1 NJE KE CORINTHE 5

1Nyankɔbe karé tò dann si’t. E kaiya ke bò ke sei oréi dè nang, nè tà’n oso se loo mbit-mbit. Gàr kaiya nè nga dann dooge ke geri Nube lé géa, doo à inge ndan lé. Dé tam d’ede nè: Doo karé dann si’t taa neen bɔ’n ndii’n. 2Nè sei ɓaa, dè si in tchakm ade i ndii a i tii ra si mugug-mugug. E soo’t kade né i ndii tite doo ke yo tɔl’n bè a, njè ra nyan ke titeke bè nga né a ɔri nin dann si’t kɔke a tɔ. 3Danra’m ndi heb se si nè se go tàgir le’m ɓaa, m’ee se si nan’t. Man ɓaa, m’gangtà dè doo ke njè ra nyan tanan bè nga ɓá titeke man se si nan’t bè. 4I kebi nan se ri Kuwe-ɓee le jéi Jésu-Krist ɔri nan tà. Man géa tàgir le’m um se si nan’t bɔk loo kebe nan’t nè nga tɔ. Se go tɔgmong le Kuwe-ɓee, 5ɔri doo nè nga dann si’t kɔke ilei nin ji Sú’t. Tede kade Kuwe-ɓee Jésu tuju danra’n. Nè ngarankum ra’n à inge kaje ndɔ tel ree’t le Kuwe-ɓee. 6Ti ra le si nga majelé karè. Ké sei geri titeke pululu ke ndêin bè kuwe ade nduju ke loin bere mbak in ngiring-ngiring lé wa? 7Ɔri se-pululu ke mari ra si’t kɔke tede kade i teli sei nduju ke kige ke anje pululu. Sei sei nduju ke anje pululu nga ɓá ta. Kerɔte kuwe, sei sei nduju ke anje pululu tede Krist ke è ngonn bate ra nan Paque le jéi nga dé tɔl’n ɓá. 8Titeke bè, ade jè rai nan Paque le jéi nga se kêmyêr éké se kêm ke mine ke tooi asinan se pululu ke mari nga lé ta. Nè ade jè rai nan Paque le jéi nga se kêm jéi ke unju nyang-nyang a, se ngarankum tà a tɔ. Kêm ke unju nyang-nyang a, ngarankum tà a tɔ nga, tooi asinan se nduju ke kige ke anje pululu. 9Kêm magtub ke m’ndang made sei kété nga, m’ede sei kade utei ra si mbeng ra njé tò se nan ke kaiya’t. 10Man m’ede sei tà nè nga m’ɔje’n dè njé tò se nan ke kaiya’t malang ke dè nang nè ke geri Nube lé nga lé. E njékêmkeinge se njéɓog-ge éké njé polé magege malang ke ndii dann de’t dè nang nè á m’tam tà nè m’ɔje’n dè de lé a tɔ. Dé nè nga, asi kɔri ra si ra de’t ndii gai dè nang nè ndan lé. 11Ḿ-m̀, magtub ke m’ndang m’ade sei ɗarinè nga ɔje dè doo ke ɓar ra’n ke njètaakêm-Krist, nè tel è njè tò se nan ke kaiya’t éké njèkêmkein se njè gugu mage éké njè taje ndu éké njè kade yibe ule mbe dènn’t, éké njèɓog. Doo ke titeke bè nga, utei nin mbeng. Nyankuse géa a usei se’n nan’t lé. 12Ké è tà le’m le gangtà dè njé ke nata’t wa? Ḿ-m̀, è tà le’m le gangtà dè de’t lé. Dé ɓaa, è Nube á à gangtà dè’t. 13Nè njé ke kei ɓaa, gar-gar è tà le si le gangtà dè de’t. Ɔri njè ra kɔbe nga dann si’t kɔke titeke magtub le Nube tam’n.

will be added

X\