1 NJE KE CORINTHE 10

1Ngakonmge, m’ndige le kade kêm si olé dè nyange ke teei dè kà jéige’t kété nga. Ei malang ndɔ ke njiyei gir bum’t kuwe. Ei malang ndɔ ke undei ba-bò kate gangi kuwe. 2Kà jéige nga, ndɔ ke d’ule de manné njonm malang gir Moise’t dann bum’t a, dann ba-bò kate’t a tɔ. 3Dé malang d’on mur ke karé ke in danrán nga kuwe. 4Dé malang d’an-in nyankain ke karé ke in danrán nga kuwe tede dé malang d’an-in mann ke ube kàde mbal’t kutch-kutch a tɔ. Mbal nè nga ndolè go de. Mbal nè nga è Krist. 5Nè né è bè géa, kosdoo-bulege ngain dann de’t taai kum Nube lé. Gir’n ke nè á weii kabak-kabak kêm dile’t. 6Nyange ke teei dè de’t nè nga ei nyan-tɔjege tede kade j’ebi ra jéi dè ngur nyange ke majelé ke ndɔ ke rai kà jéige kété nga. 7I teli ra si ke njé polé magege titeke njé ke nange dann de’t ndɔ ke rai nga lé. Dé ndang kêm Magtub’t le Nube titeke bè d’ede nè: «Kosdooge nè nga teli ndii nang tede kuse a, kain nyan a ɓita ɔsi nang in-in kogoi nan ɓai.» 8Ade j’inyei ra jéi nyein dè tò se nan ke kaiya’t titeke njé ke nange dann de’t ndɔ ke rai nga lé. Dooge aru dɔg loo kɔr-joo-gidé-mute weii kabak kêm ndɔ karé bere tede nyange ke titeke bè nga. 9Ade jè nan-in kilekêm le Kuwe-ɓee titeke ndɔ ke njé ke nange dann de’t nan-in nin nga lé. Njé ke ndɔ ke nan-in kilekêm le Kuwe-ɓee nga, lige ton-in de tɔli de kɔke. 10I ɓari tà nyon-nyon titeke ndɔ ke njé ke nange dann de’t ɓari Nube nga lé. Njé ke ndɔ ke ɓari Nube nga, njè tɔ ko dooge in danran ree tuju de ndát-ndát kɔke. 11Nyange nè ke ndɔ ke teei dè kà jéige’t nga, ei nyan-tɔjege. Dé ndang tà’n kêm Magtub’t le Nube kade j’undei kumkunju dè ra jéi’t, tede jè ndii dè kurloo ke ɔje dè ngei nyange malang. 12Gir’n ke nè á doo ke gir kêmn’t ede nè n’nda dɔ ɓaa, maje kade unde kumkunju dè rann’t nè bainléa à kin koso dann majelé’t. 13Nyan ke nan sei nga, è gàr nyan ke nan doo-ndul madesige kuwe tɔ. Nube è njèkinye go kunn-nduge le’n lé. Ke nè á nyan nan sei ɓaa, Nube à inye sei kade nyan nan al dè tɔge si lé. Nube à ade sei gos korè tà njak kade undei loo i teei dann nyan nan’t nè nga. 14Gir’n ke nè á, kotárge le’m, i gangi kɔte nyange ke dé polé’n magege’t nga lé. 15M’an sei tite dooge ke gangi tchat á m’ede’n sei tàge nè. Sei kuwe i gon-in kêm tàge ke m’ede sei nga an-in. 16Jè ra Nube oiyo tede nyankain ke jè deje ndutɔr le Kuwe-ɓee dè’t nga. Ké è nè nga è nyan ke um jéi nan’t bɔk se mese Krist nga lé ɓai wa? Mapa ke jè tête nga, ké è nyan ke um jéi nan’t bɔk se danra Krist nga lé ɓai wa? 17Mapa nga è karé bere. Jè bulei ngain, nè jè teli jèi danra ke karé bere tede mapa ke karé bere luk-luk ke j’orèi nan de’t. 18An-in! kosdooge ke ei girkoje le Israel nga, njé ke usei nyange ke d’uje’n mese nga, ké umi nan’t bɔk se ɗinger loo nyan kuje mese nga lé wa? 19Ké m’a tam kede nè ri wa? Danra mage se dan ke dé tɔl dé polé’n mage nga, ké ei nyange ke raikarè lé wa? Mage ei se Nube asi nan lé. 20Dange ke dooge ke geri Nube lé tɔli poléi mage nga, ei nyange ke gugi ndilge ke majelé m adi Nube lé. Man m’ndige kade umi nan’t bɔk se ndilge ke majelé nga lé. 21Sei asikum kain nyankain le Kuwe-ɓee se ndilge ke majelé nan’t mbak lé. Sei asikum ndi tà nyankuse’t le Kuwe-ɓee se ndilge ke majelé nga nan’t mbak lé. 22Ké j’à gunde Kuwe-ɓee nan’t bè tá kade jang ra’n wa? Ké tɔg jéi ase kile kate kum Kuwe-ɓee Nube’t wa? 23Njé ke nange dann si’t tami edi nè: «D’inye loo d’ade’m le kade m’ra nyan malang.» Oiyo è bè kuwe, nè né è bè géa, nyan malang nga ra’n tuwe sei ɗêw lé. «D’inye loo d’ade’m kade m’ra nyan malang», nè nyan malang à ade njétaakêm-Kristge à tɔgi dè kundekêm’t le de lé. 24Maje kade doo karé sang nyan ke ɔje dè’n se kar’n lé, nè maje kade sang nyan ke ɔje dè doo made’n ke rang tɔ. 25Nyan malang ke d’ige’n kaskoo nga, usei anje deje gir se go tàgir ke kêm si’t. 26Oiyo, nang nè se nyan malang ke tò tutu nga, è le Kuwe-ɓee. 27Bainléa doo karé ke è njètaakêm-Krist lé ɓar sei kadi usei se’n nyan. Ke nè á i ndigi ɓar le’n ɓá ɓaa, usei nyan malang ke d’ade sei se kêmnda káng anje deji gir se go tàgir ke kêm si’t. 28Nè, ke nè á doo karé ede sei ede nè: «Nyan nè nga dé tɔl dé polé’n mage» ɓaa, usei lé tede kede ke doo nè ede sei kété a, tede tàgir ke kêmn’t ke tò se goo lé. 29M’tam tà nè ɔje dè tàgir le’n ke kêmn’t m tàgir le si sei lé. Sei a deji ra si tà kedi nè: «Ké tede ri á doo ke rang à kile tà dè ndi dè pal’t le’m se go tàgir le’n ke kêmn’t tá wa? 30Ke nè á, m’ra Nube oiyo dè nyankuse’t ɓaa, ké tede ri á d’a tam tede’m ɔje dè nyan ke m’ra oiyo dè’t nga ɓai wa?» 31Ke nè á usei nyan éké an-in nyan, éké i rai nyange ke rang gai-gai géa, i rai nyan malang kade Nube inge’n riɓar. 32Maje kade i teli sei jig le tuge nja Juipge, se njé ke ei Juipge lé éké njékebe nange le Nube nga lé. 33I rai titeke m’ra’n: m’sang le taa kum dooge malang dè nyange’t malang a tɔ. Man nga m’sang nyan ke ɔje dè’m se kar’m lé, nè m’sang nyan ke ɔje dè kosdooge tede kade aji.

will be added

X\