TITA 1

1Mini Polo yua n tie U Tienu naacemo leni Jesu Kilisiti tondo, ki baa gobidi U Tienu n gandi yaaba li dandanli nni ke ban bandi yaa moamoani n ŋua U Tienu tuoma. 2Laa bonliedila kuli tanpuuli tie ke bi suginma tie ke bi baa yaa miali n kan gbeni, U Tienu yua n kan pua faama n den niani yaa miali hali ke ŋanduna daa ye. 3Wan den bili yaa yogunu n den pundi, wani U Tienu ti Candaano n den doagidi o maama wan puogi nni min yaa wangi yaama kelima o yanbuama po. 4N diani fini n bimoanga Tita po kelima tikuli n taani ki pia yaa dandanli po yaa po. U Tienu yua n tie Baa leni Jesu Kilisiti ti Candaano n pa ŋa li ŋanbili leni mi yanduanma. 5N den ŋa ŋa Kileta diema nni, ke ŋan ŋanbi yaala n sieni ki bua mi ŋanbima, ki gandi mi diema yeni dogi kuli nni Kilisiti n yini yaaba nikpeliba nani min den yedi a maama. 6Li tie tiladi ke nikpelo kuli n yaa tie ban kan fidi ki kuli yua leni bonlaba. O baa yaa pia poyendo bebe, leni yaa bila n daani Jesu bi niba n kan fidi ki tabi yaaba leni cagindiba bi ke bi tie biyenyieda. 7Li tie tiladi ke Kilisiti n yini yaaba gobidika n yaa tie U Tienu naacen-juoginka, wan da pia ban baa fidi ki kuli o yaala. Wan da tie tupaalu daano, ki da tie mutuodaano, ki da tie dañolo, ki da tie nipualo, ki da tie yua n kuandi o yama yaa i janbi yaa ñuadi nni. 8Wan yaa tie yua n gaani bi niba cangu, ki bua yaala n ŋani, ki yaa pia li kpaagili, ki tiegi, ki gagidi U Tienu po, ki kubi o yuli. 9Wan yaa kubi i moamoani maama yaama n tie mi madugikaama nani ban den bangi o maama, ke wan fidi ki bangi mi bangiŋanma yeni ki yaa paagidi bi pala, ki go maadi ki guliti yaaba n bua ki nia ma. 10Li pia bi niyiekaaba boncianla, ama bi yaba yaaba n kua ku koanciagu siiga ki cie ki boandi biyaba ki go maadi majoagindi buoli kuli. 11Li tie tiladi ŋan mubini bi ñoana, kelima bi yagini ti dietiandi yama ki bangi ki lingi ki baa i janbi ñuadi. 12Bani, Kileta yaaba siiga yeni yendo, bi sawalipualo den yedi: «Kileta yaaba tie bi tuofaadanba yogunu kuli leni ti fuayanbiaditi, ki go tie ku nuagu danba yaaba n pia i kpadije.» 13Laa siedi tie moamoani. Lani yaa po ŋan fu leni ba boncianla ke ban baa li dandanmoanli, 14ki da go ŋua Jufinba yaa telimi leni bi nisaaliba yaa balimaama, bani yaaba n lebidi ki yie kaa go ŋua i moamoani. 15Li bonla kuli ŋani cain yaaba n ŋani cain po. Ama liba kuli ki ŋani cain yaaba n joagini po, bani yaaba n kaa daani yeni po kelima bi yantiali leni bi pala siedi kuli joagini. 16Bi tua ke bi bani U Tienu, ama bi nia o bi bontienkaala nni. Bi tie cancaginniba leni niyiekaaba kaa fidi ki tieni tuonŋanliba kuli.

will be added

X\