1 NJE KE CORINTHE 13

1Ke nè á m’tam tà tam dooge ke dè nang nè éké ke danrán malang nè tár nan goto kêm’t ɓaa, m’tò titeke ninge-kase ke ɓar kêng-kêng éké ganga ke ɓar ase loo nák-nák karè. 2Ke nè á m’aw se nyan-noje ke ɔje dè ribe dè tà ke tà Nube’t, m’ase ger nyange malang ke tooi loo ɓɔyɔ de’t éké m’aw se nyanger ke deri éké m’ase le kaw se kundekêm ke deri tede kɔr’n mbal se girson’n bere géa, ke nè á tár nan goto kêm’t ɓaa, m’ee nyan ke karè. 3Ke nè á m’kai nyankingemge malang m’ade dooge gaje’n karé-karé éké m’inye ra’m m’ade dé ró se por tede kunde’n kàde’m karè nal kade tár nan tò kêm’t ɓaa, nyan karé ke è soom’t tutu goto. 4Doo ke tár nan tò kêmn’t à è njèkile kêm’n pon-pon a, à è njè ra maje a, à è njè ra kêmkein lé a, à è njè tɔje ra’n lé a, à è njè tin ra’n lé a tɔ. 5Doo ke tár nan tò kêmn’t à kin ra nyan rasɔl lé a, à sang nyan ke ɔje dè’n è se kar’n lé a, à k’ee njè ra wong lé a, à k’ee njè tute go majelé ke doo ra se’n lé a tɔ. 6Doo ke tár nan tò kêmn’t à ra nyan se dè naje’n a, à ra ranel dè ngarankum tà’t a tɔ. 7Doo ke tár nan tò kêmn’t à ile kêm’n dè nyange’t malang a, à unde kêm’n dè nyange’t malang a, à orè tà’n njak dè nyange’t malang a tɔ. 8Tár nan à kudu ndan lé. Tàge ke njéribe-dè-tàge ke tà Nube’t tami nga à udi ɓai. Nyan-noje ke le tam’n tà tam dooge gai-gai à ɔsi ngei ɓai a, d’a d’ade gos nyanger à goto ɓai a tɔ. 9Nyanger le jéi ke ɗarinè nga è tàpitem nyanger ke ndêin bè karè a, tà ke tà Nube’t ke jè ribei dè nga, jè ribei dè ndàt malang lé a tɔ. 10Nè loo ke ndɔn’t nyan ke maje ɔr njêt à ree ɓaa, nyan ke maje ɔr njêt lé à goto. 11Loo ke ndɔ ke m’nain ngonn ɓai nga, m’tam tà tam ngonn a, m’gir tà gir ngonn a, m’ɔje rebe nyan asenan se ngonn bè a tɔ. Nè loo ke m’tel m’ee dingem ɓá ɓaa, m’inye go nyanra ngonn kɔke ta. 12Nyange ke j’an-in ɗarinè nga è til nyange titeke doo an’n nyan kêm kuturam’t bè, nè ndɔn’t j’à j’an-in nyange nè nga se kum jéi ngangang ɓai. Nyanger le’m ke ɗarinè nga, è tàpitem gos nyanger karè, nè ndɔn’t m’a m’ger Nube njai-njai titeke è ger’m bè. 13Ɗarinè, nyange ke mute nè á nain-in: kundekêm a, kundekêm tchên a, se tár nan a tɔ. Nè tár nan á dum dè nyange ke mute nè nga mbak.

will be added

X\