1 NJE KE CORINTHE 4

1Maje kade an-in jè ke ngann njékulege le Krist a, ke njé kan dè nyange le Nube ke tooi loo ɓɔyɔn’t a tɔ. 2Nyan karé ke dé sang ra njèkan dè nyange’t nga, è le kade ra kule ke Nube um jinn’t nga se ngang’n lêr-lêr. 3Man ɓaa, tà ke sei gangi dèm’t éké ke dooge ke dè nang nè karè gangi dèm’t nga, usu’m nyan karé lé. Man ɓaa, m’gangtà dè ram’t lé. 4M’ger kêm’t mbak titeke tà karé bè géa uwe dè’m lé, nè è ke nè á tà à ɔr’n dèm’t non Nube’t lé. Njègangtà dèm’t ɓaa è Kuwe-ɓee kuwe karé bere. 5Gir’n ke nè á maje kade i gangi tà dè doo’t se ndáng karè kété anje ndɔ tel ree’t le Kuwe-ɓee lé. I nginei sár adi Kuwe-ɓee kuwe tel ree pa ɓita. E è á à ade loo ar dè nyange ke tooi loo ɓoyɔn’t ɗarinè dann tilkus’t nga. Nyange ke dooge ɔji dè ɓengre de’t le rai se go ngein ɓai nga, Kuwe-ɓee à ribe dè ke nata tàkum kosge’t malang. Ndɔ’n nè nga, nanan géa Nube à pite’n ɔje dè nyan ra’n-ra’n. 6Ngakonmge, m’unn Apollos a, man kuwe a tɔ, ke nyan-tɔje le kade i geri gir gostà ke dooge tami edi nè: « Adi tàgir le si tuge dè tà ke dé ndang kêm magtub’t nè nga gang lé.» Titeke bè á doo karé dann si’t à kunde’n kàde’n se ri njèndó nyan ke karé kute’n è ke karé ke rang mbeng lé. 7Ké nan adi i tò gai dann madige’t wa? Ké ri á i kuwe inge se dè rai nal kade Nube kuwe á adi wa? Ke nè á nyan malang ke inge nga è Nube kuwe á adi ɓaa, ké tede ri á unde’n kàdi titeke è i kuwe á inge se dè rai bè wa? 8Sei an-in titeke ingei nyan malang ke awi ndoo’n nga ɓá ta! Sei an-in titeke sei baw-nyankingege ade i ndii deŝ ɓá ta! Sei teli ngarge ɓá ta! Ke nè á sei ngarge kerɔte ɓaa, jè géa j’ayé k’ee ngarge se si tɔ. 9Jè njékawkulege nga, m’gir titeke Nube ade jè ngamutu go dooge a, è ade d’an jè ke dooge ke dé gangtà dè de’t le tɔl de nata tàkum dooge’t malang. Nube tel jè ke kurkogo le dè nang nè a, le dooge ke danrán se njé ke dè nang nè a tɔ. 10Jè tel mbe tede le Krist, nè sei ɓaa i teli njékumkunjuge tede kum ke umi nan’t bɔk se Krist. Jè tel jè njéyaige, nè sei ɓaa i teli njétɔgege. D’ile riɓar dè si’t, nè jè ɓaa dooge nedi jè. 11Sár ɓila, ɓo ndi ra kum jé ndoo, kunde mann ndi tɔl jè a tɔ. Sár ɗarinè, j’aw mbur jé sutur, dé tunde jè d’ade oso ra jé’t ade j’ile dɔ gam-gam. 12Jè kuwe jè ra kule se ji jé j’ɔr yàl-yàl ɓita j’inge’n nyankuse jé ɓai. Dé taje jè nè ɓaa jè tɔr ndu jé dè de’t. Dooge ɔri jè kororoi, nè j’orè tà jé njak. 13Dooge têti tà undei tà jé’t, nè jè sɔl kêm de sár ɗarinè, d’an jè asenan se ɓirɓite le dooge ke dè nang nè a, d’an jè tite nyeen-nyan ke dé ɓuku kɔke bè a tɔ. 14M’ndang tàge nè nga bè m’ade sei tede kile’n rasɔl dè si’t lé. Nè m’ede sei tàgir nè bè tede sei ngann kotárge le’m. 15Ke nè á awi se njékɔr non sige aru dɔg ke ndói sei rebe kum nan’t se Krist géa a ingei bɔsige ngain lé. E man kuwe karé á m’ee bɔ si ke m’oje sei tede tà ke Maje le Jésu-Krist ke ndɔ ke m’ile mber’n m’ade sei nga. 16M’ra ndoo ra si’t kade i ndaji kum’m man titeke man géa m’ndaje kum Krist bè tɔ. 17Gir’n ke nè á m’ule’n ngonn kotár le’m Timothée kade ra se si dè’t. E doo ke njètaakêm-Krist ke get-get á m’ule’n ra si’t. Timothée nga à olé kêm si dè pa njiye’m ke ɔje dè Krist a, se nyange ke m’ndó njékebe nange le Nube se loo malang a tɔ. 18Njé ke nange dann si’t tii ra de mugug-mugug titeke m’ayé tel kaw ra si’t lé bè. 19Ke nè á Kuwe-ɓee ndige ɓaa, m’a m’tel ɓéee le si ngɔr. M’a m’aw tede le koo tà le njé ti ra dege nè nga á se kar de lé, nè m’a m’aw le kan nyange ke d’ase ra se tɔgmong le Nube. 20Kerɔte kuwe, Konɓee le Nube nga tò ɔje dè ti ra se tà ke tà’t karè lé, nè tò ɔje dè tɔgmong le Ndil-Kêmnda. 21Ké i ndigi ri wa? Ké sei i ndigi kade m’aw ra si’t se ndêin éké se tár nan a, se ndu noje a wa?

will be added

X\