1 NJE KE CORINTHE 2

1Ngakonmge, kaw ke ndɔ ke m’aw ra si’t m’ede sei tà ke ɔje dè nyan le Nube ke tò loo ɓɔyɔn’t nga, è se tà nel éké gos tam tà le dooge karè lé. 2Kété ke m’ee dann si’t nga, m’aw ndoo ger nyan karé ke rang ra si’t lé, nè Jésu-Krist ke dé ɓer’n kàde kage-ke-dese’t kuwe karé bere. 3Gir’n ke nè á ndɔ ke m’nda’n non si’t se ɓel a, se ngonn koje a tɔ, tite njèyai bè. 4Nyan-ndó le’m se mber kile le’m nga, ndunei ra de ra tà nel éké dè ger go ger gos tam tà le dooge karè lé. Nè mber ke ndɔ ke m’ile m’ade sei nga, è se go tɔgmong le Ndil-Kêmnda. 5Tɔgmong le Ndil-Kêmnda kile ra’n ke nata titeke bè le kade kundekêm le si ndune’n ra’n dè ger gos tam tà le dooge karè lé, nè le kade ndune’n ra’n ra tɔgmong’t le Nube. 6Nè né è bè géa, Krist kuwe è kumkunju ke j’ile mber’n j’ade njé ke tɔgi dè kundekêm’t le de. Kumkunju nè nga in ra dooge’t éké in ra njékonɓeege’t ke dè nang ɗarinè nè nga lé. Kumkunju ke in ra dooge’t éké ra njékonɓeege’t nga, ndɔ ke rang à undei nang ɓai. 7Kumkunju le Nube ke kété tò loo ɓɔyɔn’t á m’ile mber’n m’ade sei. Kumkunju nè nga Nube uwe dè nja unde konn tede riɓar le jéi kété mari ɓita unde nang nè ɓai. 8Kumkunju le Nube nga, doo karé bè dann njékonɓeege ke ndii dè nang nè ke ger’n goto. Ke nè á ndɔ ke njékonɓeege ke ndii dè nang nè geri nin ɓaa, né à adi d’ade ɓer Kuwe-ɓee ke njè ndubra kàde kage-ke-dese’t lé. 9Dé ndang kêm Magtub’t le Nube d’ede nè: «Kumkunju ke Nube uwe dè nja unde konn tede le njé ke tári nga, è nyan ke kum doo an lé a, mbi doo oo lé a, è nyan ke doo gir dè ɓengrenn’t lé a tɔ.» 10Nè Nube ribe dè nyan nè nga ade jèi takul Ndil-Kêmnda. Kerɔte kuwe, Ndil-Kêmnda ter nyan malang a, tàgirge le Nube ke ngarankêmn’t géa, Ndil-Kêmnda ger mbak a tɔ. 11Ké nan asekum ger nyange ke tò dè ɓengre doo’t wa? E tàgir le doo ke dè ɓengrenn’t kuwe karé á ger nyange malang ke tò dè ɓengre doo’t. Titeke bè Ndil-Kêmnda le Nube karé á asekum ger nyange malang ke dè ɓengre Nube’t. 12Jèi ɓaa, ndil ke j’ingei nga è ndil ke in ra dooge ke dè nang nè lé, nè è Ndil ke in ra Nube’t tede le kade jè geri nyan-nojege ke Nube ade jèi nga. 13Jè tam tà le nyan-nojege nè nga se go nyan-ndó ke ɔje dè ger gos tam tà le dooge ke nang nè karè lé. Nè jè tam tàge nè nga se go nyan ke ndó ke Ndil-Kêmnda á ndó jè. Gir’n ke nè á j’ɔr’n gir nyange le Ndil j’ade njé ke Ndil ndi kêm de’t. 14Doo ke karé ke Ndil Nube ndi kêmn’t lé ɓaa asekum taa nyan le Ndil Nube lé. Nyan le Ndil Nube tò asenan se nyan mbe tàkumn’t m è asekum ger gir lé. Oiyo, Ndil le Nube è njè kade doo ter nyange ger gir. 15Nè doo ke Ndil Nube ndi kêmn’t ɓaa asekum ter nyan malang ger gir’n. Né è ɓaa, doo karé bè géa asekum kile tà dènn’t lé. 16Magtub ke tò se ninn’n tam ede nè: «Ké nan ger tàgir le Kuwe-ɓee wa? Ké nan ase ndó’n nyan wa? Nè jè ɓaa, j’aw se tàgir le Krist kuwe.

will be added

X\