ke Moise ndang. M’ra titeke bè tede le kinge’n njé ke ndii gir gute-ndu’t kade Krist. 21Loo ke m’ndi se njé ke geri gute-ndu le Nube ke Moise ndang nga lé ɓaa, m’ra ra’m ke doo ger gute-ndu Nube lé bè. Man m’ee doo ke m’ger gute-ndu le Nube mbak kuwe, nè m’ra titeke bè tede le kinge’n njé ke ndii anje gute-ndu nga tɔ. 22Ke nè á m’ee se njè ke kundekêm le de ɓeɓer lé ɓaa, m’tel ra’m ke doo ke kundekêm le’n ɓeɓer lé. M’ra titeke bè tede le kinge’n njé ke kundekêm le de ɓeɓer lé kade Krist. M’tel ra’m ke gàr dooge malang dè nyange’t malang tede le kaje’n njé ke nange kade Krist. 23M’ra nyange nè nga malang tede le Tà ke Maje, le kade m’ube’n maje’n a tɔ. 24Njé ke naji nan ngɔde ndá-loo kan-in ngɔde’t nga, an-in ngɔde malang kuwe. Nè doo karé ke an-in ngɔde dum madennge á inge nyankunde nja’n. Ké sei geri bè lé wa? Bè ɓaa, an-in ngɔde se gos’n tede kade ingei nyan-kunde nja le si ta. 25Njè kan-in ngɔde ke rara géa ɔge ra’n dè nyange gai-gai. Njé naje nan ngɔde nga rai titeke bè le kingei jɔkɔ kunn banga ke à ndis ɓai. Nè jè ɓaa, j’ɔge ra jé dè nyange gai-gai tede kinge’n jɔkɔ kunn banga ke à ndis lé. 26Gir’n ke nè á m’an-in’n ngɔde. Nè m’an-in ngɔde rim-rim karè lé. Gir’n ke nè á m’tò m’asenan se doo ke unn ji’n ɓaa, unde’n nyan m unde ndá-loo karè lé. 27Man m’ee njèkile mber kade dooge ke rang. Nè m’gudu ra’m ngire a, m’ade ra’m kage nè bainléa ndɔ ke rang d’a d’ute’m mbeng kɔke.

will be added

X\