1 NJE KE CORINTHE 1

1Man Paul, Nube ɓar’m le kade m’ee njèkawkule le Jésu-Krist se go kêmndige le’n è Nube. Man jè se ngokon jéi Sosthène, 2jè ndang magtub nè j’ade njékebe nange le Nube ke ndii kêm ɓee-bò ke Corinthe. Jè ndang magtub nè nga j’ade sei ke i tooi se ninn si takul kum ke umi nan’t bɔk se Jésu-Krist. Sei nga Nube ɓar sei kade sei dooge le’n ke i tooi se ninn si. Magtub nè nga, jè ndang j’ade dooge malang se kêm ɓee-ɓee ke ɓari ri Kuwe-ɓee le jéi Jésu-Krist. Jésu-Krist nga è Kuwe-ɓee le de a, le jéi jèi a tɔ. 3Maje kade Bɔ jéi Nube a, Kuwe-ɓee le jéi Jésu-Krist adi sei kêmnoje se kêmlom. 4M’ra Nube le’m oiyo se ndɔge malang tede noje ke è uwe se si takul kum ke umi nan’t bɔk se Jésu-Krist. 5Takul kum ke sei umi nan’t bɔk se Jésu-Krist á Nube ade’n sei nyan-nojege malang ke ɔje dè kɔrgir tà le’n a, ke ɔje dè nyanger a tɔ. 6Tà le Krist ke ndɔ ke j’ede sei nga tule ngire’n kêm si’t janm-janm. 7Bè ɓaa, ɗarinè nyan-noje karé bè géa nal sei ke i ndii a i nginei ndɔ tel ree le Kuwe-ɓee le jéi Jésu-Krist nga lé. 8E Kuwe-ɓee le jéi Jésu-Krist nga kuwe á ade a i ndai njáng dè kunde-kêm’t le si sár ndɔ ke ngeinn’t. Titeke bè á tà karé bè géa à uwe dè si kêm ndɔn’t le Kuwe-ɓee le jéi Jésu-Krist nga lé. 9Nube ke ɓar sei kade umi nan’t bɔk se Ngonn’n Jésu-Krist Kuwe-ɓee le jéi nga, è njè kube go ndukunn le’n kinye lé. 10Ngakonmge, m’ndeje sei se ri Kuwe-ɓee le jéi Jésu-Krist le kade umi tà go nan’t karé. Adi kɔr kum nan goto dann si’t. Umi tà le si nan’t a, adi tàgir le si è karé a tɔ. 11Ngakonmge, njé ke kêm kei le kon nann’m Chloé edi man edi nè: Tà tin nan tò dann si’t. 12An-in! tà ke m’oo á tò nè: Nanan géa dann si’t tam ede nè: «Man m’ee le Paul», «Man m’ee le Apollos»,«Man m’ee le Céphas», éké «Man baa, m’ee le Krist.» 13Ké sei giri titeke Krist nga kaya ra’n danné wa? Ké ndɔ ke dé ɓer Paul kàde kage-ke-dese’t tede tà le si wa? Ké ndɔ ke d’ule sei manné njonm se ri Paul nga wa? 14M’ra Nube oiyo tede m’ule doo karé ke rang bè dann si’t manné njonm lé, nè Crispus se Gaius kuwe á m’ule de manné njonm. 15Titeke bè á doo karé asekum tam kede nè d’ule sei manné njonm se ri’m lé. 16Kêm’m ayé kwei nal! Njékêmkei le Stéphanas tɔ á m’ule de manné njonm. Dé nè kuwe m m’ger doo ke rang ke m’ule’n manné njonm lé ta. 17Man nga, Krist ule’m tede kule dooge manné njonm lé, nè è ule’m tede kile mber Tà ke Maje. Tà ke Maje ke m’ile mber’n nga, m’ile se go ger gos tam tà karè lé; nè bainléa kwei le Krist kàde kage-ke-dese’t à tel k’ee nyan ke raikarè. 18Kerɔte kuwe, kile mber tà ke ɔje dè kwei le Krist kàde kage-ke-dese’t nga, njé ke ndii à tuji ooi ke tà mbe karè. Nè jèi ke Nube ndi à aji jèi nga ɓaa, j’an-in ke tɔgmong le’n kuwe. 19Oiyo, dé ndang kêm magtub ke tò se ninn’n d’ede nè: «M’a m’tuju kumkunju le njékumkunjuge a, m’a m’ade gos nyanger le njéger nyange à tel nyan ke raikarè a tɔ. 20Ké tà ri á njèkumkunju ase tam ɓai wa? Ké tà ri á njèkɔrgir gute-ndu ase tam ɓai wa? Gos nyanger ke dè nang nè nga, Nube tel’n ke nyan mbe. 21Loo ke Nube tɔje ra’n dè gos nyanger’t le’n tutu nga, dooge asi geri nin se go nyanger le de ke dè nang nè lé. Gir’n ke nè á Nube ɔje njáng le kaje dooge ke undei kêm de dè Tà ke Maje’t ke j’ile mber’n. Tà ke Maje ke j’ile mber’n nga, njégos nyangerge ke ndii à tuji ooi ke tà mbe. 22Juipge à ɔdi nan deji nyankɔbege, nè njé ke ei Juipge lé à ɔdi nan sangi gos nyanger. 23Nè jè ɓaa, j’ile mber tà le Krist ke dé ɓer’n kade kage-ke-dese’t. Krist ke dé ɓer’n kàde kage-ke-dese’t nga è jig ke tuge nja Juipge ile de a, è nyan mbe tàkum njé ke ei Juipge lé a tɔ. 24Nè Juipge se njè ke ei Juipge lé ke Nube ɓar de nga, Krist è tɔgmong se kumkunju le Nube. 25Oiyo, nyan le Nube ke dooge an-in ke nyan mbe nga, è kumkunju ke dum dè kumkunju le dooge malang. Nyan le Nube ke dooge an-in ke nyan ke yai nga, è tɔgmong ke dum dè tɔgmong le dooge malang. 26Ngakonmge, an-in! dann si sei ke Nube ɓar sei’t nga, njégos nyangerge ke ɔje dè dooge ke dè nang nè ei ngain lé, njétɔgmong-ge ei ngain lé, njé riɓarge ei ngain lé a tɔ. 27Nè Nube tɔr nyange ke dooge an-in ke nyan mbe tede kile’n rasɔl dè njékumkunjuge’t a, è tɔr nyange ke tɔge de goto tede kile’n rasɔl dè njétɔgege’t a tɔ. 28Nube tɔr nyange ke raikarè ke d’an de ke nyan lé a, dooge ke riɓar le de goto tede tuju’n njé riɓarge a tɔ. 29Nube ra titeke bè le kade doo karé bè tii’n ra’n ede nè: nè kuwe n’ger Nube se dè ra’n lé. 30Nè Nube um sei nan’t bɔk se Jésu-Krist. Jésu Krist nga Nube tel’n ke kumkunju le jéi ke deri. Takul Krist á Nube ɔr’n tà dè jéi’t a, unde’n jèi se ninn’n ke dooge le’n a tɔ. Nube ɔr jèi wont ji tɔgmong’t le majelé takul Krist. 31Dé ndang kêm Magtub ke tò se ninn’n d’ede nè: «Ke nè á doo karé ndige ti ra’n ɓaa, maje kade ti ra’n ɔje dè nyan ke Kuwe-ɓee ra tɔl mbas ta.»

will be added

X\