1 NJE KE CORINTHE 6

1Loo ke doo karé dann si’t aw se tà se njètaakêm-Krist ke karé ke rang ɓaa, ké bain á è ndige kaw sêke’n non njégangtàge ke geri Nube lé tá wa? Ké i rai bè tede ri wa? Ké bain awi se nan non njékêmndage’t lé wa? 2Sei dooge le Nube ke njékêmndage á a i gangi tà dè dooge ke dè nang nè. Ké sei geri bè lé wa? Ke nè á è sei á a i gangi tà dé njé ke dè nang nè ɓaa, ké bain á asi gɔli ngann tàge ke wali bè nga lé taɓai wa? 3E jèi á ndɔn’t j’ayé gangi tà dè dooge ke danrán ke ali tà tà Nube’t. Ké sei geri bè lé wa? Ke nè á è jèi á ndɔn’t j’à gangi tà dè dooge ke danrán’t ɓaa, ké bain á j’asi gɔli tàge ke ɔje dè ngann nyange ke dè nang nè nga lé taɓai wa? 4Ke nè á tàge ke ɔje dè ngann nyange ke dè nang nè tooi dann si’t ɓaa, ɔri njé ke geri Nube lé á undei de ke njégangtàge le si. Dé nè nga, nyan ke ɔje dè njétaakêm-Kristge ndête de ke ndêin bè géa lé. 5M’tam tà nè nga bè m’ile’n rasɔl dè si’t. Ké doo karé ke njèkumkunju ke asekum gangtà le njétaakêm-Kristge goto dann si’t kuwe sár wa? 6Njètaakêm-Krist karé aw sêke njètaakêm-Krist ke rang tà njègangtà ke è njétaakêm-Krist lé nga, ké è kum wa? 7Sêke nan ke tò dann si’t nga, è yai le si ke deri ɓá ta. Nyan ke dè naje’n lé ke dooge rai se si nga, ké bain á sei oréi tà si njak dè’t lé wa? Ké bain á inyei dooge adi ɔyi nyange le si awi lé wa? 8Nè sei kuwe i teli sei njé ra nyange ke se dè naje’n lé se njé banm dooge táa nyange le de se ndɔ karé-karé. Tá dooge ke sei rai nyange ke tite nan bè se de nga, ei ngakon sige ke njétaakêm-Kristge gé ɓai! 9Njé ra nyange ke se dè naje’n lé nga à ingei loo kêm Konɓee’t le Nube lé. Ké sei geri bè lé wa? Adi kum si sú sei lé: Njé tò se nan ke kaiya’t, njé gugu magege, njé sang dinyege éké dingemge ke rang, njé tel ra de ke dinyege, dingemge ke sangi dingemge made dege tooi se de ke dinyege, 10njéɓog-ge, njékêmkeinge, njé ke yibe ule mbe dè de’t, njé tête tàge éké njé banm dooge táa nyange le de nga, à ilei nja de kêm Konɓee’t le Nube ndan lé. 11Njé ke nange dann si’t kété ei njé ra nyange nè nga tɔ. Nè ɗarinè Nube le jéi togo se-kaiya le si ɔr ndát-ndát. E unde sei se ninn’n ade sei dooge le’n a, è ɔr tà dè si’t se ri Kuwe-ɓee Jésu-Krist a, se ri Ndil-Kêmnda a tɔ. 12Njé ke nange dann si’t tami edi nè: «D’inye loo d’ade’m le kade m’ra nyan malang.» E bè kuwe, nè né è bè géa nyan malang nga, ra’n tuwei ɗêw lé. «D’inye loo d’ade’m kade m’ra nyan malang kuwe», nè né è bè géa, m’a kade nyan karé bè géa uwe’m ɓer lé. 13Sei i tami edi nè: «Nyankuse tò tede kêm doo a, kêm doo tò tede nyankuse a tɔ.» E kum kuwe, nè né è bè géa ndɔ karé kuwe Nube à tuju de joo mbak. Nè danra doo nga Nube ra’n ɔje dè tò se nan ke kaiya’t lé. Danra doo nga tò tede Kuwe-ɓee a, Kuwe-ɓee géa ndi tede le danra doo a tɔ. 14Ndɔ ke Nube ade Kuwe-ɓee unde loo tee dann njé ke koo’t. Jèi géa, Nube à ade j’à j’undei loo teei dann njé ke koo’t se go tɔgmong le’n tɔ. 15Danra si è balkum ra Krist. Ké sei geri bè lé wa? Jèi jèi balkum ra Krist. A ɓaa, m’a kunn balkum ra Krist tel’n ke balkum ra kaiya-dinye ndan lé! 16Doo ke um nan’t bɔk se kaiya-dinye ɓaa tel è danra ke karé bere se’n. Ké sei geri bè lé wa? Dé ndang kêm magtub’t le Nube d’ede nè: «Dé joo mbak d’a tel k’ee danra ke karé bere luk-luk.» 17Kerɔte kuwe, doo ke um nan’t bɔk se Kuwe-ɓee ɓaa, è tel è danra ke karé bere luk-luk se go Ndil-Kêmnda. 18Utei ra si mbeng dè tò se nan ke kaiya’t. Majelé ke rang ke rara ke doo ra nga, è gide rann’t nata. Nè doo ke inye ra’n nyein dè tò se nan ke kaiya’t ɓaa, è kuwe ra majelé se danra’n. 19Nube ade sei Ndil-Kêmnda ade ndi kêm si’t ɗarinè. Danra si è gile kei ndi ke tò se ninn’n le Ndil-Kêmnda. Ké sei geri titeke bè lé wa? Bè ɓaa, sei sei kuwe ra si lé, 20tede Nube ndogo sei se nar ke ngain ji ɓer’t le kaiya ade i ndii dè si pal ta. Gir’n ke nè á umi ra si ke nyan kile riɓar dè Nube’t.

will be added

X\