1 NJE KE CORINTHE 11

1I ndaji kum’m man titeke man géa m’ndaje’n kum Krist bè tɔ. 2M’an nyan kum si’t tede kêm si olé dèm’t se loo malang. M’an nyan kum si’t tede nyange ke m’ndó sei nga géa, an-in dè sêw-sêw a tɔ. 3Man m’ndige kade i geri titeke dingem ke rara géa, Krist á è doo dè’n. Dingem è doo dè dinye a, Nube è doo dè Krist a tɔ. 4Dingem ke rara ke ɓir dè’n tá ɔje’n tà se Nube éké ede dooge tà ke tà Nube’t nga, ile rasɔl dè Krist ke è doo dènn’t. 5Dinye ke rara ke inye dè’n wei ɔje’n tà se Nube éké ribe’n dè tà ke tà Nube’t nga, ile rasɔl dè ngaw’n ke è doo dè’n. Dinye nè tò asenan karé bere se dinye ke ndise dè’n bè. 6Ke nè á dinye dɔ dè’n lé ɓaa, è tà le kade ndise dè’n. Nè ke nè á dinye an titeke ndise dè’n éké kuje dè’n tò rasɔl ɓaa, è tà le kade dɔ dè’n. 7Dingem à ɓir dè’n éké à kule nyan dènn’t tá kɔje’n tà se Nube lé gar-gar, tede è kum gute tà Nube a, è riɓar le Nube a tɔ. Nè dinye ɓaa, è riɓar le dingem. 8Kerɔte kuwe, d’ɔr dingem ra dinye’t lé, nè dinye á d’ɔr’n ra dingem’t. 9Nube unde dingem tede le dinye lé, nè unde dinye tede le dingem. 10Gir’n ke nè á dinye à dɔ dè’n se nyan gar-gar le kade dooge ke danrán geri nin ke njèkule dè’n kade ngaw’n ke è doo dè’n nga. 11Nè né è bè géa, non Kuwe-ɓee’t ɓaa, dinye à ndi se dè’n anje dingem lé a, dingem géa à ndi se dè’n anje dinye lé a tɔ. 12Oiyo, Nube ɔr kêl ra dingem á ra’n dinye. Dingem géa, è dinye á oje’n tɔ. Nè nyan malang in ra Nube’t. 13Sei kuwe i giri an-in! kade dinye ɔje tà se Nube dè’n wei nga, ké è nyan ke tuwe’n ɗêw wa? 14Ke nè á nyinge dè dingem ngal ngain ɓaa, tò rasɔl tede le’n. Sei geri è ke nè mbak se go nyange ke dè nang nè. 15Ke nè á nyinge dè dinye ngal ngain ɓaa, è riɓar le’n. Nyinge dè ke ngal nga, d’ade dinye kade utu’n dè’n. 16Ke nè á doo karé gir le naje tà nè nga ɓaa, maje kade ger titeke naje tà è kule ra jé jè éké kule ra njékebe nange le Nube se ndɔge malang lé. 17M’ndi m’a t’ɔje sei nyange ke kum ra loo kebe nange’t le si. Ɗarinè m’a m’tɔje sei nyan karé ke rang ke majelé ke dann si’t. M’pite sei dè nyan’t nè nga lé tede loo ke sei kebi nan ɓaa, i teli i majilé ngain dum ke kété ɓai. 18Man m’oo titeke sei ɔri kum nan loo kebe nan’t le si ade i tin-in nan. Tà ke m’oo nè nga, ke nange è kum kuwe. 19Tà tin nan ke tò dann si’t nga, è nyan ke maje tede kade jè geri ngarankum ngann le Nube ke ndai njáng dè Tà ke Maje’t nga. 20Loo ke sei kebi nan nga, è tede kuse mapa le Kuwe-ɓee lé. 21Loo ke sei i ndii nang gak tà nyankuse’t ɓai kuwe ɓaa, nanan géa uwe ra’n mong use nyan le’n ade ɓo ra dooge ke nange a, njé ke nange ke rang yibe enn de ɓá a tɔ. 22Ké kei le si ke kade usei se an-in nyan tutu goto wa? Ké njékebe nange le Nube nga an-in de ke nyan lé kuwe sár wa? Ké i rai titeke bè tede kile’n rasɔl dè njé ke nyan le de goto nga wa? Ké i nginei kade m’ede sei m’ede nè ri wa? Ké è tà le kade m’pite sei dè nyan ra si’t nè nga gar-gar wa? Ḿ-m̀, m’a pite sei dè è ke nè’t ndan lé. 23Nyan ke m’ndó sei nga, m’inge ra Kuwe-ɓee’t. Dann ndɔ ke d’a d’ule Kuwe-ɓee Jésu ji dooge’t kade tɔli nin nga, è unn mapa karé uwe jinn’t. 24E ra Nube oiyo pa ɓita uwe tête danné ede nè: «E ke nè è danra’m ke m’a m’inye kade dé tɔl tede tà le si. Usei adi kêm si olé’n dèm’t.» 25Loo ke d’use mapa ɓá ɓaa, è unn nyankain mann yibe nduu ra titeke bè tɔ ede nè: «Yibe nduu nè nga, è mann-ra ke kige le Nube. Mann-ra nè nga à tɔ sár takul mese’m ke an-in nang. Dɔ-dɔ, loo ke a an-in yibe nduu nè nga ɓaa, i rai è nè nga adi kêm si olé’n dèm’t.» 26Dɔ-dɔ, loo ke a usei mapa nè a, a an-in yibe nduu nè nga a tɔ ɓaa, ilei mber kwei le Kuwe-ɓee sár adi tel ree’n. 27Gir’n ke nè á doo ke use mapa éké an-in yibe nduu le Kuwe-ɓee nè nga se go rebe’n lé ɓaa, tà kaiya à uwe dè’n ɔje dè danra Kuwe-ɓee se mese’n a tɔ. 28Maje kade nanan géa ter kêm’n è kuwe kété pa ɓita use mapa éké an-in yibe nduu nè nga ɓai. 29Kerɔte kuwe, doo ke use mapa éké an-in yibe nduu nal ger titeke è danra Kuwe-ɓee Jésu ɓaa, è use se an-in ile’n tà dè danra’n è’t kuwe. 30Gir’n ke nè á dooge ngain dann si’t ei gum-gum dooge se njé raturge a, dooge bule weii a tɔ. 31Ke nè á jè kuwe jè ter kêm jé j’an kété ɓaa, Nube ayé gangtà dè jéi’t lé. 32Nè Kuwe-ɓee gangtà dè jéi’t le tɔje’n jéi kumkunju tede kade tà uwe’n dè jéi se dooge ke dè nang nè lé. 33Bè ɓaa ngakonmge, loo ke i kebi nan tede kuse mapa le Kuwe-ɓee nga ɓaa, i nginei nan. 34Ke nè á ɓo ra doo karé ɓaa, maje kade use nyan kêm kei le’n tede kade Nube gang’n tà dè si’t loo ke a i kebi nan nga lé. Gute tàge ke nain ɓaa, ndɔ ke m’a m’aw ra si’t ɓita m’a m’gɔl ɓai.

will be added

X\