1 NJE KE CORINTHE 3

1Ngakonmge, m’asekum kede sei tà titeke m’ede’n dooge ke tɔgi dè kundekêm’t lé. Man m’ede sei tà asenan se dooge ke Ndil-Kêmnda goto kêm de’t a, dooge ke majelé on ɓee dè de’t a tɔ. Sei i tooi asinan se ngannge ke ndêin bè dè kundekêm dè Krist’t. 2Mbà á m’ade ili m m’ade sei mur ke mong lé, tede sei asikum kon-in mur lé ɓai. Sár ɗarinè géa, tɔg si ase kon mur ke mong nga lé ɓai, 3tede sei dooge ke karè m nyan le Ndil goto kêm si’t. Ke nè á ra jang se kɔl nan tooi dann si’t ɓaa, ké sei dooge ke kundekêm le si goto ade majelé on ɓee dè si’t lé ɓai wa? Ké nyanra si se tà tam si è nyanra dooge ke nang nè karè lé ɓai wa? 4Loo ke doo karé dann si’t tam ede nè: «Man m’ee le Paul», è karé ke rang ede nè: «Man m’ee doo le Apollos» nga, ké nyanra si è nyanra dooge ke dè nang nè karè lé ɓai wa? 5A ɓaa, ké Apollos nga è nan wa? Ké Paul nga è nan wa? Jè joo mbak jè ngann njékulege le Nube le ra se si le kade undei kêm si dènn’t. Nanan géa dann jé’t ra kule ke ɔje dè’n ke Kuwe-ɓee um jinn’t. 6Man Paul ndɔ ke m’ee njè dubu nyan, Apollos nga ndɔ ke è njè kum mann dè’t. Nè Nube á è njè kade nyan ra tɔge ke kété-kété. 7Titeke bè á njè dubu nyan éké njè kum mann dè’t ei nyange lé. Nè Nube ke njè kade nyan ra tɔge ke kété-kété kuwe karé á è nyan. 8Njè dubu nyan se njè kum mann dè nyan’t nga asinan mbak. Nè Nube à uge dè ji nanan géa dann de’t se go kule ke è ule ra’n ndibe tutu. 9Jè jè njémade kulege le Nube, nè sei sei ndɔr le Nube a, kei le Nube a tɔ. 10Man m’tò m’asenan se kɔde kunde gir kei ke unde gir kei kété ɓita doo ke rang unde kei dè’t ɓai. Gir kei ke m’unde nga, è se go noje ke Nube uwe se’m. Nè maje kade nanan géa unde kumkunju dè rann’t ɔje dè gos kunde kei dè gir kei’t nè nga. 11Jésu-Krist nga è gir kei ke d’unde nang kété ɓá. Doo karé bè asekum kunde gir kei ke rang lé ta. 12Ke nè á doo unde kei dè gir kei’t nè nga se nar-ɔr éké nar-nda éké se kuberi herge ke gate de è ngain éké undei se kage, undei se káde nyan éké se mu géa, 13ndɔ tel ree le Kuwe-ɓee à kuje gir kule ra nanan géa ke nata ndái-ndái ɓai. Ndɔ tel ree le Kuwe-ɓee Jésu nga tò asenan se por ke à nan kule ra nanan géa le kan. 14Ke nè á doo unde kei dè gir kei’t nè á kei le’n nda njáng nal kade por ró’n ɓaa, doo nè nga à inge nyan kuge dè ji’n kuwe. 15Nè, ke nè á por ró kule ra doo nè nga rák-rák ɓaa, è à nal nyan kuge dè ji le’n. E ɓaa d’a d’aje’n, nè né è bè géa è tite doo ke unde loo pitring tee dann por’t an-in bè. 16Kerɔte kuwe, sei sei gile kei ke tò se ninn’n le Nube a, Ndil Nube ndi kêm si’t a tɔ. Ké sei geri titeke bè lé wa? 17Ooi maje, ke nè á doo tuju gile kei ke tò se ninn’n le Nube nga ɓaa, Nube à tuju’n kɔke tɔ. Gile kei ke tò se ninn’n nga, è sei. 18Maje kade doo karé bè ade kum’n sú’n dè tàge’t nè nga lé. Ke nè á doo karé dann si’t an ra’n ke njèkumkunju ke dè nang nè ɓaa, maje kade tel mbe tá à è njèkumkunju ke get ɓai. 19Oiyo, kumkunju éké gos nyangerge ke dè nang nè nga ei nyan mbege tàkum Nube’t. Gir’n ke nè á Magtub ke tò se ninn’n tam’n ede nè: «Nube uwe njékumkunjuge dè ra gos’t le de.» 20Magtub ke tò se ninn’n tam ɓai ede nè: «Kuwe-ɓee ger tàgirge le njékumkunjuge mbak. E ger titeke tàgirge le de nga ei tàgirge ke raikarè.» 21Bè ɓaa, maje kade doo karé bè géa unde kàde’n se ri doo-ndul made’n lé. Kerɔte kuwe, dé malang dé le sige. 22Paul se Apollos éké Céphas ei ngann njékulege le si. Ndikumgajer éké kwei, nyange ke ɗarinè éké nyange ke à reei ɓai, nyan malang ke dè nang nè è le si. 23Nè sei ɓaa, sei le Krist a, Krist è le Nube a tɔ.

will be added

X\