LOMA YAABA 7

1N kpiiba, yi baa ga min baa maadi yipo yaama na kelima yi bani li balimaama fuuli. Laa boani yi ke li balimaama die o nilo hali wan ye yaa yogunu kuli. 2Li tie nani li balimaama n loli o pua leni o calo hali o calo miali banlu kuli maama. Ama o ja yaa kpe, o pua yeni faabi leni yaa balimaama n luo o yeni. 3Lanwani o yaa kuni jatoa ke o calo da ye, bi baa yi o li poconconli. Ama o calo yaa kpe, o pua yeni faabi leni li balimaama yeni, o yaa kuni jatoa waa tie poconconli. 4N kpiiba, li tie yene leni yinba moko. Kelima Kilisiti kuuma o gbanandi nni yaa po, yi kpe yaala n tie li balimaama po. Moala nitoa n di die yi, lani n tie Kilisiti, U Tienu n den fiini yua bi tinkpiba siiga, ke tin yaa tiendi yaala n pia mayuli U Tienu po. 5Li nisaali-yantiali n den die ti yaa yogunu, li balimaama den fiini li bonbuaka-biadila ti gbanandi buoli kuli nni, ki teni ke ti tiendi yaala n juodi mi kuuma. 6Ama moala, ti faabi leni li balimaama kelima ti kpe ki paadi leni yaala n den kpa luo ti nani a kpaada yeni. Lani yaa po U Tienu Fuoma gobidi ti ke ti tuuni U Tienu po leni yantiapanli ke laa go taa leni tin den moandi ki baa ŋoadi yaala n diani li balimaama nni maama. 7Lanwani ti baa yedi lede? Li balimaama tie tuonbiadi bi? Kalam. N kan den bandi ti tuonbiadi n tie yaala, kali li balimaama n den waani nni. N kan den faami ke li nunponbiadili tie tagili li yaa tie ke li balimaama den yedi: “Ŋan da pia li nunponbiadili.” 8Ti tuonbiadi den baa u sanu kelima li balimaama po ki fiini li nunponli buoli kuli n pali nni. Kelima li balimaama yaa ye, ti tuonbiadi kpe. 9Min ki den pia li balimaama yaa yogunu n den ye ki fo, ama li balimaama n den cua ti tuonbiadi den faadi, 10ke n mo kpe. Yeni li balimaama yaama n den baa cuani li miali den cuani npo mi kuuma. 11Ti tuonbiadi den baa u sanu kelima li balimaama po ki boandi nni ki ku nni. 12Baa yeni, li balimaama gagidi ki ŋani, mi mabilikaama moko gagidi ki ŋani ki tiegi ki go pia mayuli. 13To, naani yaala n pia mayuli yeni n teni ke n kpe bi? Kalam. Ti tuonbiadi n den tieni la, ki taa li balimaama, yaama n pia mayuli, ki ku nni. Lanwani, kelima li balimaama yaa po, li doagidi ti tuonbiadi n bia ke li pendi maama. 14Ti bani ke li balimaama ñani U Tienu kani. Ama mini wani tie nisaalo ki ŋua n gbanandi n bua yaala, ki tie nani bi kuadi nni ti tuonbiadi po yeni. 15Mii bani kuli min tiendi yaala, kelima mii tiendi min bua ki yaa tiendi yaala, ama n tiendi min nani yaala. 16N yaa tiendi min ki bua ki tieni yaala yeni, n tuo ke li balimaama ŋani. 17Lanwani laa go tie mini nba n tiendi yeni, ama li tie ti tuonbiadi yaadi n ye n niinni n tiendi la. 18N bani ke yaala n ŋani ki ye n niinni baa waamu, lani n tie min tie nisaalo maama po. N bua ki tieni yaala n ŋani, ama mii pia li fidu. 19Mii tiendi min bua ki yaa tiendi yaa bonŋanla, ama n tiendi mi biadima min ki bua ki yaa tiendi yaama. 20To, n yaa tiendi min kaa bua ki tieni yaala, laa go tie mini n tiendi la, li tie ti tuonbiadi yaadi n ye n niinni n tiendi la. 21N laa ke yaa bali n tie na miabi nni, n yaa bua ki tieni yaala n ŋani ti tuonbiadi tabini nni. 22N pali tugu nni U Tienu balimaama mani npo. 23Ama n go laa batoali n gbanandi nni, yaali n moa leni n yantiali yaa bali ki teni ke n tua ti tuonbiadi bali, yaali n tuuni n gbanandi nni yaa kpaadili. 24Fala ye leni nni boncianla. Ŋme baa faabi nni leni n gbanandi yaadi n caani nni mi kuuma nni? 25N tuondi U Tienu, kelima ti Diedo Jesu Kilisiti po. Lanwani mini nba n yantiali nni, n tuo ki ŋua U Tienu balimaama, ama n gbanandi nni n ŋua ti tuonbiadi yaa bali.

will be added

X\