1 NJE KE CORINTHE 12

1Ngakonmge, tà ke ɔje dè nyan-nojege ke se ri de-ri de le Ndil-Kêmnda nga, man m’ndige kade i geri gir’n njai ɗarinè. 2Sei geri mbak, kété ke i geri Nube lé ɓai nga, sei inyei ra si adi dé mbule sei d’aw se si non magege ke tà mundu. 3Gir’n ke nè á man m’ede sei ndàt: ke nè á doo tam ede nè Jésu è doo ke majelé ɓaa, è Ndil-Kêmnda á ule tà nè tànn’t ade tam lé. Ke nè á doo tam ede nè Jésu è Kuwe-ɓee ɓaa, è Ndil-Kêmnda á ule tà nè tànn’t ade tam bè. 4Nyan-nojege ke se ri de-ri de le Ndil-Kêmnda nga, è Ndil-Kêmnda ke karé nè kuwe á d’in rann’t. 5Kulege ei gai-gai, nè Kuwe-ɓee ke karé nè kuwe á jè rai kule j’adi nin. 6Kule ra njétaakêm-Kristge ei gai-gai, nè Nube ke karé nè kuwe á ade dooge malang tɔge de á rai nyange malang. 7Nanan géa dann jéi’t Nube ade’n nyan-noje ke ɔje dè’n le tɔje’n tɔgmong le Ndil-Kêmnda ke nata tede kade njétaakêm-Kristge malang ubei maje’n. 8Ndil ade doo ke karé tɔgmong kade tam’n tà se kumkunju a, ade doo karé ke rang gos nyanger kade ndó’n madennge ngarankum tàge le Nube. E Ndil ke karé nè kuwe á nobo nyan-nojege nè nga titeke bè. 9Ndil ke karé nè kuwe ade doo karé ke nè aw se kundekêm ke ɓar kage a, ade doo karé ke rang nyan-nojege kade aje’n njératurge a tɔ. 10Ndil á ade doo karé ke nè tɔgmong kade ra’n nyankɔbege, ade doo karé ke rang Ndil ade è njèribe-dè-tàge ke tà Nube’t. Ndil ke karé nè kuwe ade doo karé gos ter nyan ke in ra Ndil-Kêmnda’t se nyan ke in rann’t lé. Ndil-Kêmnda ade doo karé ke rang gos tam tà koje dooge ke rang gai-gai a, ade doo karé ke rang ɓai gos tel gir tàge gai-gai a tɔ. 11E Ndil-Kêmnda ke karé bere nè kuwe á ra nyange nè nga malang. E kai nyan-nojege nè nga ade nanan géa se go kêmndige le’n è kuwe. 12Krist tò asenan se danran ke karé bere ke aw se balkumnge bule. Kagera doo è karé nè balkum rannge á bulei. 13Oiyo, né Juipge se njé ke ei Juipge lé, né ee’n ɓerge éké njé ndi dè palge géa, ndɔ ke d’ule jéi manné njonm d’ade j’umi nan’t bɔk se Ndil-Kêmnda ke karé nè kuwe. Jèi malang jè teli jèi danra ke karé bere ke j’an-in mann ke an-in kutch-kutch ke in ra Ndil-Kêmnda’t. 14Kagera doo nga aw se balkum ra’n karé bere lé, nè aw’n bule. 15Ke nè á nja doo tam ede nè: «Man m’ee ji doo lé; bè ɓaa, man m’ee le kagera doo lé.» Ké tam’n le’n nè nga à kɔge’n k’ee balkum danra doo wa? Ḿ-m̀. 16Bainléa mbi doo a kin tam k’ede nè: «Man m’ee kum doo lé; bè ɓaa, man m’ee le balkum danra doo lé.» Ké tam’n le’n nè á à kɔge’n k’ee balkum danra doo wa? 17Ke nè á kagera doo bere mbak è kum’n ɓaa, ké à koo tà titeke bain wa? Ke nè á kagera doo bere mbak è mbi’n ɓaa, ké à taa ɓus nyan titeke bain wa? 18Kerɔte kuwe, Nube unde balkum rage karé-karé tu kagera doo’t titeke kêm’n ndige. 19Ke nè á ra doo bere mbak è balkum ra’n ɓaa, ké kagera’n è ra ta wa? 20Titeke j’an-in, balkum ra doo bulei, nè kage ra doo è karé bere luk-luk. 21Kum doo asekum kede ji doo kede nè: «M’aw ndooi lé» lé éké dè doo asekum kede nja doo kede nè: «M’aw ndoo si lé» lé. 22Ḿ-m̀, balkum ra doo ke tɔg de goto ke j’an de ke nyan lé nga, gar-gar j’awi ndoo de kuwe. 23Balkum ra doo ke j’an-in de ke nyan ke tin lé nga, è ei nè á jè tɔsi kum jéi dè’t maje a, j’ilei riɓar dè de’t ngain a tɔ. Balkum rage ke j’asi tɔji de nata tàkum dooge’t malang lé nga, jè tɔsi kum jéi dè de’t ngain dum njé ke rang malang. 24Nè balkum ra jéige ke tooi ndá’t ndái-ndái nga, j’awi ndoo tɔsi kum jéi dè de’t lé. Nube rɔte balkum rage tà nan’t neĵ-neĵ. E riɓe dè njé ke ingei riɓar ngain dum njé ke ingei lé. 25E ra titeke bè tede kade tin nan goto kêm kagera doo’t, nè le kade balkum rage tɔsi kum de dè nan’t. 26Ke nè á balkum ra karé ndi dann kumndoo’t ɓaa, gute balkum rage malang ndii se’n dann kumndoo’t. Ke nè á d’ile riɓar dè balkum ra karé’t ɓaa, gute balkum rage malang rai ranel se’n nan’t mbak. 27Sei sei kagera Krist. Titeke bè nanan géa dann si’t è balkum ra Krist. 28Dooge ke desêin ke Nube unde de dè njékebe nange’t le’n nga ei njékawkulege, njé ke ɔsi go de ei njéribe-dè-tà ke tà Nube’t. Dooge ke njèkon’t mute ei njéndó dooge nyan. Go’t ɓaa, ei njé ra nyankɔbege se njékɔr ratur ra dooge’t se njé ra se dooge ke rang se njékɔr non dooge a, se njé tam tà tam dooge ke rang gai-gai a tɔ. 29Dé njékawkulege éké njéribe-dè-tàge ke tà Nube’t malang lé. Dé njé ndó dooge nyan éké njé ra nyankɔbege malang lé. 30Dé njékɔr ratur ra dooge’t éké njé tam tà tam dooge gai-gai malang lé a, dé malang dé njé tel gir tàge lé a tɔ. 31Adi ngur nyan-nojege ke maje dum madege malang ra sei pênn-pênn. M’a m’tɔje sei rebe ke maje dum nga kade an-in.

will be added

X\