TITA 3

1Ŋan yaa tiadi ba ke ban yaa fangi mi diema gobidikaaba leni li bali danba kuli, ki tuo ki yaa ŋua bi maama, ki go bogini tuonŋanli kuli po. 2Ban da maadi niloba kuli po mabiadima. Ban yaa bua mi yanduanma, ki yaa mani leni bi niba, ki pia mi dingima bi niba kuli kani. 3Ti moko den kpa tie yanluodanba, niyiekaaba leni bi niyaadikaaba. Ti gbanandi bonbuaka-biadila buoli kuli den die ti. Ti den pia ku tugutongu leni li nunponbiadili, ki tie lan pundi ban yaa nani yaaba, ki go nani ti lieba mo. 4Ama U Tienu ti Candaano ŋanbili leni o buama bi niba po n den doagidi yaa yogunu, 5o den faabi ti. Laa tie kelima ti den tieni yaa tuona n tiegi ka, ama li tie o niñingbadima yaa po. O den faabi ti kelima yaa maaliema yaa batisima leni U Tienu Fuoma Yua n goa pandi ti maama yaa po. 6U Tienu den teni ke ti Candaano Jesu Kilisiti yadi tipo o Fuoma yeni ke li kandi, 7ke tinba yaaba n baa li moamoansaali kelima o ŋanbili yaa po, baa baa yaa miali n kan gbeni, tin sugini ki baa yaali. 8Laa maama tie mi madugikaama. N bua ŋan bangi ki go ñii lipo bonŋanla, ke yaaba n daani U Tienu n yaa tiendi ania a tuonŋama tienma po. Lani n ŋani, ki go pia mi fuoma bi niba kuli po. 9Ama ŋan loagidi li boofanli, leni yaajanba yela togida, leni a koana, leni yaa niama n tuugi leni li balimaama, kelima lankuli naa pia fuoma, laa pia mayuli. 10Yaa nilo n fiindi mi paadima, ŋan tundi o yenma, ki go pugini mi liema. Lani yaa pendi, ŋan paadi leni o, 11ki bani ke o sindi oba ki goa ki tiendi ti tuonbiadi, ki kuani o yuli ti buudi nni. 12N yaa soani Alitema yaaka Tikika a kani, ŋan jaligi ki cua ki tuogi nni Nikopolisa dogu nni, kelima n jagi ke n baa ye lankani ku fawaagu banlu kuli. 13Ŋan moandi ki bogini li balimaama bangikaciamo Sena leni Apolosa sancenli, ke liba n da poadi ba. 14Li tie tiladi ke ti yaa yaaba moko n bandi ki yaa tiendi ania a tuonŋama tienma po, ke ban fidi ki yaa baadi yaala n tie bipo tiladi, ke bani biba n da tie nani yaa tibu n kaa luoni yeni. 15Yaaba n ye ne leni nni kuli fuondi a. Ŋan fuondi ti danlinba li dandanli nni. U Tienu yaa ŋanbili n yaa ye leni yikuli.

will be added

X\