1 NJE KE CORINTHE 8

1Ɗarinè m’ndang magtub ɔje dè dan ke dé pole’n magege. Kerɔte kuwe, jèi malang jèi «njé nyangerge» titeke i tami. Nè nyanger ade doo ti ra’n mugug-mugug, nè tár nan á ade doo ra’n tɔge dè kundekêm’t le’n. 2Ke nè á doo karé an ra’n ke njè nyanger ɓaa, è ger ade ase loon’t deĵ lé ɓai. 3Nè ke nè á doo karé tár Nube ɓaa, doo nè nga è kotár le Nube. 4Ndɔ ke kété sei deji man edi nè: Ké j’ase kuse dan ke dé gugu’n magege nga wa? Jè ger maje titeke mage karé bè goto dè nang nè a, jè ger njai titeke Nube kuwe se kar’n bere luk-luk m Nube ke rang goto a tɔ. 5Dooge ke nange tami edi nè nubege tooi dɔ danrán non éké ndii dè nang nè. E kum, nubege se kuwe-ɓeege bulei ngain dè nang nè kuwe. 6Nè jèi ɓaa, jè geri titeke Nube Bɔ jéi kuwe karé bere luk-luk á è Nube. E á unde nyange malang a, jè ndii kumgajer takul’n a tɔ. Jésu-Krist kuwe karé bere luk-luk á è Kuwe-ɓee. E se takul’n á nyange malang tooi tutu a, è se takul’n á jè ndii kumgajer a tɔ. 7Nè kosdooge bule geri gir nyan nè nga njai lé ɓai. Gir’n ke nè á sár ɓila, njé ke nange à ɔdi nan ɗɔyi magege nga ɓai. Ɗarinè géa loo ke dé ndi d’a d’use dange ke dé ra’n nyankuje-mese ɓaa asenan se kum ke d’um nan’t se magege ke dooge gugi nga kuwe ɓai-ɓai. Se go tàgir le de ke ase lé nga, d’an ra de ke nyan ke mine tàkum Nube’t tede dan ke d’use nè nga. 8E nyankuse á ade j’à taai kum Nube lé. Né j’usei nyan lé géa, j’à j’ingei nyan ke rang tutu lé a, né j’usei nyan géa, nyan ke à è soo’t ngain dum ke non goto tutu a tɔ. 9Sei ndii dè si pal le ra nyan ke kêm si ndige kuwe. Nè né è bè géa, undei kumkunju dè ra si’t le kade ndi dè pal le si tuge njé ke kundekêm le de ɓisir lé ɓai ile de dann majelé’t lé. 10I njè «nyanger», ke nè á doo karé ke kundekêm le’n ɓisir lé an-in i ndi a use nyan kêm kei gugu mage’t. A ɓaa, ké nyanrai nè à sule’n kade è géa use dan ke dé gugu’n mage nè nga tɔ lé wa? 11Njètaakêm-Krist ke kundekêm le’n ɓisir lé ke Krist wei tede’n nga, i tuju’n se «nyanger» lei. 12Loo ke sei rai majelé se ngakon sige ke njétaakêm-Kristge titeke bè adi rai nyan ke an-in ke nyan ke go rebe’n lé nè nga ɓaa, è Krist kuwe á sei i rai se’n majelé non. 13Gir’n ke nè á, ke nè á m’an titeke nyankuse à ade ngokon’m à oso dann majelé’t ɓaa, mbate kuse dan nè nga njing è soo’t dum kade ngokon’m oso dann majelé’t tede tà le’m.

will be added

X\