1 NJE KE CORINTHE 16

1Tà ke ɔje dè nyan ke sei tanni tede njétaakêm-Kristge ke Jérusalem nga, m’unn ndum m’ade njékebe nange ke kêm ɓeekon ke Galatie ɓá ta. Sei géa i rai titeke m’unn’n ndu’m m’ade njé ke Galatie nga bè tɔ. 2Ndɔ ke desêin kêm ndɔ ji sejimute nga, maje kade nanan géa dann si’t unn nyankinge’n ke è ngonm unde se ninn’n m i nginei ndɔ ree’m ɓita le tann’n nar nè nga lé. 3Ndɔ ke m’a m’tee ra si’t nú dɔ ɓaa, m’a m’ndang magtub kunde dè nar ke sei tanni, le kade dooge ke sei i taai kêm de á ɔri de. A awi se nyan-noje nè nga kêm ɓee-bò ke Jérusalem. 4Ke nè á tuwe kade man m’aw Jérusalem ɓaa, ei géa à awi se’m nan’t tɔ. 5M’a m’aw ɓéee le si se rebe ke ɓeekon ke Macédoine. Nè m’a m’unde kêm ɓeekon ke Macédoine se nja’m dɔ gang. 6Bainléa, m’a m’ndi se si ndêin éké m’a m’ndi se si sár kade ɓal ndɔɔ’n. Ke nè á è bè ɓaa, è sei á ndɔn’t a i danni man kawi se’m loo ke m’a m’aw tutu nga. 7Ke nè ɓaa, m’ndinge ra’m le kan sei m le kunde gang se nja’m dɔ titeke kété lé. Ke nè á Kuwe-ɓee inye loo ade’m ɓaa, m’ndige le ndi se si ndêin ɓita kin kaw kété ɓai. 8Nè né è bè géa, m’a m’nain kêm ɓee-bò ke Ephèse nè kuwe sár tee’n ndɔ ra nan ree le Ndil-Kêmnda ke dé ɓar’n Pentecote. 9Tà rebe teen ra’n inye wei bendeng ade’m kade m’ra kule kêm ɓee-bò ke Ephèse nè nga. Nè njébange le’m á bulei ngain tutu. 10Ke nè á Timothée aw tee ra si’t ɓaa, an-in! tá nè a kadi ndi se kêm ɓel. E nè nga géa ndi ra kule le Kuwe-ɓee titeke m’ndi m’ra’n bè tɔ. 11Maje kade doo karé dann si’t nede’n lé. I danni nin adi tel ree ra’m’t se kêmlom. Man a, se ngakonnge ke nè a tɔ, jè ndi jè ngine’n. 12Nè ngokon jéi Apollos ɓaa, m’ra ndoo rann’t ngain kade tel aw se ngakon jéige ke njétaakêm-Kristge ke rang an sei. Nè è ndige le kaw ɗarinè lé ɓai. Ndɔ ke inge kurloo ke kanm ɓita à aw ra si’t ɓai. 13I ndii kum, i ndai njáng dè kundekêm’t le si kum si ke kété-kété. I ndai dingem, uwei ra si mong a tɔ. 14I rai nyan malang dann si’t se go tár nan. 15Ngakonmge, sei geri tite Stéphanas se njékêmkei le’n, ei kuwe ei njétaakêm-Kristge ke desêin kêm ɓeekon ke Achaie bere mbak. Taɓai, sei geri mbak titeke ulei ra de bàj dann kule ke ɔje dè ra se njétaakêm-Kristge. 16Ngakonmge, ulei dè si adi dooge ke titeke bè se njé ke uwei se de tà kule nga a tɔ. 17Ree le Stéphanas se Fortunatus a, se Akaicus a tɔ nga, ade’m ranel ngain. E dé á dé njé ra se’m kum gute tà si dè nyange ke nal’m. 18Dé nga d’ade kêm man a, se kêm si sei a tɔ, oso nang pon. Dooge ke titeke bè nga, an-in de ke ngarankum njékɔr non sige. 19Njékebe nange le Nube ke kêm ɓeekon ke Asie rai sei lapya. Aquilas se Prisca rai sei lapya ngain se ri Kuwe-ɓee. Njékebe nange le Nube ke kebi nan kêm kei le de géa rai sei lapya ngain tɔ. 20Njétaakêm-Kristge malang ke Asie rai sei lapya. I rai nan lapya, uwei nan kàde si’t sêm se kêmnda káng. 21E man Paul kuwe á m’ndang magtub nè se ji’m m’ra’n sei lapya. 22Ke nè á doo karé ndige Kuwe-ɓee Jésu lé ɓaa, maje kade Nube ɔr’n kɔke dann kosdooge’t le’n. Marana tha, Kuwe-ɓee le jé ree! 23Maje kade kêmnoje le Kuwe-ɓee Jésu nain se si. 24Sei malang ke umi nan’t bɔk se Jésu-Krist nga, m’tár sei ngain.

will be added

X\