1 NJE KE CORINTHE 7

1Tàge ke ndɔ ke sei i ndangi magtub i deji man nga, ɗarinè m’a tel kile sei dè’t ta. Sei tami edi nè: Kade dingem ɔde ra dinye lé è soo’t ngain. 2Nè le kade tò se nan ke kaiya’t ebe’n ra’n ndêin ɓaa, maje kade dingem ke rara géa taa dinye ke ɔje dè’n a, dinye ke rara géa taa dingem ke ɔje dè’n a tɔ. 3Gar-gar, maje kade ngaw dinye ade neen’n nyan ke ɔje dè’n a, dinye géa gar-gar à ra titebè se ngaw’n a tɔ. 4Dinye ase kunn ra’n ra’n nyan ke kêm’n ndige lé, danra’n è le ngaw’n. Ngaw dinye géa asekum kunn ra’n ra’n nyan ke kêm’n è á ndige lé, danra’n è le neen’n. 5Ɔgi ra si nan lé. Ke nè á ɔgi ra si nan ɓaa, maje kade è se go ndu kase nan le si tede kade ɔji tà se Nube. Nè kɔge nan ra le si nga adi kur’n ngal ngain lé. Mbɔr ɓaa, i teli ingei nan nè bainléa Sú à nan’n sei tede ngur tò se nan ke ndikum ra si’t ɓai. 6Tà ke m’tam m’ede sei nè nga, è tà kɔje á m’ɔje sei m è ndukunn’n á m’unn m’ade sei lé. 7Man ɓaa, m’ndige kade dooge malang kuwe ndii suwe tite man bè. Nè nanan géa Nube ade’n nyan-noje ke ɔje dè’n-dè’n. Gir’n ke nè á, doo karé inge’n nyan-noje ke ɔje dè ndi suwe a, doo karé ke rang inge nyan-noje ke ɔje dè taa dinye a tɔ. 8Nè sei suwege se njékei-kingege ɓaa, m’ede sei ndàt: Ke nè á a i ndii tite’m ɓaa, è nyan ke maje. 9Nè ke nè á asi kɔgi ra si dè ngur tò se nan’t lé ɓaa, i taai nan. Taa nan è soo’t ngain dum kade ngur tò se nan ule por kêm si’t. 10Njé ke taai nan ɓá ɓaa, è ndukunn le Kuwe-ɓee á m’ade de m è ndukunn le’m man lé. Kuwe-ɓee tam ede nè: Dingem à tin se neen’n éké à mbate neen’n lé gar-gar. Dinye à tin se ngaw’n éké à mbate ngaw’n lé gar-gar tɔ. 11Ke nè á dinye tin se ngaw’n éké mbate ngaw’n ɓaa, maje kade tel taa ngaw ke rang lé nè à tel kum nan’t se ngaw’n. 12Sei ke nange ke rang ɓaa, è man á m’ede sei m è Kuwe-ɓee lé ta: Ke nè á ngokon si karé ke njètaakêm-Krist ndi se dinye ke njètaakêm-Krist lé á dinye nè ndige ndi se’n ɓai ɓaa, gar-gar è à rɔ’n lé. 13Ke nè á dinye karé ndi se ngaw’n ke è njètaakêm-Krist lé á ngaw’n ndige ndi se’n ɓai ɓaa, maje kade neen’n nè nga mbate’n lé tɔ. 14Dingem ke njètaakêm-Krist lé nga, è doo ke ndi heb ngain se Nube lé ta tede tà le neen’n ke njètaakêm-Krist. Dinye ke njètaakêm-Krist lé nga, è doo ke ndi heb ngain se Nube lé ta tede tà le ngaw’n ke njètaakêm-Krist a tɔ. Ke nè á è bè lé ɓaa à ei dooge ke mine. Nè ɗarinè ɓaa, ngann sige géa ei dooge ke tooi se ninn de. 15Nè né è bè géa, ke nè á dingem ke njètaakêm-Krist ndige kɔr ra’n ra dinye ke njètaakêm-Krist lé ɓaa, maje kade ɔr ra’n. Ke nè á dinye ke njètaakêm-Krist ndige kɔr ra’n ra dingem ke njètaakêm-Krist lé ɓaa, maje kade ɔr ra’n tɔ. Titeke bè á njètaakêm-Krist ke dingem éké ke dinye ndi dè’n pal m nyan karé ke tɔ’n nan’t se è ke njè kɔr ra’n goto. Nube ɓar jèi le kade jè ndii lom. 16I dinye ke njètaakêm-Krist, ké i ger maje titeke a aje ngawi wa? I dingem ke njètaakêm-Krist ke i ger maje titeke a aje neein wa? 17Maje kade nanan géa ndi loo ndiin’t ke ndi tutu kété ɓita Kuwe-ɓee ɓar’n. E ke nè á è ndukunn ke m’unn m’ade njékebe nange le Nube se loo malang. 18Ke nè á uje tà mɔti pa ɓita Nube ɓari ɓaa, i sang rebe le ɓɔyɔ dè lé ta. Ke nè á uje tà mɔti lé ɓai á Nube ɓari ɓaa, i sang rebe le kuje tà mɔti ɗarinè lé ta. 19Kuje tà mɔte è nyan lé, kuje tà mɔte lé géa è nyan lé a tɔ. Nè kile koje dè ndukunnge’t le Nube á è nyan. 20Maje kade nanan géa ndi loo ndiin’t ke ndi tutu kété ɓita Nube ɓar’n ɓai nga. 21Ke nè á i ɓer ɓai á Nube ɓari ɓaa, ade usi nyan dè ɓer’t lé ta. Ke nè á asekum tel ndi dèi pal ɓaa, i sang rebe’n. 22Doo ke è ɓer kété pa ɓita Kuwe-ɓee ɓar’n nga, tel è doo le Kuwe-ɓee ke ndi dè’n pal. Doo ke ndi dè’n pal kété pa ɓita Kuwe-ɓee ɓar’n nga tel è ɓer le Krist tɔ. 23Sei nga, Nube ndogo sei se nar ke ngain ji ɓer’t le kaiya ade i ndii dè si pal ɗarinè. I teli ra si ɓer le dooge lé ta. 24Ngakonmge, maje kade nanan géa ndi loo ndiin’t ke ndi tutu kété ɓita Nube ɓar’n ɓai nga. 25Oiyo, suwege ke dingem éké ke dinyege ke nali geri dinye éké dingem ɓai nga, m’inge ndukunn ke in ra Kuwe-ɓee’t ɔje dè de lé. Nè è tàgir le’m á m’unde non si’t kade umi kêm si dè’t, tede man doo ke Nube ra se’m kêmkanm. 26Man m’gir m’ede nè è soo’t kade dingem ndi bè nal taa dinye tede nyankêmkonge ke ɗarinè. 27Ke nè á i taa dinye ɓá ɓaa, i sang rebe tin se’n tede ndi dèi pal lé ta. Ke nè á i taa dinye lé ɓai ɓaa, i sang rebe taa dinye lé ta. 28Nè né è bè géa, ke nè á i taa dinye ɓaa, è majelé á i ra lé. I ngomande ke nal ger dingem ɓai nga, ke nè á i taa ngaw ɓaa, è majelé á i ra lé tɔ. Nè njé ke taai nan nga à ingei nyantosowur se ndɔge malang. Gir’n ke nè á m’ndige le kute’n nyantosowurge nè nga dè si’t kɔke. 29Ngakonmge, m’ede sei ndàt: Kurloo ke nain nga, ngal ngain lé ta. Unn gir ɗarinè, maje kade njé ke taai dinye teli ndii titeke ndɔ ke taai dinye lé bè. 30Maje kade njé ke noin ɗarinè teli ndii asinan se dooge ke kété noin lé bè. Maje kade njé ke ndii à rai ranel teli ndii asinan se dooge ke kété rai ranel lé bè. Maje kade dooge ke ndii à ndogoi nyange ɗarinè teli ndii titeke dooge ke ndɔ ke kété ingei nyan lé bè. 31Maje kade njé ke ndii ubei maje nyange ke dè nang nè ɗarinè, teli ndii asinan se dooge ke kété ubei maje lé bè. Dè nang nè titeke sei kuwe an-in nga à aw mbɔr ngain lé ta. 32Man m’ndige le kade kêm si olé bɔt-bɔt dè nyange ke dè nang nè lé. Doo ke taa dinye lé ɓai nga, kêm’n olé bɔt-bɔt dè nyange’t le Kuwe-ɓee a, è sang le taa kum Kuwe-ɓee a tɔ. 33Nè doo ke taa dinye ɓá nga, kêm’n olé bɔt-bɔt ɔje dè nyange ke dè nang nè a, è sang le taa kum neen’n a tɔ. 34E doo ke kêm’n è joo. Dinye ke taa ngaw lé éké ngomande ke nal ger dingem ɓai nga, kêm’n olé bɔt-bɔt dè nyange’t le Kuwe-ɓee. E sang kade danra’n se tàgir le’n bere mbak è le Kuwe-ɓee kuwe deri. Nè dinye ke taa ngaw ɓaa, kêm’n olé bɔt-bɔt ɔje dè nyange ke dè nang nè a, è sang le taa kum ngaw’n a tɔ. 35M’tam tà nè nga ɔje dè maje le si sei kuwe m è tede ndɔje’n sei lé. M’tam tà nè nga titeke bè le kade i rai nyange ke ndête sei a, le kade i nain ra Kuwe-ɓee’t kuwe karé bere anje kaw yó-yó, nè-nè. 36Ke nè á doo karé gir kêmn’t titeke ndi suwe tuwe ngonn’n ke mande ke nal ger dingem ɓai nga lé ɓaa, maje kade ra se go kêm kɔje le’n è kuwe. E majelé á doo nè ra lé. Ke nè á doo karé gir kêmn’t titeke ndi suwe tuwe ngonn’n ke basa ke nal ger dinye ɓai nga lé ɓaa, maje kade ra se go kêm kɔje le’n è kuwe. E majelé á doo nè ra lé tɔ. Kade ngonn ke basa taa dinye éké kade ngomande taa ngaw nga è majelé á doo nè ra lé. 37Ke nè á doo karé ɔje kêm’n è’t kuwe njáng le ngonm ra’n sêw-sêw anje ger dinye éké anje ger dingem ɓaa, è ra maje. 38Titeke bè, doo ke ade ngonn’n ke basa ke nal ger dinye ɓai taa dinye éké ade ngonn’n ke mande ke nal ger dingem taa ngaw ɓaa, è ra maje. Nè è ke ade ngonn’n ke basa taa dinye éké ade ngonn’n ke mande taa ngaw lé ɓaa, è ra nyan ke soo’t ngain. 39Loo ke dinye ndi se dè’n dɔ ɓai ɓaa, gute-ndu tɔ’n nan’t neĵ se ngaw’n. Ke nè á ngaw’n wei ɓá ɓaa, è ndi dè’n pal le tel taa ngaw ke rang ke kêm’n ndige, nè maje kade taa dingem ke njètaakêm-Krist tá. 40Nè né è bè géa, ke nè á è tel ndi karé anje taa ngaw ɓaa, ra’n à nel’n ngain dum tel taa ngaw. E ke nè á è tàgir le’m man. M’gir titeke m’ede sei tàge nè se go tɔgmong le Nube tede man géa Ndil’n ndi kêm’t tɔ.

will be added

X\