1 NJE KE CORINTHE 15

1Ngakonmge, man m’olé kêm si dè Tà ke Maje ke ndɔ ke m’ile m’ber’n m’ade sei nga, sei taai se kêm si ɓá. Ɗarinè sei i bai nja si nang tutu maje. 2Ke nè á i taai Tà ke Maje ke m’ile mber’n made sei nga se loo too’n mêngêng ɓaa, a aji. Ke nè á è bè lé ɓaa, kundekêm le si ayé k’ee nyan ke raikarè. 3Krist wei ɓá tede majelége le jéi titeke Magtubge ke tooi se ninn de tami nga. E ke nè á è nyan-ndó ke desêin ke m’inge á m’tel’n m’ade sei. 4Krist nga dé dubu’n. Ndɔ ke njèkon’t mute, Nube ade unde loo tee dann njé ke koo’t titeke ndɔ ke Magtubge ke tooi se ninn de tami kété nga. 5Krist tee pan ke ra Céphas’t ɓita tee hɔi ke ra njékawkulege ke dɔg-gidé-joo nga ɓai. 6Taɓai, go’t gugu njétaakêm-Kristge aru mi an-in nin kade nan’t mbak. Njé ke nange bule dann de’t ndii kumgajer laa ɓai, nè njé ke nange á weii ɓá tɔ. 7Go’t gugu, è unde loo tee pan ke kum Jacques’t. Ndɔ ke rang, è unde loo tee pan ade njékawkulege malang an-in nin a tɔ. 8Man ke m’ee tite ngonn ke d’ɔr’n bè dann de’t nga géa, m’an’n m’utu’n go de malang. 9Man nga m’ee tà-mba le njékawkulege. M’tuwe kade dé ɓar’m njèkawkule lé tede m’ra kum njékebe nange le Nube ndoo ngain gée. 10Nè takul kêmnoje le Nube á m’tel m’ee’n njèkawkule le’n. Noje ke Nube uwe se’m nga è se ndáng karè lé. M’ra kule m’ɔr yàl-yàl dum njékawkulege ke rang malang. Kerɔte kuwe, è tɔg le’m man á m’ra’n kule nè nga lé, nè è noje ke Nube á uwe se’m. 11Né è man éké dé géa, mber ke j’ile j’ade sei nga i taai umi kêm si dè’t ɓá ta. 12J’ile mber j’ede nè: Krist unde loo tee dann njé ke koo’t ɓá. A ɓaa, ké bain á njé ke nange dann si’t tami edi nè: «Dooge à undei loo teei dann njé ke koo’t ndan lé» wa? 13Ke nè á dooge undei loo teei dann njé ke koo’t lé ɓaa, Krist géa unde loo tee dann njé ke koo’t ndan lé tɔ. 14Ke nè á Krist unde loo tee dann njé ke koo’t lé ɓaa, j’ile mber se ndáng karè a, kundekêm le si nga géa è nyan ke raikarè a tɔ. 15Ke nè á dooge à undei loo teei dann njé ke koo’t lé ɓaa, jè njé tête tàge kunde tà Nube’t tede jè tam j’ede nè: «Nube ade Krist unde loo tee dann njé ke koo’t.» 16Ke nè á dooge undei loo teei dann njé ke koo’t lé ɓaa, Krist nga géa unde loo tee dann njé ke koo’t lé tɔ. 17Ke nè á Krist unde loo tee dann njé ke koo’t lé ɓaa, sei undei kêm si dènn’t se ndáng karè a, majelé on ɓee dè si’t ɓai a tɔ. 18Ke né á è bè ɓaa, njé ke umi nan’t bɔk se Krist ɓita weii nga, ei dooge ke tuji kɔke ɓá ta. 19Ke nè á j’undei kêm jéi dè Krist’t ɔje dè ndikumgajer ke ɗarinè nga ɓaa, jèi kuwe jèi dooge ke kum jéi tòndoo dum dooge ke rang malang dè nang nè. 20Kerɔte kuwe, ɗarinè Krist unde loo tee dann njé ke koo’t. Krist è doo ke desêin ke unde loo tee dann njé ke koo’t tede kade dooge ke weii undei loo teei dann njé ke koo’t tɔ. 21Se go loo kunn gir nyange, yo ree dè nang nè se rebe ke ra Adam’t se kar’n bere. Gir’n ke nè á dooge à undei loo teei dann njé ke koo’t takul Krist kuwe se kar’n bere tɔ. 22Dooge malang weii tede k’ee ke ei ngannkà Adam. Dooge malang ke umi nan’t bɔk se Krist nga à teli ndii kumgajer titeke bè tɔ. 23Dooge malang à undei loo teei se gonan-gonan. Krist unde loo tee dann njé ke koo’t ɓá ta. Ndɔ ke à tel le ree ɓaa, njé ke ei lennge à undei loo teei dann njé koo’t kuti go’n ɓai. 24Krist à tuju njékonɓeege se ndukunnge se tɔgmong-ge le de ei njékɔse tà se Nube kɔke pa ɓita à tel se ɓeekon kule ji Bɔ’n Nube’t ɓai. Ndɔ’n nè nga ɓita à è ngei ndɔ ɓai. 25Gar-gar Krist à on ɓee kêm ndɔn’t nè sár kade Nube ule’n njébange le’n malang gir njann’t. 26Njèban ke ngeinn’t ke d’a tuju’n kɔke nga, è yo. 27Dé ndang kêm Magtub ke tò se ninn’n d’ede nè: «Nube ule nyange malang gir nja Krist’t.»Nyange malang ei gir nja Krist’t, nè Nube kuwe se kar’n á goto tutu. Tede è se takul Nube á nyange malang ei gir tɔgmong’t le Krist. 28Nube à ule nyange malang gir tɔgmong’t le Ngonn’n. Go’t gugu, Ngonn à ule dè’n kade’n è Nube ke njèkule nyange malang gir tɔgmong’t le’n nga. Titeke bè á Nube à ee’n Njèkonɓee dè dooge se nyange malang a tɔ. 29Ke nè á dooge à undei loo teei dann njé ke koo’t lé ɓaa, ké njé ke adi d’ule de manné njonm gute tà njé ke koo’t nga à rai bain ta wa? Ke nè á dooge undei loo teei dann njé ke koo’t lé ɓaa, ké bain á dooge ke nange ade d’ule de manné njonm gute tà njé ke koo’t taɓai wa? 30Jè géa, ke nè á dooge à undei loo teei dann njé ke koo’t lé ɓaa, ké tede ri á jè j’ile ra jé salang tà yo’t se kàdege malang wa? 31Ngakonmge, m’ndi tà yo’t se ndɔ karé-karé. Man m’ede sei ndàt, tede sei nyan pite ra le’m takul kum ke j’umi nan’t bɔk se Kuwe-ɓee le jéi Jésu-Krist nga. 32Rɔ ke ndɔ ke m’rɔ se dooge kêm ɓee-bò ke Ephèse ke tooi asinan se dan-tonge bè nga, ke nè á ndɔ ke è se go riɓar le dooge ke dè nang nè karè ɓaa, ké ri á m’a m’inge tutu kade è soom’t wa? Ke nè á dooge à undei loo teei dann njé ke koo’t lé ɓaa, né «j’ayé kusei a, kain a, tede barè j’à j’wei» titeke dooge tami nga. 33Kêm si dè ra si’t. «Uwei made nan se dooge ke nyanra de majelé lé, nè ei njé tuju hal ke maje kɔke.» 34Adi tàgir le si gang tchat. E ke nè á è nyan ke sêw ke kum ra. Ebi ra si ra majelé se ndɔge malang. Kerɔte kuwe, njé ke nange dann si’t geri Nube lé. M’tam bè m’ile’n rasɔl dè si’t. 35Nè bainléa doo karé à deje kede nè: «Ké njé ke koo à undei loo teei titeke bain wa? Ké à undei loo teei se ra de ke bain wa?» 36I njè kêm tɔ kuju tà lé. I gir ndêin an! Ko nyan ke i dubu nga, ke nè á wei lé ɓaa à ube tee mbi lé. 37Kum nyan ke i dubu nga è danra nyan ke à ube ndɔ ke rang nga lé, nè è njar ko ke karé luk-luk tite ko têin éké ko nyan ke rang. 38Nube ade ko nyan ke rara géa kur ra’n ke ɔje dè’n-dè’n titeke kêm’n ndige. 39Danra nyankundege malang ei tite nan lé. Titeke bè á danra dooge tò gai a, danra dange tò gai a, danra helge tò gai a, danra kanjege géa tò gai a tɔ. 40Danra nyange ke danrán tò tutu a, danra nyange ke dè nang nè tò tutu. Ra-ndoin le nyange ke danrán tò gai se ra-ndoin le nyange ke dè nang nè a tɔ. 41Ra-ndoin le kàde tò gai a, ra-ndoin le nan tò gai a, ra-ndoin le kɔnyonge tò gai a tɔ. Ra-ndoin le kɔnyon karé tò gai se made’n karé ke rang a tɔ. 42Kunde loo tee dann njé ke koo’t nga géa à è titeke bè tɔ. Danra doo ke dé dubu nga è nyan ke ndum, nè à unde loo tee dann njé ke koo’t se danra ke à ndum ndan lé. 43Danra doo ke dé dubu nga d’an’n ke nyan lé, nè unde loo tee se riɓar. Danra doo ke dé dubu nga è nyan ke yai, nè à unde loo tee se tɔgmong. 44Danra doo ke dé dubu nga è danra ke yo on ɓee dè’t, nè Ndil à ade à unde loo tee le tel ndi kumgajer se non. Ke nè á danra ke yo on ɓee dènn’t tò tutu ɓaa, danra ke Ndil à ade’n ndikumgajer se non tò tutu tɔ. 45Titeke dé ndang’n kêm Magtub’t d’ede nè: «Adam, doo ke desêin nga, d’ade’n ndikumgajer.» Nè Adam, doo ke ngeinn’t, è Ndil ke njè kade dooge ndii kumgajer. 46Danra doo ke njè kade dooge ndikumgajer à ree kété ke desêin lé. Nè danra doo ke yo on ɓee dènn’t á ree kété ke desêin ɓita danra doo ke njè kade dooge ndii kumgajer utu goo’n ɓai. 47Adam doo ke desêin nga, è nduju nang á Nube ube. Nè Adam ke njèkon’t joo nga in danrán. 48Dooge ke ei le dè nang nè nga, ei tite doo ke ndɔ ke Nube ube’n se nduju nang nga tɔ. Dooge ke ndii danrán nga, ei tite doo ke in danrán nga tɔ. 49Ɗarinè, jè taai nan se doo ke ndɔ ke Nube ube’n se nduju nang. Ndɔ ke rang j’à taai nan se doo ke in danrán ɓai. 50Ngakonmge, man m’ede sei tà nè ndàt titeke danra se mese asikum kingei i konɓee le Nube lé. Nyan ke à ndum se nyan ke à ndum lé asi koréi nan loo karé lé tɔ. 51An-in! m’a m’ede sei nyan karé ke tò loo ɓɔyɔn’t: jèi malang j’à j’weii lé, nè jèi malang d’a d’ade ra jéi à tel waks. 52Ndɔ ke burunju à ɓar ɓaa, jéi malang ra jéi à tel waks ke loon’t nè kuwe, titeke bêl kum doo ke tuge jip bè. Loo ke ndɔn’t burunju à ɓar ɓaa, njé ke weii à undei loo teei dann njé ke koo’t le teli ndii kumgajer se non. Jéi malang géa, d’a d’ade ra jéi à tel waks tɔ. 53Kerɔte kuwe, danra ke à jɔri à ule è ke à jɔri ndan lé nga rann’t. Taɓai danra ke à wei à ule è ke à ndi kumgajer se non rann’t a tɔ. 54Loo ke danra ke à jɔri à unn è ke à jɔri lé kule rann’t a, danra jéi ke à wei à unn è ke à ndi kumgajer se non kule rann’t à tɔ ɓaa, tà ke dé ndang kêm Magtub ke tò se ninn’n d’ede nè: «Ndubra pujur dè yo ɓá ta. 55Yo, ké ndubra lei nga è ra wa? Yo, ké nyankate lei nga è ra wa?» 56Nyankate le yo nga è kaiya a, tɔgmong le kaiya nga è gute-ndu a tɔ. 57Nè Nube ke njè kade j’unni banga takul Kuwe-ɓee Jésu-Krist le jéi nga, jè ra’n oiyo ngain. 58Titeke bè á, ngakonmge ke m’tár sei ngain, i ndai dè nja si’t njáng m i lengi lé. Awi kum si ke kété-kété dè kule’t le Kuwe-ɓee. Sei geri mbak titeke kule le Kuwe-ɓee ke sei ulei ra si ndibe i rai adi Krist nga à tel k’ee nyan ke raikarè lé.

will be added

X\